Zaburi 76
76
Nyasaye Aveeye Muguuti
1Nyasaye yamanyikana mu kivala chi Ivuyuda;
lieta lilie liveeye nu luyali ligali mu Isiraeli.
2Yakola Jerusalemi; kuva hango hehe.
Amenyaa mu kiguru cha Ziyoni.
3Hazana yaho yavunanyia mivano juvuta ja vasigu.
Yavunanyia zinguva ni vivavi viavo,
yee, kandi viugi viavo viosi.
4O, Nyasaye, ivi oveeye wuvukumi ligali!
Ivi oveeye kuli umwami munene,
wiranaa kutura mu vigulu umwa waguutira avasigu vovo.
5Avasikari valuviliri vaavo vamali kulanya viosi via vaali navio,
na kalunu vosi vaakuzi;
zinguru ziavo ziosi ziali hazwa.
6O, Nyasaye wa Yakobo,
lwa wavatiihiza zibarasi na vahiri vazio vaagwa hasi nivakuza.
7Navuzwa, ivi O, Yahova, utiivwa na vosi.
Nivwaha unyala kusingira imbiri woovo kukalagirwa,
lwa oveeye nu vutima?
8Ivi walomba likalaga liilio limanyikane kutura mwigulu;
vosi avamenyi ku lirova vaali nuvuti vonene kandi vachiring'ana ligali.
9Wasingira kuhaana likalaga,
okohonyia vosi avadambizwa ku lirova.
10Ivi okolaa avandu vu vutima kukwizominya ligali;
yavo avavura kukuzira muvulwani, valizuliza ing'inga ya masavo googo manene.
11Muhaane ku Yahova, Nyasaye winyu icha mwalagana naye;
muleete vihaanwa kuye, munyi mwosi zihiiri ziahimbi ku uyu wukutivwa.
12Agehizaa vayaayi va avami vigingiraa,
kandi atihizaa avami vanene ligali.
©Bible Society of Kenya, 2019