NAHUMU 3

Amageri ku Nineve

1O, vayaayi, kivi keveeye ku lidaala liu vugadi kandi lilumindi!

Liizula vutugi vunyala kulanywa kandi kuvugulwa!

2Huliriza likinduka lie imbimbu!

Muliviti gwa magurudumu ga magare,

ligenda lie zibarasi,

litumagila lia magare gu vulwani.

3Avasaza vi zibarasi ziu vulwani vingilira,

vivavi na matimu vihemahemaa!

Miviri javakuzu jivungi kuli kitumi,

miviri minyingi ligali jitanyala kuvalizwa.

Avandu vagenda ni vikigitara kujo!

4Munyi avandu va Nineve,

muveeye vuzwa kuli amalaya mutumikiraa ovologi

nu vusigitiri kuyaanziza kandi kotega zihiiri.

5Yahova Wuvunyali avoora,

“Ndakahaane mageri ku munyi avandu va Nineve,

ndakamunavuuli na ndakaleke zihiiri

zilole viahonyo vienyu mu zisoni.

6Ndakamuchaye kandi ndakaleete vugundu ku munyi.

Avandu valakamuhenze nuvuti vunyingi.

7Yavo vosi avalimulola valakegose,

valakavoole, ‘Lidaala lia Nineve litigaye amangaye!

Nivwaha unyala kulivelerera?

Nivwaha unyala koleminya vandu valio mwoyo?’ ”

8Nineve liveeye lidaala lilahii kuvita Zebesi, Lidaala linene lia Egebeti? Lidaala yili liali kandi nu mugera gwalikingaa kuli lidiji: Mugera gwa Naili gwaali imbinga yalio. 9Lidaala yili liamiihaa Ezopia kandi Egebeti. Si haali ho ne kegero kuzinguru ziu vwamihi vwalio mba, lidaala lia Libia liali nu vuhambani vwalio. 10Navuzwa vandu va Zebesi vaahirwa mu vuhambe. Avana vaavo vaakuywa nivakuzira muvuli zikona zie zinzira. Aviimiliri valio avasaza vavugulwa nivavoheywe minyororo ni vagavulanyirwa hagati ku vasigu vaavo.

11Munyi avandu va Nineve, mulakahambiki! Mulakagelizi kwiluka kutura ku vasigu vinyu. 12Zimbinga zienyu ziosi zilakave kuli misaala ja makuyu amengu; nusungusa misaala yiji likuyu lialavunguluka mu munwa gwugwo! 13Avasikari vinyu vaveeye kuli avakali, kandi kivala chiinyu keveeye vugira likingwa imbiri wa vasigu vinyu. Muliru guladiviza miluguyu jihaana virivwa vienyu. 14Mudahe amazi manyingi kandi mwetegeke ku likumberizwa; mulombe zimbinga zive ni zinguru! Musienye lidohi, mulombe madafari, kandi mwetegekizi kindu cho kolongeraku. 15Kali mugerizi kuli munyala, mulasambwa kuduuka lwa mukuza, anaho mulitirwa mu vulwani. Muladivizwa kuli vitagwa viliviywi ni zisigi.

Munyi mwameedeka kuli zisigi. 16Avakiranyi vinyu vameedeka kuvita zing'ereng'ani ziumwigulu! Navuzwa kalunu vamali kuzia kuli zisigi ziburukaa ma zizia ihale. 17Aviimiliri vinyu vaveeye kuli kiduma cha madagala, na vanene vinyu vaveeye kuli kiduma chi zisigi ziveeye ku madiji mu lidiku liu vukindu. Navuzwa lwu muvasu guvalaa, ziburukaa ma zizia ihale. Siaveeyeho nu mundu umanyi wa ziziyi mba!

18Avami va Asiria, avamihi vinyu vamali kukuza, kandi avatumikiri vinyu vamali kukuza mihiga ni mihiga! Avandu vinyu vasalanyiywi ku vigulu. Siaveeyeho nu mundu unyala kuvavungiza kandi mba. 19Avulaho mundu unyala kohonyia lisalirizwa lienyu, kandi zingwagu zienyu sizinyala kohona mba. Avandu vosi avahulira makuva kigira lidivizwa lienyu, vakubagaa makono gaavo ni vasangara. Siaveeyeho numundu wahononoka kutura mu vusaliri yivu vutaveeye ne keheri mba.

Currently Selected:

NAHUMU 3: LOGOOLI

Highlight

Copy

Compare