KISAH RASUL-RASUL 25
25
Paulus madep Kaisar
1Telau bilai sesudo sapei neak provinsi o berakatba Festus kunei Kaisarea moi Yerusalem. 2Neak di Imem-imem kepalo ngen pemipin-pemipin Yahudi teko madep si ngen semapei pengaduan tobo'o teadep Paulus. 3Ngen si tobo'o minoi suaktau anugrah de merugai Paulus, adeba meluak Paulus teko moi Yerusalem. Sebab tobo'o dong menea rencano utuk munuak Paulus neak tengeak dalen. 4Tapi Festus jemawab bahwo Paulus tep tenaen neak Kaisarea, bahwo si suang bermaksud utuk segro belek moi di. 5Nadeakne, “Kerno o baikba tun-tun de tekemuko neak antaro udi milau moi di besamo-samo ngen uku melei pengaduan teadep si, amen ade saleakne.”
6Festus tinggea coa lebiak kunei pado lapen atau puluak bilai neak Yerusalem. Sesudo'o si belek moi Kaisarea. Menne si menea sidang pengadilan, meluak mbin Paulus. 7Sesudo Paulus sapei neak di, kute tun Yahudi de teko kunei Yerusalem je kemlilingne, tobo'o madeak dau tuduhan benek teadep si de coa dapet tobo'o mbuktine. 8Sebelekne Paulus mbela dirai, Paulus madeak, “Uku didik kulo coa saleak, baik teadep Hukum Taurat tun Yahudi atau teadep Bait Allah atau teadep Kaisar.” 9Tapi Festus de lok mok atei tun Yahudi, madeak, “Jano ko lok lalau moi Yerusalem, supayo ko nukum neak di neak adepku tetang pekaro yo?” 10Tapi Paulus madeak, “Uku uyo je neak yo neak adep pengadilan Kaisar, neak yoba uku harus senidang. Awei ko suang namen benea-benea, didik kulo uku coa menea saleak teadep tun Yahudi. 11Jijai, amen uku saleak ngen menea kejahatan setimpal ngen ukuman matei, uku rela matei, tapi amen tuduhan o coa benea, coa ade suang kulo de berhok semreak uku ngen tobo'o. Uku madep Kaisar!” 12Sesudo berunding ngen anggota-anggota pengadilan, Festus jemawab, “Jijai ko harus lalau madep Kaisar.”
Paulus neak adep Agripa ngen Bernike
13Kekedau bilai sesudo'o tekoba Rajo Agripa ngen Bernike moi Kaisarea utuk mucep selamat ngen Festus. 14Kerno tobo'o kekedau bilai tinggea neak di, Festus tem'ang pekaro Paulus ngen rajo o, Festus madeak, “Neak yo ade suang tahanan de teninggea Feliks. 15Ketiko uku ade neak Yerusalem, imem-imem kepalo ngen pemipin-pemipin Yahudi melei tuduhan teadep tun o, minoi supayo si nukum. 16Tapi uku jemawab bahwo tun Roma coa nam semreak awei o bae suang tertuduh utuk nukum ayok si nadep ngen tun-tun de temuduakne ngen melei kesepatan utuk mbela dirai teadep tuduhan o. 17Kerno o tobo'o milau besamo-samo ngen uku minyo. Menne uku segro menea sidang pengadilan ngen meluak mbin tun o madep. 18Tapi ketiko paro pengadune je kemlilingne, tobo'o coa melei suaktau tuduhan tetang kejahatan awei de sudo uku sako. 19Tapi tobo'o cuma selisiak paham ngen si tetang agamo tobo'o, ngen tetang suang de genne Yesus, de sudo matei, dong Paulus madeak ngen pasti bahwo si idup. 20Kerno uku reragau awei ipe uku harus merikso pekaro-pekaro awei o, uku betanye ngen si jano si lok lalau moi Yerusalem, supayo pekarone senidang neak di. 21Tapi Paulus madep Kaisar. Paulus minoi, supayo si tinggea lem tahanan, mbot sapei pekarone tentep ngen Kaisar. Kerno o uku meluak tema; en si sapei uku dapet kemirim si moi Kaisar.” 22Nadeak Agripa ngen Festus, “Uku suang lok temi'uk tun o.” Festus jemawab, “Men ko bakea temi; uk si.”
23Menne tekoba Agripa ngen Bernike moi upacara kebesaran. Sesudo tobo'o masuk moi ruang pengadilan besamo-samo kepalo-kepalo pasukan ngen tun-tun de terkemuko kunei kota o, Festus melei periteak, supayo Paulus nembin masuk. 24Festus madeak, “Au Rajo Agripa serto kute de ade neak yo besamo-samo ngen keme. Kemliakba tun yo, de tenuduak tun Yahudi, baik de neak Yerusalem, atau de neak yo. Tobo'o bi teko ngen uku, samo menggang tobo'o madeak bahwo si coa buliak idup lebiak an. 25Tapi uku coa temau sesuaktau jano bae de sudo neane de dapet nukum ngen ukuman matei, kerno si madep Kaisar, uku temtep utuk kemirim si madep Kaisar. 26Tapi uku ati temuan sesuaktau keterangan de pasti de harus uku tulis ngen Kaisar tetang si. Do'oba sebabne mbin si minyo ngen udi kute, terutamo ngen ko, Rajo Agripa, supayo, sesudo pemeriksaan yo, uku dapet temulis sesuaktau. 27Sebab temurut pendapetku coa masuk akea utuk kemirim suang tahanan ngen coa madeak tuduhan-tuduhan de tenuduak teadep si.”
Currently Selected:
KISAH RASUL-RASUL 25: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
