LEVI 25

Muhiga Gwa Saba

(Liz. 15:1-11)

1Yahova yavolera Musa ku Kiguru cha Sinai: 2avolere avandu va Isiraeli ndi. Lwa mwingira mu kivala change chamuhezaa, kivala kilalinda Lisabato liange. 3Mulataga milimi jenyu, muhalulira mizabibu nokuvungiza viamugesa ku mihiga sita. 4Navuzwa muhiga gwa saba gulava muhiga gwi lisosa liekivala, muhiga gwaviikwa ku makono kigira Lisabato liange. Mutataaga milimi jinyu kandi mutahalulira mizabibu jinyu mba. 5Kali mutagesi vuswage vomera vwene nivutatagiywi mba, kandi mutagesi makuyu gi mizabibu jinyu ja mutahaluriyi mba. Goveeye muhiga gwi Lisosa ligali. Kivala kuduuka keve nu muhiga gwi lisosa. 6Kali niiva milimi si jalimwa ing'inga yu muhiga yigwo, jilaamuha viukulia, avasaza na vakali vatugwa vinyu, avageni vamenya harara nimunyi 7mitugu jinyu, zinyama ziumbulimu iziveeye mumilimi jinyu. Ivindu viosi vituraa mumilimi jinyu vilaliivwa.

Muhiga gwi Lisaangala

8Mulavaliza mihiga ja masabato saba haali saba, josi jilava arubaini na tisa. 9Maku, ku lidiku lielikomi liu mweli gwa saba, Lidiku liu kusamiiha uvwoni, mutumi umundu akubi kisiriva mu kivala chienyu choosi. 10Munzira yiyi mulatakasa muhiga gwa amusini na mulandizi vovoholore ku avandu vosi vamenya mu kivala yicho. Mu muhiga yigu, ivindu viagulizwa viosi, vililanyirwa avaari vene vio militanga anoho visukululwi viavo, kandi umundu vosi uwaali naaguliziywi kuli mutugwa, alirana ku avandu vinyumba yeeye. Goveeye muhiga gwi lizuliza mihiga amusini. 11Umuhiga gwa amusini goveeye gwi lisangala lienyu. Mutataaga milimi mba kandi mutagesa vuswage vwamera vwene anoho kwagula makuyu gi mizabibu javula kosembelwa nokuhalulirwa mba. 12Muhiga gwosi gulava umutakatifu ku munyi. Mulalia vuzwa chukulia chi milimi jihana jiene.

13Mu muhiga yigu ivindu viosi viagulizwa kuduuka vilanyirwi umundu uwaali mwene vio mulitanga. 14Kunangwa, lwa mugulizira Muisiraeli wache milimi, anoho muguli milimi kutura kuvo, mutadambizani mba. 15Uvuguli volombwe kolondekana ku livaliza lie mihiga ju mulimi gunyala kwama viukulia inyima wu muhiga gwi lisosa. 16Niiva jiveeye mihiga minyingi uvuguli vulava igulu, navuzwa niiva jiveeye vuzwa mikekeeke, uvuguli vulava hasi ligali kigira kigulizwa keveeye viamo viu mulimi yigwo gunyala kwama. 17Mutagaada Avisiraeli vache mba; navuzwa mutie Inzi Yahova Nyasaye winyu.

Uvudinyu vwu muhiga gwa Saba

18Kunangwa mulalonda malago gange na miigizu geege goosi nukugakola na mulamenya nimirembe mukivala. 19Kivala zana kilaama makuyu na munyi mulava navio viosi viamwenyaa mulie kandi mulamenya mu mirembe.

20Navuzwa wundi alateeva chamulilia ing'inga yu muhiga gwa saba lwi milimi jitatagwa kandi makuyu gatageswa mba. 21Inzi ndagasiza kivala mu muhiga gwa sita kunangwa kiduuki kwama viukulia vitumika ku mihiga giviri. 22Lwa mutaaga milimi jinyu mu muhiga gwa munane, mulava nimukilia via mwagesa ing'inga yumuhiga gwa sita, kandi mulava ni viukulia vimuduuka, mulie kuduuka vitagwa via mutaaga muhiga yigwo vigeswa.

Liranyia Miandu

23Milimi jinyu jitagulizwa ku ligulizwa liemihiga ni mihiga mba; kigira kivala sikeveeye chiinyu mba; nichange, na munyi muveeye kuli avageni vuzwa avavugililangwa kukitumikira.

24Lwu mulimi gugulizwa, umundu uwaali ukutanga kugugula kuduuka gamanyikane.

25Niiva umundu wa Isiraeli alava mudaka, ma gamunigi kuguliza mulimi gwigwe, mwiko weve wa himbi ligali ave niye ugugula.

26Umundu utaveeye nu mwiko wahimbi unyala kugura agwilanyie, na lwinyima anyoore imiandu, anyala kugugula kandi. 27Mu makuva yaga, kuduuka atuungi ku umundu uwaali niyagugula mabese goosi ganyala kuduuka mitungu ji mihiga jitigala kuduuka muhiga gwi liranyirwa imiandu, lwanyala kwilanyia mulimi gwigwe muliiva liosi. 28Navuzwa nataveeye namabese gaduukaa kwirana kugura mulimi yigwo, gulatigala mu makono gu umundu wagugula kuduuka muhiga golonda ku gwi liranyirwa. Mu muhiga yigwo, gulilanywa ku umundu uwaali mwene gwo mulitanga.

29Niiva umundu alaguliza inyumba eveeye mu lidaala linene liavodong'anywa ku lidigi, avugilirwa kwirana kugugula mu ing'inga yu muhiga gwukutanga kutura lidiku lia yagulizwa. 30Navuzwa niiva sialirana kugigula mu muhiga yigwo, alagotiza vunyali vwu kwirana kugugula, na inyumba yiyi ilava umwandu gwi mihiga ni mihiga ju muguli uyu harara ni visukululwi vivie. Siliranywa mu muhiga gwi Liranyia mba. 31Navuzwa zinyumba mu madaala gatalombelwa ku lidigi zilava kuli milimi. Uwaali mwene gwo uwokutanga aveeye nuvunyari kwirana kuzigula, na ziduukanaa zilanywe mumuhiga gwiliranywa. 32Kali ndio ihiiri ya Levi eveeye nuvunyari kwirana kugura miandu jaavo jiveeye mu madaala manene gavaahevwa.

33Niiva inyumba mu lilala ku madaala yaga igulizwa nu umundu wi ihiiri ya Levi na siyirana kugulwa mba, kuduuka yiranyirwi mwene yo mu Muhiga gwu kwilanyia, kigira zinyumba zia avandu vi ihiiri ya Levi vaveeye nazio mu madaala manene gaavo ziveeye imiandu jaavo mihiga ni mihiga hagati ha avandu va Isiraeli. 34Navuzwa mulimi gwu kwayiza mu ugwavodong'ana madaala manene ga avandu vi ihiiri ya Levi sigulagulizwa kali hakuzu mba. Jiveeye imiandu jaavo mihiga ni mihiga.

Kwegobiza vadaka

35Niiva umundu wa Isiraeli wache omenyi himbi nivi naagwa mudaka, kandi avuli kwinyaliza mwene, kuduuka mumukonye; kuli munyala kokonya mugeni anoho mumenya, aduuki komenya nimunyi. 36Mutavugula madanyi anoho viambeti viulugano lwosi mba; navuzwa mutie Inzi Nyasaye na muleke umundu wa Isiraeli wache amenye nimunyi. 37Mutamwegobiza mabese munyolere ku viambeti mba na mutamugulizira chukulia munyolere ku vukara mba. 38Inzi mbeeye Mwami Nyasaye winyu wamutuliza mu kivala cha Egebeti, kunangwa nduuki kumuha kivala cha Kanaani kandi mbe Nyasaye winyu.

Livoholorwa lia Avatugwa

39Niiva umundu wa Isiraeli wache omenya himbi nimunyi alagwa mudaka ligali kali kuduuka yigulizi mwene ku munyi kuli mutugwa, mutaleka akole miyinzi jumutugwa mba. 40Alamenya nimunyi kuli mutumikiri wukutungwa kandi kuli mumenya, akutumikiri kuduuka muhiga golonda ku gwi liranywa. 41Hene yaho oyo harara na avana veve valatura ku munyi ma viirane ku avandu vinyumba yeeye kandi ave amwandu gwa vaguuga veve. 42Avandu va Isiraeli vaveeye vatugwa vange, kandi ndavatuliza mukivala cha Egebeti. Vatagulizwa mu vutugwa mba. 43Mutavamiiha nu vululu mba, navuzwa mutie Inzi Nyasaye winyu. 44Niiva mwenya vatugwa, kuduuka muvaguli kutura mu zihiiri ziveeye himbi ni munyi. 45Munyala kandi kugura avana va vageni vamenya hagati hinyu. Avana kuli yava aviivulirwa mu kivala chiinyu vanyara kuva imiandu jinyu; 46kandi munyala kuvaleka vave kuli imiandu ja avayaayi vinyu. Navuzwa mutamiihi nizinguru ku avandu va Isiraeli vache vinyu mba.

47Nigakava umugeni omenya harara nimunyi alagwa mutugi, lwu umundu wa Isiraeli wacho agwa mudaka ligali, ma yigulizi mwene ku mugeni oyo anoho ku avandu vinyumba yu mugeni oyo, 48Inyima wu kwiguliza, akikiri nuvunyari kwirana kugulwa yilanywe. Mulala ku avamwavo veve, 49anoho koza weve anoho musiala weve, anoho wundi ku avandu vinyumba yeeye wa ahimbi unyala kwirana kumugula, anoho mwene naava nanyoora mitungu jiduukanaa, anyala kwirana kwigura mwene. 50Kuduuka avalizi mihiga kutura ing'inga ya yiguliza mwene kuduuka ku muhiga golonda ku gwi lisangala, kandi alombe vuguli vwi livoholorwa kolondekana ni mitungu jihanwa ku mutumikiri wukutungwa. 51Niiva jikikiri mihiga minyingi, kuduuka yiranyie vulala ku vuguli vwa yagulwa kolondekana ni mihiga jayagulwa.

52Niiva jikikiri mihiga mikekeeke kuduuka ku muhiga gwi lisaangala, kuduuka avalizi aduuki kwitungira ligulwa lilie. 53Kuli mutumikiri utungangwa ku vuli muhiga, mwami weve sialamwamiiha kuzinguru mba. 54Niiva sialavohololwa mu indala kuzinzira yizi mba, oyo harara na avana veve valavohololwa mumuhiga golonda ku gwi liranywa. 55Umundu wa Isiraeli sianyala kuva mutugwa mihiga ni mihiga mba kigira avandu va Isiraeli vaveeye avatugwa vange. Ndaavatuliza mukivala cha Egebeti, Inzi mbeeye Yahova Nyasaye winyu.

Currently Selected:

LEVI 25: LOGOOLI

Highlight

Copy