ZEFANIA 1
1
1Yaga na makuva ga Yahova yahaana ku Zefania muyaayi wa Kushi mwisukulu wa Gedalia, chisukululwi cha Amaria kandi kesoni chu mwami Hezekia. Yiyi yaali ing'inga lwa Josia muyaayi wa Amoni yaali mwami wi Vuyuda.
Lieganihiza lie Lidiviza lia Yahova
2Yahova yavoola “Nziza kudiviza vuli kindu choosi ku lirova. 3Ndakadivizi avandu harara ni zinyama, manyonyi goosi; kandi zisuzi ziosi. Ndakagwihizi vandu vachamu. Ndakadivizi avandu vosi mu kivala. Inzi Yahova mali kovora.
4“Ndakahaane mageri ku vandu va Jerusalemi halalani Ivuyuda. Ndakonogonyie vandu vosi avasigamiraa Baali. Sialakaveho nu mundu kali mulala ulakizulirizi avasaalisi vi vifananyi avatumikiraa Baali mba. 5Ndakadivizi vuli mundu woosi ulakanini ku inyumba igulu nu kusigamira liuva, umweli kandi zing'ereng'ani. Ndakadivizi yavo avasigamiraa kandi aviisuhaa kuhaana ku inzi luyali, kandi visuha mulieta liumunyasaye Moleki. 6Ndakadivizi yavo aviranaa inyima kandi yavo avavuraa kuuza ku inzi anoho avavuraa kondeeva kuvimilira.”
7Lidiku liveeye ahimbi lia Yahova ahaanaa likalaga, kulwayago muchiring'ane imbiri weeve. Yahova alohizaa kuhaana vandu veve kuli kisiuviriru, kandi umali koleta vasigu kwingilira kivala chi Ivuyuda. 8Yahova avoora, “Mu lidiku liu kwita yilio, ndakahaane mageri ku vimiliri, vana vayaayi vavami kandi vosi avalondaa miima ja vandu vageni. 9Ndakahaane mageri ku vosi avasigamiraa vifananyi kandi yavo avivaa nu kwiita kunangwa vaduuki kwizuliza zinyumba zia vami vaavo ni vindu via valanyi.”
10Yahova avoora, “Kulidiku yilio, mulakahuliri ulwanga ha kirivwa chizuzi mu Jerusalemi. Mulakahuliri lisioma kolovega lwiluhia wi lidaala linene, kandi lwanga lwi liyoga linene mu vigulu. 11Musiome kandi muliri lwa muhulira yaga, munyi avandu vamenyi kolovega lwindangu wi lidaala linene kigira vakiranyi vosi valakave ni vakuzi.
12“Ing'inga yeyo ndakavuguli itaya nu kwenyeleriza Jerusalemi. Ndakahaane mageri ku vandu visuuvirizaa vene kandi avaluviriri, avevoora ndi, ‘Yahova siakolaa kindu choosi kilahi anoho kidamanu mba. 13Vutugi vwavo vulavugulwa kandi zinyumba ziavo ziladivizwa. Sivalakamenye mu zinyumba zia vumbaka mba, anaho sivalakanwi iwaini kutura ku mizabibu jaavo ja vataga mba.’ ”
14Lidiku lia Yahova liveeye ahimbi, himbi ligali kandi lizaa vwangu! Lidiku yilio lilakave lilulu kali avasikari valuviliri valakaliri nu mwoyo munene! 15Lilakave lidiku liu vutima vululu, lidiku lie kivi kandi lidiku liu vudinyu; lidiku liu kwononya kandi kudiviza, lidiku lie kisundi kenene ligali, lidiku limwamu kandi lia malesi manyingi. 16Lidiku lizuiyi liyoga lie visiriva viu vulwani kandi lwanga lwa vasikari vu vulwani avingiliyi madaala gi zimbinga kandi gi minaara mitambi.
17Yahova avoora, “Ndakaleete kivi ku vandu vosi, maku valakahunahuni kuli avavoku, kigira vamali kongolera vwoni. Kalunu masahi gaavo galakasundulwi kuli amazi kandi miviri jaavo mikuzu jilakagundiri ku marova.”
18Ku lidiku yilio lwa Yahova alakamanye vutima vwivwe vululu, kali zifeza ni zizahabu ziavo ziosi sizilakavahonye mba. Muliru gwu vutima vwivwe gu lakadivizi kivala choosi. Nonoho alakaleete keheri ku vuli mundu woosi omenyi ku lirova.
Currently Selected:
ZEFANIA 1: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
