ZING'ANO 1
1
Kivuni Chi Zing'ano
1Yizi ni zing'ano zia Solomoni mwami wa Isiraeli, muyaayi wa Daudi.
2Zing'ano yizi niziokokonya vandu kuva ni limanyiriza vogeri, liegiza lilahi kandi kumanyiriza zing'ano zia makuva gu musi. 3Zinyala kukwigiza kuli unyala komenya novogeri, kandi kuli unyala kuva musuuvirifu kandi wi liiva liduukiru, mulungi kandi liiva liduukilu. 4Zinyala kokora mundu musiru kuva mugeri kandi zie liegiza vasoleri kuva vovokonyi. 5Zing'ano yizi zinyala komeeda umundu wi limanya ovogeri kandi amigizu, 6kunangwa aduuki kumanyiriza vivuni viaviswa viu musi vie zing'ano kandi gaturaa ku vandu vovogeri vatangia.
Miigizu ku Vasoleri
7Liitia Yahova liveeye litanga lio vogeri, navuzwa avasiru vachaya ovogeri kandi vasuura kwiga amigizu.
8Mwana wange, huliriza amigizu ga baba woovo na mama woovo. 9Amigizu gaavo galakokola ove mulahi kuli igudwa ku mutwi gugwo kandi amadongolo mu ligoti liilio gakokola kuva ni ligondo lilahi.
10Mwana wange, lwa voni vakogeriza utavugilira mba. 11Niiva valavoora, “Hamba kuzie kogoneka mundu na kumwiti! Genda kuzie kwingilira vandu vataveeye nimbala. 12Vanyara kuva mwoyo kandi valamu lwakuvanyoola, navuzwa valava vakuzu lwa kuva nikwakayinzira ku vo. 13Kulakanyoole vutugi vwi zing'ano ziosi kandi kulakizulizi mu zinyumba zietu vilaanye! 14Hamba uhambane ni kunyi, na kulavugula viosi viakwiva.”
15Mwana wange, utahambana na vandu kuli yava mba. Welehe kuvo. 16Vaveeye vwangu mu likora uvudamanu. Vuli kazozo vetegeki kwita. 17Si voveeye vulahi kotega mutego lwi linyonyi liawenyaa kugumira nililoraa mba; 18navuzwa, avandu kuli yava vetegekeraa mitego aveene, mitego jaza giviiti. 19Linuura kazozo lidivizaa livamwoyo liu munuri. Yaga nigo gakolekaa ku mundu woosi omenya mu liiva liu vunuuri.
Lieganihiza kigira kusuura ovogeri
20Huliriza! Ovogeri vulangiliraa mu zinzira kandi havundu hoosi mu viitu. 21Vulangiliraa vudinyu ligali ha vandu vavuganira.
22“Vandu vasiru! Mulava avasiru kuduuka ing'inga ki? Mulasangalira kokolera ovegeri kehenyahenye kuduuka ing'inga ki? Muliiga ing'inga ki? 23Muhuliri lieganihiza liange. Inzi ndahaana zing'anagani zindahi ku munyi, kandi ndamuha vogeri vwange. 24Inzi mali kulanga munyi kuza ku inzi, navuzwa si mwenya kuhulira mba. Mali kuhaana ku munyi mageri, navuzwa simuhuliyi mba. 25Mumali kusura miigizu gange, kandi si muveeye ni livugilira lieganihiza liange mba. 26Kunangwa lwa muduuka mu vudinyu, inzi ndamusekeriza. Ndamukolera kehenyahenye lwi litihiza liduka ku munyi, 27Lwi kivi kiduukaa ku munyi kuli kiihi nokoleta vukindu vwi litihiza liu vudinyu, mulava mu vusaliri kandi mu vuzunu. 28Maku mulakanzaniri, navuzwa si ndakamutivuliri mba. Mulakanyenye havundu hoosi navuzwa si mulakanyoole mba. 29Munyi mwasuura ovogeri, kandi mwasuura kutia Yahova. 30Si mwenya kuhulira lieganihiza liange anoho amigizu gange lwa ndamwigiza mba. 31Kunangwa mulakanyoole mageri kolondekana na gamuduukira kandi mulasalira kolondekana ni vikolwa vienyu. 32Avandu vasiru vakuza kigira vasuura ovogeri, na vayingu vadivaa kigira liesuuviriza liavo. 33Navuzwa oyo umbuliriza alamenya mu likingwa. Alava mu mirembe vugira litihizwa liu vudamanu vwosi.”
©Bible Society of Kenya, 2019