LIKUNULA 18

1Inyima wi vindu yivi, ndaalora engelosi yindi yi zinguru zinene niyiika kutura mwigulu, vukumi vong'ereng'ani ku lirova liosi. 2Kandi yahanzuka nu mwoyo gwi zinguru navoora, “Limali kugwa! Lidaala linene lia Babiloni limali kugwa ovomenyo vwa mademoni, kandi ugwiyi ovomenyo vwa amanyonyi madamanu na gukuvihiliriza goosi. 3Zihiiri ziosi ziahambikizwa kigira iwaini induru yo ovoheyi vwalio; Avami vilirova vakora cho voheyi nalio. Akiranyi kutura mu lirova liosi avagwiyi avatugi, kigira livula kwigalira ovoheyi vwavo.”

4Maku ndaahulira mwoyo gundi gutulaa mwigulu, nigovoora,

“Avandu vange, muturi mulio!

Mutava ni lisanga nalio muvwoni vwalio mba!

Mutava ni lisanga ku maduywa galio mba.

5Kigira uvwoni vwalio vuvungi kitumi kuduuka mwigulu,

kandi Nyasaye wizulizi uvudamanu vwalio.

6Mulikole kuli lia mukolera,

kandi mulituungi haali kaviri ku miyinzi josi ja liakora.

Kekombe cha liazuganyiraa mu iwaini induru,

mu mulizuganyiri mu haali kaviri.

7Kigira uvusaliri uvunyingi no ovovereri,

kuli uvukumi ni lieyaanziza lia liehaanira iliene.

Liamenya ni lievolera iliene:

‘Ku nzikaye hano, inzi mwamihi wi kikali!

Simbeeye mukunzakali mba

sindakamanyi ho ovovereri vutangiraa!’

8Kigira yaga, alakahaane amaduywa lidiku lilala,

agaveeye uvulwaye, likuza, ni liverera, ninzara.

Kandi alasaambwa nu muliru ligali;

kigira umukalagiraa ni Umwami Nyasaye,

niyie oveeye ni zinguru.”

9Avami vilirova, avaheyaa naye na avaamenyaa naye vugira kwiyigalira, liegomba liu umuviri, valasioma nu kulira ing'inga valilola mwoki gwi lisaambwa lie lidaala yilio. 10Vasingiyi ihale kigira vatiiyi kusanga mu uvusaliri vwalio. Vavoola, “O, vayaayi, vayaayi! Kivi keveeye ku lidaala linene lia Babiloni, Babiloni, lidaala lie zinguru! Kigira mu ing'inga onyooye mageri!”

11Avakiranyi vilirova valiliranga nu kulisiomera, kigira sihaveeyeho nu mundu unyala kugura ivindu viavo mba. 12Sihaveeyeho nu mundu ugula ivindu vie zahabu, ni viefeza, nivia magina malahi guvuguli mba. Ivindu viavo vie zinguvu zie katani indahi, ni vie zinguvu zinzesereru, ni vie zinzakanyu, kandi ivindu viavazwa vie misaala josi jifunya umwayu kandi iviju viosi vialombwa ku amiinu gi zinzogu, kandi iviju viosi nu musaala mulahi gwu vuguli ligali, ni viumugasa, ni viekivia, ni viamarimari, 13ni viomudalasini, ni vie iliki, ni viekimuli, ni viamaguta, ni viuvubani, ni iwaini, ni via maguta, ni viuvusie uvunyuki, ni via ingano, ni viezing'ombe, ni viamagondi, ni viezibarasi, ni viamagare gu uvulwani, ni via avatugwa, ni vie mioyo ja avandu. 14Avakiranyi vamuvolera, “Ivindu viosi ivilahi nu uvutugi vwosi vwu mwoyo gugwo gwenyaa gove navio, nu vwituliru vuvwo, vimali kogota ku ivi, na siulavinyoola kandi mba.”

15Avakiranyi vanyoola vutugi kutura mulikiranyia mu lidaala yilio, valasingira ihale kigira ubutii vwu uvusaliri vwalio nu kulira nu kusioma, 16“O, vayaayi! Lidaala linene yilio! Liali nilianala kwivika zinguvu zie katani, ziomusambarao ni izinzakanyu, nu kwikunika nivialombwa ni zahabu, amagina amalahi kandi zilulu! 17Mu isa ndala amali kogotiza vutugi vwosi. Avanene vosi vizimeri na aveelemaa mu meri vosi na vosi avanyoora limenya liavo kutura mu likiranyia munyanza, vasingira ihale.” 18Vaalira lwa valora mwoki gwi lisaambwa lialio, nivavoora; “Lidaala ki iliali kuli lidaala linene yili?” 19Viyuhira uluguchi ku imitwi jaavo, ni vaahanzuka, nivalira nu kusioma, nivavoora, “O, Vayaayi! Vayaayi! Kivi keveeye ku lidaala linene! Liveeye lidaala linene lia vosi avaveeye ni izimeri ku zinyanza vanyoola vutugi kigira uvuhinda vwalio. Kandi mu isa ndala vuzwa limali kogotiza ivindu viosi.”

20Ligulu musangare kulio, na vandu va Nyasaye avatumwa, na avaporofeti; kigira munyi vandu va Nyasaye kandi avatumwa, na avaporofeti. Nyasaye umali kulikalagira kigira ivindu via yamukolera.

21Maku engelosi yi zinguru yaginga ligina kuli ulugina lonene, ma naalilasa munyanza navoora, “Ivi lidaala linene lia Babiloni lilakalaswe vudinyu hasi kandi sililakaloleke mba. 22Imioyo ja avakubaa uvukana, na avimbaa zinyimbu, na avakubaa amarere, na avakubaa marere, si valakahuliri mu ivi mba. Avasiza vosi, ku vusiza vwosi, sivaliloleka mu ivi kandi mba. 23Uvulavu vwi itaya sivulaaka mu ivi kandi mba; mwoyo gwa osereywi, nu gwumwiha sigulihulirwa mu ivi kandi mba. Avakiranyi vovo vaali avanene ligali kuvita avilirova liosi. Ivi wagaada zihiiri ku lirova nu vukumu vuvwo.”

24Babiloni lianyora amageri kigira amasahi gavaporofeti na vandu va Nyasaye, Yee, amasahi ga avandu viitangwa ku lirova, galoleka mu lidaala linene.

Currently Selected:

LIKUNULA 18: LOGOOLI

Highlight

Copy

Compare