RUZI 3
3
1Lidiku lilala Naomi yavolera Ruzi, “Mukaana wange, kuduuka ngwenyere musaza, kunangwa uduuki kuva na hango hoho mwene. 2Wizulizi ndi mundu uyu uwa uyinziyange harara na vakana veve, aveeye mwiko wiitu. Kalunu hulira! Ahulaa kandi yilula vuswage vudiku vwa lero koloze. 3Kunangwa wisingi, ma wivake maguta; kandi wiviki zinguvu zizio zindahi; ma uzie koloze aha ahuuliraa niyiiluula vuswage, utelolekiza kuye akumanye mba, kuduuka lwa vamala kulia nokunwa. 4Ove nagiligali kumanyiriza ahagona. Inyima wokogona, ulazia ho, uvimbuli virenge vivie, ma ogone ho. Naye alakovolera cha okola.”
5Ruzi yativura, “Ndakora goosi aga omboleeye.”
6Kunangwa Ruzi yasulunguta nazia koloze, naakora goosi kuli navizara weve ya muvooleraa. 7Lwa Boazi yaali niyakamara kulia nokunwa, mwoyo gwigwe gwasangala ligali. Yazia kogona inyima wikituumi chu vuswage. Kunangwa, Ruzi yanyenyeka makiriri nazia, naavimbula virenge via Boazi, ma naagona ho. 8Mu vudiku hagati, Boazi yegosa nagirung'ana mwene; kandi yaali niligenya konyoora mukali agoni havirenge vivie. 9Yamuteeva, “Ivi nivwaha?” Yativura inzi ni Ruzi mwami wange. Kigira oveeye mwiko wange wahimbi, oveeye nuvunyari kuniinda. Nuyanza ondete inzi kuva mukali woovo.
10Boazi yavoola, “Yahova akugasizi mukaana wange. Ololekizi uvulahi vwu kumaliriza yivu kuva vonene kuvita vwa mbiri, kigira siuziiyi kolonda avasoleri vayaayi mba; vave vadaka inoho avatugi. 11Na kalunu, mukaana wange, utatia mba. Ndakokolera goosi agoteeva, kigira avilidaala liosi lia vandu vange vamanya ivi oveeye mukali mulahi. 12Gaveeye agiligali ndi inzi mbeeye winyumba yinyu, navuzwa aveeyeho mulala wahimbi ligali kuvita inzi. 13Ogone hano vudiku vwa lero, navuzwa mugamba, kulamanya naava naanyala kokora ku ivi agadukanaa winyumba ya himbi akole, aheene yaho inzi ndakokolera, kuli Yahova aveeye mwoyo. Gona hano kuduuka mugamba.”
14Kunangwa Ruzi yagona havirenge via Boazi kuduuka mugamba. Navuzwa yavuka mugambazuri vulavu ni vukikiri kuvaho vwu mundu atamanyira wundi mba, kigira Boazi siyenya mundu woosi amanye ndi, mukali uyu yaali koloze mba. 15Boazi yamuvolera, “Leeta inguvu yooyo yukwiyuhira, na waale hasi.” Naye yaala na ya mugerera ahimbi zikilo sirini ziu vuswage, ma naamudwika. Ruzi yirana mu lidaala. 16Lwa Ruzi yaduuka yengo, navizara weve yamuteeva, “Gaali yo ndi ku ivi mukaana wange?”
Ruzi yamuvolera goosi aga Boazi yamukolera. 17“Yambeeye ahimbi zikilo sirini ziengano, ma navoora, ‘Utazia vuzwa amakono ameere ku navizara woovo mba.’ ”
18Naomi yavolera navizara weve, “Wikuziri vuzwa mukaana wange, kuduuka lwumanya kuli makuva yaga gekoleka. Boazi sialasosa kalunu mba kuduuka lwaduukiza amakuva yaga goosi.”
Boazi Yaleeta Ruzi
©Bible Society of Kenya, 2019