LIKUNULA 10

1Ndaalora engelosi yindi yi zinguru niyiika kutura mwigulu. Yaali nafumiiywi ni lilesi kandi kisaahi chi imbura chaali ku mutwi gwigwe. Mu moni mwimwe mwaka kuli liuva, ni vilenge vivie viali kuli zitiru ziu muliru. 2Yaali na katabu kekekeeke mu mukono gwigwe ni kakunuliywi yavika kerenge chiche kilungi kunyanza ne kemosi ku lirova. 3Yahanzuka nu mwoyo munene kuli gwi isimba ifuumaa. Lwa yaali ni yakahanzuka, zinguba saba ziamoloma nu mufuumu. 4Kandi lwi izinguba saba ziamoloma, ndaali ahimbi kong'oda. Navuzwa ndaahulira umwoyo gwatura mwigulu nigovoora, “Uviisi amakuva gi zinguba saba zivooye gatang'oda mba.”

5Engelosi ya ndaalora nisingi kunyanza nu ku lirova, yaginga mukono gwigwe umulungi mwigulu. 6Yisuha ku Nyasaye oveeye mwoyo mihiga ni mihiga, uwalomba ligulu ni lirova ninyanza ni vindu viosi viveeye mu. Engelosi oyo yavoola, “Lilindagira sililava ho kandi mba! 7Navuzwa lwe engelosi ya saba akubaa kisiriva chiche, lwene yilwo Nyasaye alakaduukizi lilohiza lilie liu muvwivisu kuli yalandizira vatumikiri veve avaporofeti.”

8Maku mwoyo gwa ndaali nimbuliyi kutura mwigulu, gwamoloma nigovoora, “Zia uvuguli katabu kakunuliywi mu mukono gwengelosi usingi kunyanza nuku lirova.”

9Ndaazia kongelosi oyo nimuvoolera yambe akatabu kakuzuzu zana. Naye yambolera, “Ukavuguli, na ukalie. Kalava akalulu munda mumwo, navuzwa munwa mumwo, kalava akanolu kuli uvwuki.”

10Ndaavugura akatabu kakuzuzu zana kutura mu mukono gwengelosi yeyo kandi ningalia. Kali akanolu kuli uvwuki mu munwa mwange, navuzwa lwa ndaamara kukamila, kagilungana nikagwa kalulu munda. 11Kunangwa ndavoolerwa, “Gakuduukiraa wilwaze amakuva ga Nyasaye ku avandu avanyingi, ku zihiiri zinyingi, ku zinimi zinyingi, kandi ku avami.”

Avalolekizi vaviri

Currently Selected:

LIKUNULA 10: LOGOOLI

Highlight

Copy

Compare