LIVALIZA 34
34
Zinzako zie Kivala cha Kanaani
1Yahova yavolera Musa ahaane 2malago yaga ku vandu va Isiraeli: “Lwa mwingila mu kivala cha Kanaani, kivala cha inzi mbana ku munyi, zinzako zie kivala chiinyu zilava kulindi: 3Lwako lwi isavaalu lulisunda kutura muchangalangwe cha Zini kuvitira ku lwako lwa Edomu. Lulatangila Ivugwi ma lutwekele Isavaalu winyanza yi Jumbi.” 4Maku lulazia Isavaalu kuduuka Akirabimu na lulazizagilira kuvitira Zini kuzia Isavaalu wa Kadeshi Barinea. Maku lulazia Imadioli wi Ivaale kuzia Hazari Adari kuduuka Luzi Azimoni, 5lulagirung'ana kuzia ku lovega lwi livona ku lwako lwa Egebeti na lulamalilikila kunyanza ya Meditareniani.
6“Lwako lwimadioli lulava inyanza ya Meditareniani.
7“Lwako lwi Ivaale lulatula kunyanza ya Meditareniani kuduuka ku kiguru cha Hori; 8kutura hene yaho luladuuka Hamazi. Lulazizagilira kuzia Zedadi 9kuduuka Zifuroni, ma luduuki ha Hazari Enani.
10“Lwako lwi Ivugwi lulava kutura Hazari Enani kuzia Shefami. 11Maku lulazia Isavaalu kuduuka Habeli Ivugwi wa Aini, kandi kuduuka ku vigulu vie Ivugwi wi kivala keveeye ahimbi ninyanza ya Galilaya 12kandi lulazia Isavaalu ku mugera gwa Jorodani kuduuka kunyanza yi Ijumbi.
“Yizi zilava zinzako zine zie kivala chiinyu.”
13Kunangwa Musa yavolera vandu va Isiraeli, yiki nicho kivala cha mulinyoola mulikuba zikula kivala cha Yahova amali kuhaana ku zihiiri tisa ni inusu. 14Zihiiri zia Rubeni na Gadi kandi inusu yi Ivugwi wa Manase, vamali konyoora miandu jaavo, 15kolovega lwi Ivugwi wu mugera gwa Jorodani engeleka wa Jeriko.
Miyinzi ja Vimiliri Kugavura Kivala
16Yahova yavolera Musa, 17“Yaga na mita ga vasaza valigavula ku munyi kivala kuli miandu jinyu: Elieza musaalisi harara na Joshua muyaayi wa Nuni valagavulanyia kivala ku vandu. 18Uvuguli mwimiliri mulala kutura mu vuli hiiri avakonyane kugavura kivala.” 19Yaga nigo amita ga vandu vi ihiiri ya Yuda, Kalebu muyaayi wa Jefune, 20Wihiiri yu muyaayi wa Simioni, Shemueli muyaayi wa Amihudi. 21Ihiiri ya Benjamini Elidadi, muyaayi wa Kisiloni 22Ihiiri ya vayaayi va Dani, mwimiliri ni Buki muyaayi wa Jogili. 23Kuvayaayi va Josefu ihiiri ya Manase mwimiliri yaali Hanieli muyaayi wa Efodi. 24Ihiiri ya vayaayi va Efuraimu mwimiliri ni Kemueli muyaayi wa Shifutani. 25Ihiiri ya vayaayi va Zabuloni mwimiliri ni Elisafani muyaayi wa Parinaki. 26Ihiiri ya Isakari mwimiliri ni Palitieli muyaayi wa Azani. 27Ihiiri ya Asheri mwimiliri ni Ahihudi muyaayi wa Shelomi. 28Ihiiri ya Nafutali mwimiliri ni Fedaheli muyaayi wa Amihudi. 29Yava nivo avasaza va Yahova yalaga kugavura kivala kuli miandu ku vandu va Isiraeli mukivala cha Kanaani.
Currently Selected:
LIVALIZA 34: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
