LEVI 7

Kihanwa cha Mahiolo

1Yaga nigo malago ku vihaanwa via mahiolo, gaveeye matakatifu ligali. 2Kihanwa chia mahiolo kilasinzirwa Ivaale havundu hi vihaanwa viukusambwa visinzirwaa. Musaalisi aluuha masahi gacho ku zimbega zine ziosi ziu uvwali. 3Alahaana itinya yacho yoosi, itinya yu musembe kandi itinya yoosi eveeye ku vindu viu munda viosi, 4zimbigu ziombi, harara nitinya eveeye kuzio, eveeye himbi nikisindi, kandi ingudumani indahi. 5Musaalisi alavisaamba viosi kuvwaali kuli kihanwa chi chukulia ku Yahova. Keveeye kihanwa cha mahiolo. 6Musaza woosi kutura muzinyumba zia avasaalisi anyala kulia ku, navuzwa kuduuka kilivirwi havundu hatakatifu. Kigira keveeye kitakatifu ligali.

7Malago malala meere gaveeye ku vihaanwa viu uvwoni kandi ku vihaanwa via mahiolo. Inyama yiyi eveeye yu musaalisi uhaanaa kisiuviriru. 8Kesero chi kihanwa chu mundu woosi ava nahaana kuva kihanwa chukusambwa kilava chu musaalisi uva niyimiliyi muruka yigwo. 9Vuli kihanwa chuvuswage chuminyiywi mu mahiga anoho chakalangirwa ku kifuria, anoho kukisambiru keveeye chu musaalisi usingiliyi muruka zana; 10Navuzwa vihaanwa viosi viuvuswage vitadekeywi, niviva ni viazuganywa mu maguta anoho vusie vwumu viveeye via avasaalisi vinyumba ya Haruni; na gaduukanaa vavigavulane keleng'ani.

Vihaanwa vie Mirembe

11Yaga nigo malago galondekanaa ni vihaanwa vie mirembe viu mundu anyala kuhaana ku Yahova. 12Niiva mundu alahaana kihanwa yiki kuli kihanwa chi lisandiza ku Nyasaye, hene yaho, alahaana harara nu mutugu guhaanwa, kuli kisiuviriru mugadi gutaveeye mu na mamera uguzuganyiywi mu na maguta ga muzeituni, visikuti vivakiywi maguta ga muzeituni, anoho viabati vitaveeye mu namamera vivakiywi maguta ga muzeituni, anoho zikeki zialombwa ku vusie vunyuki zizuganyiywi mu namaguta ga muzeituni. 13Komeeda ku kihanwa chiche chi mirembe chi lisandiza, alahaana milaango ji migadi gizuganyiywi mu mamera. 14Alaleeta kedonye kilala ku vuli lugano lwu mugadi kuli kihanwa kidukiru ku Yahova. Kedonye chi kihanwa yicho kilava chu musaalisi uvugura masahi maguuha ku uvwali. 15Inyama yi kisiuviriru chi kihanwa chi mirembe ku lisandiza, kuduuka iliivwi ku lidiku zana liu mutugu yigwo gusiziywi; Ataleka kali kedonye kekekeeke kuyo kiduuki mugamba golondaku mba.

16Niiva mundu alaleeta kihanwa chi mirembe ku liduukiza lilagana lie liesuuha, anoho kihanwa chu vuyanzi vwi lilarira lilie mwene, kitaliivwa choosi lidiku lia keleteywe ku mba, navuzwa inyama yikisiuviliru yakava nitigaye, ilaliivwa lidiku lilonda ku. 17Inyama yoosi yakava nitigaye kuduuka ku lidiku lia kavaga ilasambwa. 18Niiva ku inyama yi kisiuviriru chiche ilaliivwa ku lidiku lia kavaga, Nyasaye sialavugilira kihanwa chiche mba. Kandi sikalavalizwa ku oyo ukihaani mba, kigira keveeye kidamanu. Oyo uva nalia kuinyama yeyo alava nilihiolo kandi alahevwa mageri. 19Niiva inyama yiyi iladiira ku kindu choosi keveeye kidamanu kolondekana ni miruka silaliivwa mba. Kuduuka isambwe nu muliru.

Mundu woosi oveeye mulungi kolondekana ni miruka anyala kulia inyama zana. 20Navuzwa mundu woosi utaveeye mulungi nalia kuinyama yi vihaanwa vie mirembe viveeye via Yahova, kuduuka atulizwi hagati havandu veve kigira siavalizwa kuva mundu wa Nyasaye mba. 21Kandi niiva mundu woosi adiira kindu kidamanu, anoho nivuva vudamanu vwu mundu, anoho inyama indamanu, anoho kindu choosi kidamanu nichukivihiliriza, ma alie ku inyama yi kihanwa chi mirembe cha Yahova, mundu uyu alatulizwa hagati ha vandu veve kandi sialavalizwa kuva mundu wa Nyasaye mba.

Itinya na Masahi Vitaliivwa mba

22Yahova yahaana ku Musa malago yaga 23kigira avandu va Isiraeli. Itinya yizing'ombe, magondi, anoho zimburi italiivwa mba. 24Itinya yi inyama ikuzi yene anoho yi inyama yindi yumbulimu yaakwita italiivwa mba; navuzwa inyala kutumikirwa ku muyinzi gundi gwosi. 25Mundu woosi uva nalia itinya yi inyama iva nihaaniwi kuli kihanwa chi chukulia ku Yahova, alatulizwa hagati ha vandu veve kandi sialavalizwa kuva mulala ku vandu va Nyasaye mba. 26Havundu hoosi ha avandu va Isiraeli vamenya, vatatumikira ku masahi ga manyonyi anoho masahi gi zinyama kuli chukulia mba. 27Mundu woosi uvunaga malago yaga alatulizwa hagati ha avandu veve kandi sialavalizwa kuva mulala ku avandu va Nyasaye mba.

28Yahova yahaana ku Musa malago yaga 29kulwa avandu va Isiraeli. Mundu uhaana kihanwa chi mirembe, kuduuka ahaane kedonye chacho kuli kihanwa kidukiru chulugano lwacho ku Yahova. 30Alakeleeta namakono geege mwene kuli kihanwa chi chukulia. Alaleeta itinya yi inyama zana harara ni kididimu chayo na akihaane kuli kihanwa chagimwa ku Yahova. 31Musaalisi alasambira itinya ku uvwali, navuzwa kididimu kilava cha avasaalisi. 32Kinama che kelenge kilungi chinyima kilahanwa kuli kihanwa kidukiru 33ku musaalisi uva nahaana masahi nitinya yi kihanwa chi mirembe. 34Kididimu keveeye kihanwa kidukiru kandi kinama kilungi chi inyama keveeye kihanwa kidukiru. Cha Yahova avuguyi kutura ku avandu va Isiraeli nukuhaana ku avasaalisi. Yiki nicho cha avandu va Isiraeli vaduukana vahane ku avasaalisi zinyinga ziosi.

35Yiki nicho kedonye chi chukulia kihanwa ku Yahova chaali chahaanwa ku Haruni harara na vayaayi veve ku lidiku lia vavakwa maguta, vatumikiri Yahova kuli avasaalisi. 36Ku lidiku lia vavakwa maguta, Yahova yalaga avandu va Isiraeli vahane ku avasaalisi kuli kidieli chavo cha vuli kazozo mu visukululwi viavo viosi.

37Yaga nigo malago gi vihaanwa viu kusambwa, vihaanwa viu vuswage, vihaanwa viu uvwoni, vihaanwa via mahiolo, vihaanwa viu kuvikilwa ku makono ni vihaanwa vie mirembe. 38Yahova yahaana ku Musa malago yaga ku kiguru cha Sinai muchangalangwe kulidiku lia Yalaga avandu va Isiraeli vahane vihaanwa viavo ku Yahova.

Currently Selected:

LEVI 7: LOGOOLI

Highlight

Copy