Zaburi 78
78
Nyasaye na avandu veve
1O, munyi avandu vange, muhuliri amigizu gange,
muhulirizi ligali icha mboraa.
2Nziza kutumikira zing'ano zio vogeri
ukwivaala agaviswa kutura ing'inga ya kale;
3ivindu via kuhuliyi kandi via kumanyi
ivindu via vaguuga viitu vakovolera.
4Sikulavivisa ku avana viitu mba;
kulavolera likula lizaa amakuva gi zinguru zia Yahova ni vikolwa vivie vinene,
kandi ivindu viokogenyia via mali kokora.
5Yahaana malago ku vandu va Isiraeli
kandi Lilaga ku visukululwi via Yakobo.
Yalaga avaguuga viitu vigizi avana vaavo amalago geege;
6kunangwa likula lilonda ku liduuki kwiga amalago yago,
kandi navo vaduuki kwigiza avana vaavo.
7Munzira yiyi yavo kandi vaduuki kuviika lisuuvira liavo mu Nyasaye,
kandi vavuli kwivilira vikolwa via yakola.
Navuzwa vahuliri malago geege kazozo.
8Sivalava kuli avaguuga vaavo mba,
avandu vi liebaala kandi avatahuliraa;
avi lisuuvira liavo mu Nyasaye siliali lidinyu kali hakuzu mba,
kandi sivali avasuuvirifu kuye zing'inga ziosi.
9Avandu va Efuraimu, vaali ni viugi viu vuta nimivano.
Viiruka ku lidiku liu vulwani.
10Sivagumira lilagana liavo na Nyasaye mba;
vasuura kuhulira lilago lilie.
11Vivilira icha yaali naakori,
vilolekizu vinene via vaali nivaloli Nyasaye naakoraa.
12Nyasaye yakola vilolekizu viokogenyia imbiri wa vaguuga vaavo mu
kereremo cha Zoani mu kivala cha Egebeti.
13Yavukanyia inyanza kandi naavavitizira hagati hayo;
yalomba amazi gasingiri vulungi kuli madigi.
14Yaavimilira ni lilesi ing'inga yu mbasu,
ing'inga yuvudiku yaavimilira nuvulavu vwu muliru.
15Yatanyia zinyanda mu changalangwe,
navaha amazi manyingi kutura musi mwilirova.
16Yakola otogera kusinuka kutura ku lwanda
kandi naakora amazi nigituluruka kuli mugera.
17Navuzwa vazizagilira kokora vudamanu imbiri wa Nyasaye,
kandi mu changalangwe, vibaara ku uyu Oveeye Igulu Ligali.
18Vasavira ligali kogeriza Nyasaye mu mioyo jaavo,
ku liteeva vahevwe viukulia kuzinguru via vakayirwa kulia.
19Vaamoloma ku Nyasaye vudamanu nivavoora,
“Nyasaye aveeye unyala kukuha viukulia muchangalangwe?
20Gaveeye agiligali ndi yaduya ulwanda,
na amazi gaasinuka nigituluka kuli mugera gwizuuyi.
Navuzwa aveeye unyala kandi kuhaana ku kunyi uvuchima
kandi ahaane ku vandu veve inyama?”
21Lwa Yahova yahulira makuva gaavo yaga, yavihilirwa ligali.
Yingilira avandu veve Isiraeli numuliru;
uvutima vwivwe ku vo vwameedeka;
22kigira sivali nilisuvira muye mba
kandi sivasuuvira ndi alavahonyia ligali mba.
23Navuzwa Nyasaye yamoloma ku malesi igulu,
kandi yalaga malesi giiguliki kuli miliango.
24Yavaha uvuswage kutura mwigulu,
kandi natuma imaana kuli imbura vaduuki kulia.
25Kunangwa valia viukulia vie zingelosi,
kandi Nyasaye yavaha viukulia viosi ivia venya.
26Nyasaye yakola kandi imbuza yu kudiviza yi Ivugwi kuhuuza,
kandi kuzinguru zizie, yaavuluganyia imbuza yi Isavaalu kuhuuza nizinguru;
27yavatumira amanyonyi manyingi kuli muyeke gwi inyanza.
28Yahova yakola amanyonyi yago gagwi hagati hokososa haavo,
kandi nakumbiriza amahema gaavo goosi.
29Kunangwa avandu valia inyama ni viiguta ligali
Nyasaye yavaha icha venya.
30Navuzwa lwa vaali nivakikiri kwigutiza lienya liavo,
kandi nivakilia inyama zana,
31Nyasaye yavavihilira ligali,
niyiita avasaza vaavo vizingulu ligali,
na avayaayi valahi ligali va Isiraeli.
32Kali ndio avandu vazizagilira kokora uvwoni,
kali naakora vilolekizu hagati haavo,
navuzwa sivasuuvira muye mba.
33Kunangwa yaaheriza madiku gaavo kuli mwika,
kandi livamwoyo liavo liahera nonoho kuturana nikivi.
34Lwa Nyasaye yitaa valala kuvo,
avandi vosi avatigara viirana kuye;
niviganira nukwanira kuye nu mwoyo gwosi.
35Vizuliza ndi Nyasaye yaali mukingi wavo,
ndi Nyasaye Wuvunyali yaazi kuvahonyia.
36Navuzwa amakuva gaavo gaali vuzwa ovovehi vwere;
na choasi cha vavoola sichali cha agiligali mba.
37Sivali avasuuvirifu kuye mba;
sivali avasuuvirifu ku lilagana liavo naye mba.
38Navuzwa Nyasaye yavererela avandu veve ligali.
Yavasamiha uvwoni vwavo kandi siyavadiviza mba.
Zing'inga zinyingi yigalira uvutima vwivwe vuvuli kutura,
kandi siyaleka uvululu vwivwe vwosi vuduuki kuvo mba.
39Yizuliza ndi yava vaveeye vuzwa avandu avilikuza.
Vaveeye vuzwa kuli mwika guhuzaa ma gogota vugira.
40Vibaara kuye ligali haali kanyingi mwigendanyama;
vamuveereriza haali kanyingi mu changalangwe!
41Vageriza Nyasaye kase na kase,
Nivaleeta vuzunu vululu ku Nyasaye Mutakatifu wa Isiraeli.
42Vivilira zinguru zizie zinene,
kandi vivilira lidiku lia yavahonyia kutura ku vasigu vaavo,
43naakora vikolwa vivie vinene ligali nivilolekizu vinene
mu kereremo cha Zoani mu kivala cha Egebeti.
44Yaagirung'anyia migera kugwa masahi,
na vandu va Egebeti sivali namazi gu kunwa mba.
45Yatuma ziinji hagati haavo,
iziavasaliriza vululu ligali,
na amakere agononyia kivala chavo.
46Yatuma zisigi kulia vitagwa viavo
nukwononyia milimi jaavo.
47Yononyia milimi ji mizabibu jaavo niimbura ya magina;
yita misaala jaavo jamakuyu nuvukindu vonene.
48Yita zing'ombe ziavo niimbura ya magina,
kandi yita viayo via magondi gaavo noloheni.
49Yaleka uvutima vwivwe vululu,
livihiliriza, uvudinyu ni kivi viduuki kuvo,
kuli muganda gwigwe gwi zingelosi gwukudiviza.
50Siyigalira uvutima vwivwe mba,
anoho kohonyia livamwoyo liavo kutura mu likuza mba,
navuzwa yaviita nuvulwaye vudamanu ligali.
51Yita avayaayi vukutanga kwivulwa
mu vuli inyumba ya vandu va Egebeti.
52Maku, yimilira avandu veve nivatura kuli mwayi wa magondi,
kandi naavimilira kuvitira mu changalangwe.
53Yaavimilira mu mirembe vulahi, na sivaatia mba;
navuzwa inyanza yaza nikunika avasigu vaavo.
54Nyasaye yavaleeta mu kivala chiche kitakatifu,
ku kiguru cha oyo mwene yaguuta.
55Yakunga zihiiri ziamenyaa mu imbiri wavo;
yagavulira zihiiri zia Isiraeli kivala yicho keve miandu javo,
kandi na haanaa zinyumba ziavo ku vandu veve Isiraeli vamenye mu.
56Navuzwa avandu va Isiraeli vibaara ku Nyasaye Wuvunyali,
kandi nivamugeriza.
Sivahulira malago geege mba.
57Navuzwa vaali avibaali kandi avataveeye vasuuvirifu kuli vaguuga vaavo.
Vaali avatasuuvirwa kuli muvano gwu vuta vwavedeka.
58Vaavihiliriza Nyasaye nuvwaali vwavo vwu kusigamira misambwa,
kandi vamukendekiza nivifananyi viavazwa viavo.
59Nyasaye yasinyika lwa yalora vindu yivi ligali;
Kunangwa yasura avandu veve Isiraeli.
60Yaleka lihema lilie ha Shilo,
hango ha yaali namenyi hagati hiitu.
61Yavugilira avasigu viitu vagumiri Lisandugu lie Lilagana;
kelolero chi zinguru kandi chu vukumi vwivwe.
62Yavihilira avandu veve,
kandi navaleka viitwi navasigu vaavo.
63Kigira avasoleri viitirwa mu vulwani,
na vakaana sivali na vasaza vavaleeta mba.
64Avasaalisi vaavo viitwa nikivavi,
na avakunzakali vaavo sivali vanyara kusioma mba.
65Mu limalirika Yahova yavuka kuli utulaa mu zindoolo.
Yaali kuli mundu wizingulu uhanzuka kigira iwaini ya yaali nanweye.
66Yakunga avasigu veve naviiranyia inyima.
Yavavika mu zisoni zie liguutwa lie mihiga ni mihiga.
67Navuzwa yasura visukululwi via Josefu;
siyaatovola ihiiri ya Efuraimu mba.
68Mu vogono yivwo, yatovola ihiiri ya Yuda,
kandi natovora kiguru cha Ziyoni,
havundu ha yaayanza ligali.
69Yumbaka ahene yaho Litembeli lilie kuli hango hehe mwigulu.
Yalilomba lidinye kuli lirova liayasingiriza kuhindira mihiga ni mihiga.
70Yahova Nyasaye yatovola mutumikiri weve Daudi;
naamutuliza ku miyinzi ju vwayi vwa magondi,
71kutura ku miyinzi jukwaya magondi;
kandi yamukola ave mwami wa Isiraeli
umwayi wa vandu va Nyasaye.
72Daudi yavalinda nu vusuuvirifu vwu mwoyo gwigwe gwosi.
Kandi yaavimilira vulahi novogeri vonene ligali.
©Bible Society of Kenya, 2019