ZEFANIA 3
3
Vwoni Kandi Ovohonyi vwa Jerusalemi
1O, vayaayi, lidaala lia Jerusalemi lidamanu kandi liebaali, lidambizaa vandu valio limali kudivizwa. 2Siliahuliriza Yahova anoho kuvugilira konyoora mageri mba. Si liasuuvira Yahova anoho koteeva vokonyi kutura kuye mba. 3Aviimiliri valio vafuuma kuli zisimba, avakalagi valio vaveeye kuli vivwi viveeye ni inzara, avahuvali valiza kali kigumba kuduuka mugambazuri, si vanyara koleka kali kigumba mba. 4Avaporofeti sivadukanaa mu miyinzi jaavo mba, kandi vaveeye avagaadi. Avasaalisi vonogonyia viveeye vitakatifu kandi vaagirung'anyia malago ga Nyasaye kulienya liavo. 5Navuzwa Yahova akikiri mu lidaala yili, akolaa agaveeye amalungi, siakolaa madamanu mba. Aletaa vulungi ku vandu veve vuli mugamba vugira kolekera. Navuzwa vandu vadamanu vameeda kokora vudamanu ligali, sivaveeye ni zisoni mba.
6Yahova avoora, “Inzi mali kutulizaho zihiiri ziosi, mali kudiviza madaala gaavo nokoleka madigi galio kandi minaara jalio kuva mang'anye. Madaala gamali kolekwa; zinzira ziago ziatigala hazwa si aveeyeho nu mundu uvitira muzio mba. 7Ndasuuvira ndi avandu vange vanyara kutia inzi kandi vavugiliri konyoora mageri gange, kunangwa vavuli kwivilira miigizu ga ndavigiza. Navuzwa vatanga kokora vudamanu kali kuvita ing'inga yindi.”
8Yahova avoora, “Kulwayago mulindi kuduuka lwi lidiku liduka lwa singira kukalagira zihiiri.” Inzi mali kusaavira kuvungiza zihiiri kandi uvwamihi, kunangwa vaduuki kuhulira zinguru ziu vutima vwange vululu. Muliru gwu vutima vwange vululu guladiviza lirova liosi.
9“Maku ndakagilunganyie vandu vi zihiiri ziosi, kandi valakasaale kuinzi kandi sivalisaala ku vanyasaye vandi mba. Vosi valakatie inzi. 10Kali avandu vange avasalanywa ihale kuli Ezopia, valakaleete vihaanwa kuinzi. 11Ing'inga yene yeyo avandu vange sivalakave mu zisoni ziu kuganagana ndi vayibaala kuinzi mba. Ndakadivizi vuli mundu woosi oveeye ni liegingira kandi lielola. Simulakibaale kuinzi kukigulu change kitakatifu kandi mba. 12Navuzwa ndakaleke hagati hinyu avandu vegehizi kandi avahocha; valakenye ovokonyi kutura kuinzi. 13Avandu va Isiraeli avahononoka sialakakole vudamanu na vache mba, sivalakavoole vovehi anoho uvugadi mba. Valakanyore miandu kandi valakave ni likingwa. Sivalakave nu vuti vwosi kandi mba.”
Lwimbu lwu Vusangali
14Mwimbi kandi musangare, munyi, avandu va Isiraeli!
Musangare ni mioyo jinyu josi, Jerusalemi!
15Yahova umali koheriza kuhaana mageri ku munyi
kandi umali kutuliza ho avasigu vinyu vosi.
Yahova, mwami wa Isiraeli aveeye harara ni munyi;
si mulava nu vuti kandi mba.
16Ing'inga yiza navoolere avandu va Jerusalemi ndi,
“Mutava nu vuti mba, lidaala lia Ziyoni!
Makono ginyu gatadedekera mba!
17Yahova Nyasaye winyu aveeye harara na munyi.
Zinguru zizie zilamuha liguuta.
Yahova alayanzizwa na munyi kandi mu vuyanzi vwivwe,
alamuha livamwoyo lihia.
Alimba nukusangara kigira munyi.
18Kuli avandu vasangalira lisavo.”
Yahova avoora,
“Mali koheriza litihiza lie kivi chi lidiviza
kandi mali kutulizaho zisoni zienyu.
19Ing'inga yiza!
Ndakahaane amageri ku vandu vamudambizaa.
Ndakasole avalema vosi,
kandi ndakilanyie avahambe vosi yengo.
Ndakagilung'anye zisoni ziavo kuva luyali,
kandi avandu vosi mu kivala valakavizominyi
20Ing'inga yiza!
Lwa ndakilanyie yengo avandu vinyu vosi avasalanywa;
Ndakamukole kumanyikana mu kivala choosi,
kandi ndakamukole konyoora miandu.”
Yahova umali kovora.
Currently Selected:
ZEFANIA 3: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
