ZAKARIA 9
9
Kukalagira Vasigu va Isiraeli
1Yaga na makuva ga Yahova: Umali kulaga kuhaana mageri ku kivala cha Hadiraki kandi ku lidaala linene lia Damasiko, si gaveeye nu kuzihiiri zia Isiraeli zieng'ine mba, navuzwa kandi ku lidaala linene lia Siria liveeye lia Yahova. 2Hamazi, eveeye ku lwako na Hadiraki, liveeye lidaala lia Yahova lilakakalagilwi harara na madaala manene ga Tiro na Sidoni nu vusiza vwago vwosi. 3Lidaala lia Tiro liayumbaka zimbinga kandi liavungiza ifeza ni izahabu inyingi kuli luguki! 4Navuzwa Yahova alakavuguri viosi viveeye mulio. Alasiuva vutugi vwalio munyanza kandi lilakasambwe kuduuka kumalova.
5Avandu vi lidaala linene lia Ashikeloni valakalole yaga kandi valakave nu vuti. Avandu vilidaala linene lia Gaza valakalole yaga kandi valakasaliri nu vuzunu vonene. Avandu va Ekironi kandi valakave ndio. Lisuuvirizwa liavo lilakononywe. Avandu va Gaza valakagotizi mwami wavo kandi lidaala liavo. Ashikeloni lilakatigale mang'anye. 6Zihiiri ziazugana zilakamenye mu lidaala lia Ashidoli.
Yahova avoora, “Ndakagehizi liegingira lia vandu va Filisitia avelori yava. 7Si valalia kandi inyama neveeye na masahi anoho viukulia viagaywa mba. Vaahononoka vosi valava avandu vange, kandi valava kuli kiliango mu zihiiri zie Ivuyuda. Avandu va Ekironi valava valala ku vandu vange kuli avandu va Jebusi. 8Ndakalindi kivala change nu kwigalira mahi galavuli kuvitira mu. Sindakaleke avandu vadamanu vadambizi avandu vange kandi mba. Mali kolola kuli avandu vange vasaalira.”
Mwami Alaza mu Ziyoni
9Musangare, musangare, avandu va Ziyoni!
Muhanzuki kigira vuyanzi,
munyi avandu va Jerusalemi!
Henza, mwami winyu yaazaa ku munyi!
Yaazaa ni kivigu kandi liguuta,
navuzwa aveeye muhooma
kandi aniini ku ibunda;
kemoli chi ibunda,
chivuliywi ni ibunda.
10Yahova avoora,
“Ndakatulizi magare gu vulwani kutura mu Isiraeli,
kandi ndavugura zibarasi kutura mu Jerusalemi;
ndakononyie uvuta vwu vulwani.
Mwami winyu alakaleete mirembe hagati hi zihiiri,
alakamiihi kutura ku inyanza kuduuka ku inyanza,
kandi kutura ku mugera gwa Efurate kuduuka ku keheri chi lirova.”
Liranywa lia Vandu va Nyasaye
11Yahova avoora,
“Kigira lilagana liange na munyi
liakunikwa na masahi gi visiuviliru,
ndakahaane vovoholore ku vandu vinyu vaduuki
kutura mu liliina liovuhaambe litaveeye na mazi.
12Mwilane, munyi avandu vazia mu vuhaambe
vamuveeye ni lisuuvirizwa kalunu;
mwilane mu kivala chiinyu chi mirembe.
Kalunu muvooleraa, ndakahaane kandi madanyi
ku munyi kuvita haali kaviri nu vugasu
kolondekana nu vusaliri vwinyu.
13Ndakatumikiri Ivuyuda kuli vuta vwu musikari,
kandi ndakatumikiri Isiraeli kuli mivano ju vuta.
Ndakatumikiri avasaza va Ziyoni
kuli kivavi kulwaana vandu va Gurisi.”
14Yahova alakaloleke ku vandu veve;
alakalase mivano jije kuli loheni.
Yahova Wuvunyali alakahuliriki kuli kisiriva;
alakagende mu imbuza enene kutura Isavaalu.
15Yahova Wuvunyali alakakingi avandu veve,
kandi alakadivizi avasigu vaavo.
Valakahanzuki mu liihi kuli vahambiku,
kandi valakatahizi avasigu vaavo masahi,
galakidoleke kuli masahi gi visiuviliru,
gasundulwa ku vwali kutura ku ibakuli.
16Lwi lidiku yilio lilakaduuki, Yahova
alakahonyie avandu veve,
kuli mwayi ahonyia chayo
chiche kutura mu vuhimwa.
Valakang'ereng'ane mu kivala chiche,
kuli magina guvuguli gavikiywi ku itaji.
17Kivala kilakave kilahi kandi chu kuyaanziza ligali
kuli ndi vayaayi vasoleri valakaviluki
ni zinguru kigira vuswage,
vakana valakaviluki kigira iwaini imbia.
Currently Selected:
ZAKARIA 9: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
