VAFILIPI 3

1Mulimala, avaamitu vange, musangare mu Mwami. Sivoveeye uvudinyu ku inzi ukwirana kumung'odera ivindu vilala viere, navuzwa vwakaveeye vulahi ku munyi, niiva inzi ngola ndio. 2Mugerihi ku yavo avakolaa vindu vidamanu, vaveeye ku zimbwa, avandu vavoola kuduuka yavo vakalage imiviri jaavo. 3Avandu vakevwa mugiligali ni kunyi kigira ni kunyi avasigamiraa Nyasaye mu Roho kandi avakusangalaa mu ilihambanywa lietu ku Kristo Yeso. Kandi kunyi sikuviikaa ilisuuvira mu likevwa mba. 4Kali nzi nyara kuviika lisuuvira liange mu vindu viu muviri kuli yivi. Niiva koveeye nu umundu uganaganaa ndi anyala kusuuvira mu vindu vie chova, inzi nyara kuva ni kivuni ekenene kuganagana ndio kuvita umwene oyo. 5Inzi ndaakevwa ku lidiku lia munane inyima wi liivulwa liange. Mbeeye wi kisukururwi cha Isiraeli ku liivulwa, wi ihiiri ya Benjamini, Muheburaina wiligali. Kolondekana ni Lilaga, inzi ndaali Mufarisayo, 6kandi ndaali nu uvugulu mu lidambiza likanisa ligali neembodoka. Kolondekana ni imiima ju vulungi vwi Lilaga, inzi sindanyoolwa ku nimbala kali hakuzu mba. 7Navuzwa ku viosi iviali vinyala kuva viu uvukala ku inzi, kalunu mbivalizaa kuva iligotiza kigira Kristo. 8Yee, inzi ligali mbalizaa ivindu viosi kuva asara vuzwa kigira keveeye ho ikilahi ligali, nacho ni kumanya Kristo Yeso Mwami wange. Inzi ndasiuva vindu viosi kigira Kristo, mbalizaa ivindu yivi viosi kuva amandu vuzwa kunangwa nduhi nduuki konyoora Kristo. 9Kandi nduuki kuhambanywa naye ligali. Inzi simbeeye nu vulungi vwange umwene, yivwo ovonyoleka ku lilonda Lilaga. Inzi kalunu mbeeye nu vulungi uvuhaanwa kuvitira mu lisuuvira mu Kristo. Uvulungi vuturaa ku Nyasaye kandi uvweledaa ku lisuuvira. 10Icha inzi nyenya ku viosi ni kumanya Kristo, no kolola izingulu zie ilisimuguka lilie, nduuki kusanga mu uvusaliri vwivwe, nu kuvwa kuli oyo mu likuza lilie, 11mu lisuuvirizwa ndi inzi mwene ndakasimugukizwi kutura mu vakuzu na kuduuka ku livamwoyo litahera mba.

Kunyagula kuduuka ku Liguuta

12Simbolanga ndi inzi ndaamara kuguuta, anoho mali kokolwa umudukiru ligali mba. Nzidinyirizaa ligali kuzia imbiri kunangwa nduuki ku kivuni kandi nyoore ikihaanwa yicho ichagira Kristo Yeso niyaangunzira. 13Avaamitu vange, sinzevoola inzi mwene mali konyoora itaji yeyo mba. Navuzwa ngolaa kindu kilala vuzwa. Inzi nyenya kwivilira ivindu viavita kandi iviveeye inyima, nu kwidinyiriza ligali nduhi nduuki ku vindu viveeye imbiri. 14Kunangwa inzi nyagura zimbiru vulungi kuduuka ahukutwekizira no okonyora itaji yi liguuta eveeye lilangwa lia Nyasaye kuvitira mu Kristo Yeso, kuduuka ku livamwoyo lie igulu.

15Kunyi kwosi avakoveeye avadukiru mu Roho mu liiva liu Vukristayo, gakuduukiraa kusingiri vudinyu mu liganagana lilala liere kuli ndio. Navuzwa niiva avalala ku munyi valaganagana lugano, Nyasaye alamuvuulira ikindu zana yicho. 16Leki komenye vuzwa mu amalago malala meere aga kwa gumira kutura yilwo kuduuka lero.

17Avaamitu vange, muzizagiliri mu kokora kuli inzi ngolaa. Muhenze ligali ku yavo avalondaa liiva lirungi lia kwamuha. 18Ndaamara kumuvolera amakuva gaavo haali kanyingi ulwimbiri, kandi kali kalunu nziraniraa kumuvolera na amaliga: vaveeye ho na avandu avanyingi avaveeye avasigu vu musalaba gwa Kristo. 19Keheri cha avandu yava keveeye ilidivizwa, kigira nyasaye wavo ni lienya lie imiviri jaavo, kandi vasangalira vindu viavenyekaa vave ni zisoni navio. Zing'anagani ziavo ziveeye vuzwa ku vindu vie lirova yili. 20Nitali, kunyi, koveeye avuluhia lwu mwigulu, kandi kulindiliraa Umuhonyi wiitu, Mwami Yeso Kristo, ni liegomba linene yaaze kutura mwigulu. 21Alakagirung'anyie imiviri jietu midedekere yiji nukujikola kuva kuli umuviri gwigwe umwene gwu vukumi; Alakatumikiri zinguru yizio koleta ivindu viosi isi wu vwamihi vwivwe.

Amigizu

Currently Selected:

VAFILIPI 3: LOGOOLI

Highlight

Copy

Compare