LIKUNULA 4
4
1Inyima wa yago, ndaali na malola gandi, ndaalora kiliango ni kiguliki mwigulu. Mwoyo gwa ndaali nimbuliyi mu litanga nigovolerana ninzi kuli kisiriva, gwavoola, “Yanigira yinu, nainzi ndakumanyia ivindu viduukana vikoleke lwinyima.” 2Nonoho ndiizura Roho, mwigulu yimwo, yaliho endeve yu uvwami mulala yikala kuyo. 3Mu moni mwimwe mwang'ereng'ana kuli ligina lia Jasiperi, na Karinelia. Kisaahi chi imbura chakumbiriza endeve yu uvwami chaali ni irangi yu uvulimu. 4Zindeve sirini na ine ziakumbiriza endeve yu uvwami yeyo. Ku zindeve zana yizio avakulundu sirini na ine viikara kuzio. Viviika zinguvu zindavu kandi zitaji zie zahabu ku mitwi jaavo. 5Ling'ereng'ana lio oloheni, imioyo ja avandu harara ni lihirigana lie zinguba, viahulirika kutura kondeve yu vwami yeyo. Izitaaya saba ziu muliru ziaka imbiri wendeve yu vwami. Izitaaya yizio ziveeye Roho saba va Nyasaye. 6Imbiri wendeve yu uvwami, chaali ho kindu chaloreka kuli inyanza yi gilasi, enengeru ligali kuvita ivilombe viveeye mwoyo vine viakumbiriza zimbega ziosi zie Endeve yu uvwami. Ivilombe yivio viali niviizura zimoni imbiri ni inyima. 7Kelombe chukutanga chaloreka kuli isimba kelombe chakaviri chaloreka kuli igiriki. Kelombe cha kavaga chaali nu vweni kuli vwu umundu. Kelombe chakane chaali kuli indizu ibulukaa. 8Vuli kilala ku velombe viveeye mwoyo vine yivio, chaali ni zimbaha sita, iziali ni ziafuuma mu zimoni; yigulu ni isi wi zimbaha. Mumbasu nuvudiku sivialekela kwimba nivivoola:
“Mutakatifu, Mutakatifu, Mutakatifu, ni Mwami Nyasaye Wuvunyali,
uwaali ho, oveeye ho, na uzaa.”
9Vuli ing'inga, ivilombe vine viveeye mwoyo zana yivio viambaa zinyimbu ziu kuhaana uvukumi, luyali ni lisandiza ku uyu uwikala ku Endeve yu vwami; omenya mihiga ni mihiga. 10Avakulundu sirini na ine yavo avagwizaa mamumama imbiri wa uyu wikala kondeve yu uvwami, kandi vasigamira uyu oveeye mwoyo mihiga ni mihiga. Vaviika izitaji ziavo hasi imbiri wendeve yu uvwami, ni vavoola,
11“Mwami oveeye Nyasaye wiitu!
Ivi uduukani konyoora uvukumi, luyali, ni izingulu.
Kigira ivi walomba ivindu viosi
kandi kigira uvulariri vuvwo, vialombwa,
kandi viahevwa ilimenya nu uvulamu.”
Ikitabu kandi Mwana wi Ligondi
Currently Selected:
LIKUNULA 4: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
