2 TESALONIKA 3
3
Bedu'oba untuk keme
1Selanjutne, Saudaro-saudaro, bedu'oba utuk keme. Bedu'oba supayo bito kunei Tuhan dapet terus tesebea ngen gacang ngen tenimo ngen baik, serai awei de sudo tejijai ngen udi bel'o. 2Bedu'oba kulo supayo Allah semlamat keme kunei tun-tun pengacau ngen jahat. Sebab coa kute tun pecayo ngen bito kunei Tuhan o.
3Tapi Tuhan setia. Si bakea kemuet udi ngen jemago udi kunei Si de kidek. 4Ngen keme pecayo penuak ngen Tuhan tetang udi, bahwo udi dong menea ngen uku bakea terus menea jano de keme pesen ngen udi.
5Kirone Tuhan mbimbing udi utuk lebiak ngertai bahwo Allah kemasiak udi ngen bahwo Kristus melei ketabahan ngen udi.
Wajib bekerjo
6Saudaro-saudaro, das kuaso Tuhan Yesus Kristus, keme meriteak supayo udi me'uak kute Saudaro, de idup bemalas-malas, ngen de coa temurut ajaran-ajaran de keme melei ngen tobo'o. 7Udi suang namen bahwo udi harus temirau contoh keme. Keme coa bemalas-malas ketiko keme ade neak tengeak-tengeak udi. 8Keme coa mbuk kembuk tun ngen coa masenne. Sebelekne kebilai kelmen keme bekerjo setengeak matei supayo keme coa semaro api kulo kunei antaro udi. 9Keme menea o iso kerno keme coa berhok utuk o, meluyen kerno keme lok jemijai dirai keme teladan bagiak udi. 10Pado waktau keme masiak ade neak tengeak-tengeak udi, keme melei peraturan yo, “Tun de coa lok kerjo, coa buliak mukmei.”
11Keme madeak yo kerno keme temi'uk, bahwo ade tun de coa tertib idupne ngen coa kerjo, meluyen sibuk ngen hal-hal de coa beguno. 12Das kuaso Tuhan Yesus Kristus keme meriteak tun-tun o ngen melei peringatan, supayo tobo'o kerjo seca'o tenang ngen mesoa nafkah tobo'o suang.
13Tapi udi jibeak jemau menea baik. 14Amen ade tun de coa lok temi'uk jano de keme nadeak lem su'et yo. Waspadaba te'adep tun awei o ngen jibeak begaul ngen si supayo si selek. 15Tapi jibeakba manggap si musuak, tapi meleiba nasihat ngen si sebagai suang Saudaro.
Salam
16Tuhan adeba sumber kesejahteraan ite. Semoga Si bogoa melei ngen udi sejahtera lem kute hal. Semoga Tuhan semerto Saudaro kutene.
17Salam kunei uku, Paulus. Uku suang de temulis salam yo. Dioba tando de tenulis lem tiep su'etku.
18Kasiak karunio Yesus Kristus, Tuhan ite, semerto udi kutene.
Hormat keme, Paulus
Currently Selected:
2 TESALONIKA 3: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
