KISAH RASUL-RASUL 28
28
Paulus neak Malta
1Sesudo sapei ngen selamat neak patoi, tembeiba keme namen bahwo daratan o adeba pulau Malta. 2Penduduk asli pulau o kebiak ramah teadep keme. Tobo'o midup opoi ngen majok keme kute moi mindi kerno ujen ngen udarane sengok. 3Ketiko Paulus melungguk kieu ngen pekne neak das opoi, kelueaba dikup dung bisai kerno panesne opoi o, lajau nget tangenne. 4Ketiko penduduk asli pulau o kemliak dung o tegatung neak tangen Paulus, tobo'o madeak suang ngen de luyen, “Tun yo pasti suang tukang munuak, kerno, kunyau si bi selamat kunei bahayo laut, Dewi Keadilan coa munyau si idup.” 5Tapi Paulus muang dung o moi lem opoi ngen coa meding gis didik kulo. 6Tobo'o peker tegoa igai tangen Paulus bakea bekok atau tetibo si bakea matei. Tapi sesudo mbot kekedau an, tobo'o kemliak bahwo coa tejijai jejano ngen si, mako sebelekne tobo'o bependapet bahwo si suang Diwo.
7Coa uak kunei penan o ade taneak temuan pejabat pulau o, genne Publius. Ngen baik atei si semambut keme sebagoi tamune selamo telau bilai. 8Ketiko o tiak Publius dong tegulek kerno bolon demem ngen desentri. Paulus lalau kemliak tiak Publius de bolon o, Paulus bedu'o ngen mpek tangen moi dasne sehinggo si ka'en. 9Sesudo peristiwo o tekoba kulo tun-tun bolon de luyen kunei pulau o ngen tobo'o kena'en kulo. 10Tobo'o kebiak hormat ngen keme, ketiko keme lok lalau, tobo'o semiap kute de keme perlu.
Kunei Malta moi Roma
11Telau bulen sesudo'o keme berakat kunei di kenek debueak kepea kunei Aleksandria de seke'an musim sengok belabueak neak pulau o. Kepea o makei lambang, “Diwo Kembar Kastor ngen Poluks.” 12Keme singgeak neak Sirakusa ngen tinggea neak di telau bilai an ne. 13Kunei di keme belayea igai liwet patoi sapei neak kota Regium. Menne ibut muloi kembus kunei Selatan, pado bilai keduai sapeiba keme neak kota Putioli. 14Neak di keme temau ngen kekedau tun de pecayo ngen Yesus, kerno undangan tobo'o keme tinggea tujuak bilai besamo-samo tobo'o. Sesudo'o keme berakat moi Roma. 15Tun-tun neak Roma de pecayo ngen Yesus bi temi'uk bito tetang keme, tobo'o teko magea keme moi Forum Apius ngen Tres Taberne. Ketiko Paulus kemliak tobo'o, si mucep syukur ngen Allah ngen ateine jijai tabah.
Neak Roma
16Sesudo keme sapei neak Roma, Paulus neluak tinggea neak debuak umeak suang dirai. Paulus jenago suang prajurit. 17Telau bilai sesudo'o Paulus menok tun-tun tekemuko bangso Yahudi. Sesudo tobo'o kopoa Paulus madeak, “Pasuak-pasuak, kunyau uku coa menea jano bae de temtang bangso te atau adat istiadat ninik puyang te, tapi uku tenakep neak Yerusalem lajau senreak ngen tun-tun Roma. 18Sesudo uku nerikso, tobo'o lok mpas uku, kerno uku coa menea saleak jejano de setimpal ngen ukuman matei. 19#Kis. 25:11 Tapi tun-tun Yahudi temtang hal o. Kerno'o, tepakso uku madep Kaisar, tapi iso ngen maksud utuk madau bangso ku. 20Do'oba sebabne uku minoi temau utuk miling ngen udi. Aku neket justru kerno Penyelamat de na'ep bangso Israel.” 21Tapi tobo'o madeak ngen si, “Keme coa temimo su'et-su'et kunei Yudea tetang ko. Keme kulo coa temimo suang kulo de melei namen kute de kidek tetang ko. 22Tapi keme lok temi'uk kunei ko, awei ipe pekeran nu, sebab keme kute bi temi'uk tun mino ajarannu o.”
23Lajau tobo'o ngen Paulus temtep bilai utuk temau. Pado bilai o tekoba tobo'o lem jumleak lai moi penan tinggea Paulus. Paulus tem'ang, melei saksai ngen tobo'o tetang Allah meriteak sebagai Rajo; temurut Hukum Taurat ngen Bukau Nebai-nebai, Paulus beusaho menea tobo'o pecayo tetang Yesus. Hal o berlangsung kunei pueng sapei pelbeak. 24Ade de pecayo ngen kecekne, ade de tep coa pecayo. 25Lajau bubarba pertemuan o ngen coa ade kesesuoian neak antaro tobo'o. Tapi Paulus masiak madeak hal de do yo, “Tepatba jano de nadeak Roh sucai tetang ninik muyang te, awei de nucep Nebai Yesaya. 26#Yes. 6:9-10 Lalauba ngen bangso yo, nadeakba:
‘Udi bakea temi'uk ngen temi'uk, tapi coa ngertai;
udi bakea kemliak ngen kemliak, tapi coa namen jejano.
27Kerno bangso yo bi telo atei,
ngen ti'ukne bi seti'uk,
ngen mataine bi katup.
Supayo tobo'o jibeak ngeliak ngen mataine,
temi'uk ngen ti'ukne,
ngertai ngen ateine,
lajau belek sehinggo Uku kema'en tobo'o.’ ”
28“Sebab o udi harus namen bahwo keselamatan de asalne kunei Allah yo senapei ngen bangso-bangso luyen ngen tobo'o bakea temi'ukne.” [ 29Sesudo Paulus madeak awei'o, tun-tun Yahudi o lalu teminggea penan'o samo betekea.]
30Duai taun anne Paulus tinggea neak Roma; si temimo kute tun de teko ngen si. 31Ngen binai si melei namen ngen tobo'o tetang awei ipe Allah meriteak sebagoi Rajo ngen tetang Tuhan Yesus Kristus.
Currently Selected:
KISAH RASUL-RASUL 28: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
