ZAKARIA 13

Kutulizaho Vifananyi kandi Vaporofeti Vuvugadi

1Yahova Wuvunyali avoora, “Lwi ing'inga yeyo iduuka, Kisenukiru kilakunulwa nu kutakasa visukululwi via Daudi harara na vandu va Jerusalemi kutura ku vwoni vwavo kandi kusigamira vifananyi. 2Ing'inga yeyo, ndakatuliziho amita gi vifananyi viosi kutura ku kivala, kandi mundu kali mulala si alakavizulizi kandi mba. Ndakatuliziho mundu woosi ovola aveeye muporofeti, kandi ndakatuliziho liegomba liu kusigamira vifananyi. 3Niiva mundu woosi alazizagilira koporofeta, baba weve na mama weve valamwiganihiza ndi ivi siulava mwoyo mba, kigira ovola makuva gu vugadi mu lieta lia Yahova. Niiva si alahulira lieganihiza yili, baba weve na mama weve vamwivula valamutoza nu kumwita lwava naporofetaa. 4Ku lidiku liene yilio, vuli muporofeti aladuuka mu zisoni na malola geege lwava naporofetaa. Muporofeti sialiviika inguvu yu vwoya yu voporofeti kunangwa aduuki kugaada vandu. 5Navuzwa alavoora, ‘Inzi si mbeeye muporofeti mba. Mbeeye vuzwa mulimi. Ndaamenya mu mulimi kutura mu vosooleri vwange.’ 6Maku niiva mundu alamuteeva, ‘Zimbala ziveeye ku muviri gugwo yizi zianyooleka ndi?’ Naye alativula, ‘Zimbala yizi ndaazinyoola mu nyumba yu mulina wange.’ ”

Lilaga Kwita Mwayi wa Nyasaye

7Yahova Wuvunyali avoora, “O, kivavi, vuka ulwaane mwayi wange! Oveeye ahimbi ni Inzi! Kuya mwayi uyu, na magondi galasalanywa. Inzi ndalwaana vimeme viago. 8Avandu viduma viviri ku vivaga mu kivala choosi valitwa, ni kiduma kilala ku vivaga kilatigala mwoyo. 9Ndakagerizi kiduma chakavaga kilihononoka, kandi ndavatakase kuli ifeza isiyangwa mu kisambiru chu muliru. Ndavagerizi kuli izahabu isiyangwa mu kisambiru chu muliru. Maku valakasaale ku inzi, na inzi ndakavativuliri. Ndakavavoolere ndi vaveeye avandu vange, navo valakiyame ndi inzi mbeeye Nyasaye wavo.”

Currently Selected:

ZAKARIA 13: LOGOOLI

Highlight

Copy

Compare