ZING'ANO 3
3
Amigizu ku Vasoleri
1Mwana wange, utivilira miigizu gange mba. Ing'inga yoosi wizulizi agangovoolera okole. 2Amigizu gange galakokola uhindiri kandi ove ni limenya lie linyola linyingi. 3Utaleka vohocha kandi vusuuvirifu mba. Uvivohe muligoti liilio kandi ugang'ode mu mwoyo gugwo. 4Niiva ulakola yaga, ulayaanziza Nyasaye harara na vandu.
5Usuuviri Yahova nu mwoyo gugwo gwosi. Utasuvira zing'anagani zizio mba. 6Wizulizi Yahova mu vindu viosi viokolaa, kandi alakumanyia inzira inungi. 7Utaganagana oveeye mugeri mba, utie Yahova kandi utakola uvudamanu mba. 8Niiva ulakola ndio, lulava kuli ulunyasi lulahi olohonyia zingwagu kandi olososizaa uvuzunu vuvwo. 9Uhaane luyali ku Yahova nu kumuhaanira kihanwa kilahi kutura kuviamo viosi viu mulimi gwugwo 10Niiva ulakola ndio viage vivio vilizula vuswage kandi ulanyora iwaini inyingi.
11Mwana wange, lwa Yahova ahaanaa miigizu ku ivi ugahulirizi kandi ugavuguri gave kuli lieganihiza. 12Yahova ahaanaa mageri ku yavo avayaanzaa, kuli baba ahaanaa amageri ku mwana wayanza. 13Aveeye nuvuyanzi mundu woosi onyoora ovogeri kandi limanyia. 14Vukala vwalio voveeye vunyingi kuvita vukala vonyoolekaa mu ifeza, voveeye novokonyi kuivi kuvita izahabu. 15Ovogeri voveeye nuvukara kuvita amagina guvuguli, sikeveeye ho kindu ichawegomba kinyala koleng'anywa navwo mba. 16Ovogeri vuhaana lihindira linyingi kuli vutugi kandi luyali. 17Ovogeri volomba limenya liilio kuva nuvuyanzi, kandi vukwimiliraa mu mirembe. 18Yavo avanyoora ovogeri vaveeye nuvuyanzi, kigira ovogeri vulavaha livamwoyo.
19Yahova yalomba lirova novogeri vwivwe.
Mulimanyiriza lilie yaviikaho ligulu.
20Vogeri vwivwe vwakola migera nigigenda kandi malesi nigaleeta imbura ku kivala.
21Mwana wange, udinyi kovogeri vuvwu kandi limanya liu musi utalileka mba. 22Lilakuha livamwoyo lilahi kandi liu kuyaanziza. 23Ulagenda nimirembe kunzira yooyo kandi siulikigatara mba. 24Siulatia lwa uzia kogona mba, ulagona vulahi ligali mu vudiku vwosi. 25Si ulava ni lihenda mwoyo kigira ikivi kiiza vwangu mba, kuli kiihi kiiza ku vandu vachamu. 26Yahova alakukinga, sialakoleka ugwi mu mutego mba.
27Okonye yavo venya vokonyi lwa oveeye nu vunyali. 28Utavoolera mutende wowo alindi kuduuka mugamba niiva unyala kumukonya lwene yilwo mba. 29Utalohiza kindu choosi kinyala kusaliriza mutende woovo omenyi himbi nivi kandi wakusuuvira mba. 30Utahangalizana nu mundu woosi vugira kivuni, niiva siyakusalirizaa mba. 31Utava ne mbodoka na vandu vikirage anoho kokora kuli yavo mba. 32Kigira Yahova adunyiraa vandu vakora vudamanu. Navuzwa yayisuuviriza kigira valungi veve. 33Yahova kilaamo kuzinyumba zia vandu vakora vuchamu, navuzwa agasizaa zinyumba zia vandu vaveeye avalungi. 34Yahova achayaa vandu vaveeye ni lielola, navuzwa ayanziliraa yavo avegehizaa kuye. 35Avandu vageri valanyora ilizominywa liuluyali, navuzwa avasiru valanyora zisoni.
©Bible Society of Kenya, 2019