LIKUNULA 1

1Kitabu yiki keveeye livuula lia Yeso Kristo, lia Nyasaye yamuha, aduuki kumanyia avatumikiri veve, agazizaa kwekoleka vwangu. Yakola ivindu yivi vimanyikane ku mutumikiri weve Yohana lwa yatuma engelosi weve kuye. 2Yohana yilwaza likuva lia Nyasaye, kandi lilolekiza lia Yeso Kristo yavula, kandi umali kovora ivindu viosi via yalora. 3Aveeye nuvugasu mundu osoma amakuva gi kitabu yiki kandi vaveeye nuvugasu vandu vahulira makuva go voporofeti nokolonda ivindu viang'odwa mu kitabu yiki kigira ing'inga eveeye ahimbi.

Licheliza ku amakanisa saba

4Inzi Yohana, ng'odera amakanisa saba agaveeye mu losoma lwa Asia: Zimbavasi kandi mirembe vive ku munyi, kutura ku Nyasaye oveeye ho, kandi uwaali ho, kandi uzaa; kandi kutura ku Roho saba avaveeye imbiri wendeve yeeye yuvukumi; 5kandi kutura ku Yeso Kristo oveeye mulolekizi umusuuvirifu, wukutanga kusimugukizwa kutura mu vakuzu, kandi aveeye mwami wa avami vanene vi lirova.

Yakuyaanza kandi nakovoholola kutura muvwoni vwitu; na masahi geege 6kandi umali kokolombera uvwami vwa avasaalisi vanene kutumikira Nyasaye weve, kandi Baba weve. Uvukumi ni zinguru vive ku Yeso Kristo imihiga ni imihiga. Amini.

7Henza! Yazaa mu amalesi kandi avandu vosi valamulola, harara na yavo vosi avamwita. Avandu vosi vi lirova valakasiomere kuye kigira agavamukolera. Nindio galiva Amini.

8Yahova Nyasaye Wuvunyali avoora “Inzi mbeeye Alufa kandi Omega, wukutanga kandi wukumaliriza oveeyo, waaliho kandi uzaa.”

Amalola ga Kristo

9Inzi Yohana, amwavo winyu kandi kuli umulondi wa Yeso, mbeeye umusangi harara ni munyi, muliekuzira ku uvusaliri vuduuka ku yavo vosi avaveeye mu vwami vwa Nyasaye. Inzi ndaavoherwa mu kisulu cha Patimo kigira ndilwaza likuva lia Nyasaye kandi agiligali ga Yeso yambulira. 10Ndaali mu Roho ku lidiku liu Mwami, ni mbulira mwoyo munene inyima wange kuli kisiriva, 11nigovoora, “Ng'oda via ololaa mu kitabu yiki ma ukihiri mu amakanisa gaveeye mu madaala manene saba yaga: Efeso, Simarina, Perigamo, Ziatira, Saride Filadefia, na Laodikia.”

12Kunangwa, ndaagirung'ana nduuki kolola mundu wamoloma kuinzi; lwa ndiikivuka, ndaalora ivinaara vie zitaya saba vie zahabu. 13Hagati hi ivinaara vie zitaya, chaliho kindu chaloreka kuli umundu, niyiviiki iganza indambi iduuka ku zinduvatiru. Yaali kandi ni yevohi umusibi gwi izahabu ku kilitu chiche. 14Liisu liu ku mutwi gwigwe liali lilavu zwe, kuli likonza. Zimoni zizie ziali kuli olomemo lwu muliru. 15Zinduvatiru zie virenge vivie ziali kuli umugasa gusiyiywi mu muliru, mwoyo gwigwe gwahiligana kuli amazi manene. 16Mu mukono gwigwe umulungi yaali ni zing'ereng'ani saba. Kivavi ichuugi izimbega ziombi chatula mu munwa gwigwe. Na mu moni mwimwe mwang'ereng'ana kuli liuva mbasu hagati.

17Lwa ndaamulola, ndaagwa havirenge vivie kuli mukuzu. Yavika mukono gwigwe mulungi ku inzi, navoora, “Utatia mba! Mbeeye wukutanga kandi wu kumaliriza. 18Mbeeye oveeye mwoyo! Ndaali ni ndaakuza, navuzwa, kalunu mbeeye mwoyo mihiga ni mihiga. Mbeeye nu vunyali ku likuza kandi ku kivala chavakuzu. 19Kunangwa ng'oda ivindu via ololaa; ivindu viveeye ho, kandi ivindu viliva ho ulwi inyima. 20Yaga nigo amivisu gi zing'ereng'ani saba ziololaa mu mukono gwange umulungi na agaviswa gi ivinaara saba, izing'ereng'ani saba ni zingelosi zia amakanisa saba. Nivinaara saba viveeye amakanisa saba.

Ibarwa ku likanisa liveeye Efeso

Currently Selected:

LIKUNULA 1: LOGOOLI

Highlight

Copy

Compare