LIVALIZA 30
30
Amalago Kigira Liesuuha
1Musa yahaana malago yaga ku vimiliri vi zihiiri zia vandu va Isiraeli.
2Lwu mundu alombaa lilagana kuhaana kindu ku Yahova anaho kwigaya ku kindu, sigamuduukira avunage lilagana lilie mba, navuzwa gamuduukira akole kindu choosi cha yavoola alakola.
3Lwu mukaana okemenyi munyumba ya baba weve alombaa lilagana kuhaana kindu ku Yahova naho kwigaya ku kindu, 4gamuduukira akole kindu choosi cha yisuha anaho cha yalaga niiva baba weve alavula kusuura lwa hurila makuva yaga. 5Navuzwa niiva baba weve alamugaya kutwekiza lilagana yili, sigamuduukira agakole mba. Yahova alamusamiiha kigira baba weve yamugaya.
6Niiva mukaana ukikiri kuzia ilukali alisuuha mulienya lilie mwene naho kuvula kuganagana anaho kolomba lilagana kwigaya ku kindu, maku azie lukali, 7gamuduukira akole vindu viosi via yisuha anaho via yalaga niiva musaza weve sialamugaya lwa hulira mba. 8Navuzwa niiva musaza weve alahulira ma mugaye kutwekiza liesuuha yili, sigamuduukira agakole mba. Yahova alamusamiiha.
9Mukunzakali anaho mukali wakungwa nu musaza weve gamuduukira atwekizi liesuuha liayalomba kandi lilagana liosi liayigaya ku kindu chalio.
10Niiva mukali waletwa alisuuha anaho alaga kwigaya kutura ku kindu, 11gamuduukira akole kindu choosi cha yisuha anaho chayalaga niiva musaza weve si alamugaya lwa hulira kuyaga. 12Navuzwa niiva musaza weve alamugaya kutwekiza liesuuha lilie, sigamuduukira akole mba. Yahova alamusamiiha kigira musaza weve yamugaya kutwekiza liesuuha lilie. 13Musaza weve aveeye nuvunyari kumuleka azizagiliri, anaho kumugaya kuzizagilira ni liesuuha anaho lilaga lia yaali nalombi. 14Navuzwa niiva musaza weve alahulira liesuuha yili, ku lidiku yili mave nakikiri kumugaya, kuduuka akole vuli kindu choosi chamali kwisuuha anaho kulaga. 15Navuzwa niiva alagaya liesuuha kuduuka anyoore amageri kigira avuli kutwekiza liesuuha yili.
16Yaga nigo malago ga Yahova yahaana ku Musa kolondekana ni liesuuha liayalomba na vakana vakikiri kuletwa, avakemenyi mu zinyumba zia vababa vaavo, naho mukali waletwa.
Currently Selected:
LIVALIZA 30: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
