Zaburi 2
2
Mwami mutovole wa Nyasaye
1Kigira ki vandu avizihiiri valohiza kwibaala?
Kigira ki avandu valomba zing'anagani zia vuzwa?
2Avami vi lirova vibaara vene.
Avamihi vaavo valomba zing'anagani mu vwivisu ukusuula Yahova Nyasaye
Wuvunyali Viosi harara nu mwami mutovole weve.
3Vavoola, “Gendi kwevoholole kutura mu liamiifa liavo;
gendi kusiuvi ihale minyororo jaavo!”
4Yahova Nyasaye uwikala igulu mwigulu asekeliza
kandi avakolera kehenyahenye.
5Maku aviganihizaa mu vutima vwivwe
nukuvatiihiza mu livihirirwa lilie.
6Yahova avoora, “Mali kwamiihiza mwami wandatovola,
ku Ziyoni, kiguru change kitakatifu.”
7Mwami avoora, “Ndalandiza aga
Yahova Nyasaye Wuvunyali yambolera,
‘Ive oveeye mwana wange muyaayi;
kalunu inzi mali kugwa baba woovo.
8Ondeeve, na inzi ndakuha zihiiri ziosi
ni vindu vie lirova liosi kuva iviivio.
9Ulavatanyia nimbimbu yikivia;
ulavaduvulanyia mu vidonye kuli inyingu yumulongi.’ ”
10Kalunu munyi avami, mutumikiri ovogeri;
muhulirizi lieganihiza yili,
O, munyi avamihi vilirova:
11Mutumikiri Yahova nuvuti;
mumutumikiri nilidegera;
12mudegere nukumwinamira gase uvutima vwivwe vulaaka,
na munyi mukuzi vwangu.
Vaveeye nuvugasu yavo vosi avanyagura kuye vanyoore likingwa.
©Bible Society of Kenya, 2019