RUZI 1
1
Avandu Vinyumba ya Elimeleki vazia Moabu
1Mu madiku yago lwa vakalagi vaali nivamihaa, inzara yaali ho mu kivala cha Isiraeli. Mundu mulala wa Bezelehemu yi Vuyuda yazia komenya mu Kivala cha Moabu, harara nu mukali weve na vayaayi veve vaviri. 2Lieta lilie liali Elimeleki, mukali weve yalangwa Naomi, kandi vayaayi veve vaali Mahaloni na Kilioni. Vaali avihiiri ya Efurazi. Vazia mu kivala cha Moabu, nivamenya yo. 3Navuzwa Elimeleki, musaza wa Naomi, yakuza namuleka harara navayayi veve vaviri. 4Navo valeta avakali va Moabu, Oropa, na Ruzi. Inyima wi mihiga likomi, 5vombi, Mahaloni na Kilioni vaakuza, kunangwa Naomi yalekwa yeng'ine vugira musaza noho avayaayi.
Naomi na Ruzi Viirana Bezelehemu
6Lwa Naomi yahulira naveeye mu Moabu ndi, Yahova yaali nagasizi avandu veve kulwu kuvaha ligesa lilahi, yetegeka kutura mu Moabu harara na avanavizara veve. 7Vatanga logendo lwavo kwirana mu kivala chi Vuyuda.
8Navuzwa Naomi yavolera avanavizara veve vombi, “Mwirane yengo winyu, mumenye na avamama vinyu. Yahova amukolere vulahi, kuli mwakolera vulahi avakuzaa harara na inzi. 9Yahova amuhe ovososi; samulala ku munyi anyoore musaza wundi kandi ave na hango.”
Kunangwa Naomi yavavuusa naavasiivula. Navuzwa vatanga kulira vudinyu 10nivamuvoolera, “Awa! Kulirana harara nivi ku avandu vovo.”
11Navuzwa Naomi yavavolera, “Kuduuka mwirane yengo winyu vakana vange. Kigira ki mwenya munonde? Muganaganaa nyara kwivura avayaayi vandi avaazaa vave avasaza vinyu? 12Yirani yengo vakana vange. Inzi mbeeye mukeere ligali utanyala kuva nu musaza wundi kandi. Kali nimba ndakavooye mbeeye nilisuuvirizwa, manyoole musaza vudiku vwa lero, kandi nyoore avayaayi vandi, 13mwakalindi kuduuka lwa vaviruka? Mwakigayi koleetwa na vasaza vandi? Awa! Vakana vange, yago siganyalika mba. Muvererera ligali, kigira Yahova wayingirung'ana.”
14Ma vatanga lilira vudinyu kandi. Kunangwa Oropa yavusa navizara weve namusiivula, navuzwa Ruzi yahaanda kuye. 15Ma Naomi yavolera Ruzi, “Henza uyu muhalikwa woovo yirana ku vandu veve nuku vanyasaye veve. Ivi wirane olonde muhalikwa woovo.”
16Navuzwa Ruzi yativura, “Utaaniga ngoleke mba! Leka nzie harara nivi. Hoosi ha uzia inzi kandi ndazia ho; hoosi ha omenya, inzi ndamenya ho. Avandu vovo valava avandu vange, na Nyasaye woovo alava Nyasaye wange. 17Hoosi hukuzira, inzi ndakuzira ho, kandi niho ha ndiyavilwa. Yahova ambe amaduywa manene kuvita goosi, niiva ndaavukanywa niivi, nitali likuza lieng'ine.”
18Lwa Naomi yalora Ruzi usaaviyi kuzia harara naye, yaleka kovolerana naye.
19Na vombi vazia harara kuduuka lwa vaduuka Bezelehemu. Lwa vaduuka Bezelehemu, lidaala liosi lialangilira kigira yava, kandi avakali vilidaala vavoola, “Uyu ni Naomi!”
20Naye yavavolera, “Mutanangi, Naomi mba. Muunange, ‘Mara’#1:20 Mara: Mu Luheburaina livoora, “Kilulu.” kigira Nyasaye Wanyala Viosi okoli livamwoyo liange kuva lilulu. 21Ndaatula hano nimbeeye mutugi, navuzwa Yahova unziranyi umwere. Kigira ki muunange Naomi, lwa Yahova Wuvunyali amali kuundambiza, na Yahova Wuvunyali oleeti ikivi ku inzi?” 22Kunangwa Naomi yirana kutura Moabu harara na Ruzi navizara weve. Vaduuka Bezelehemu mu litanga lie ligesa ingano.
©Bible Society of Kenya, 2019