JOSHUA 4

Avandu va Isiraeli vasingiriza amagina gu kwizulizira ku

1Lwi ihiiri yoosi yaali niyakambuka mugera gwa Jorodani, Yahova yavolera Joshua, 2“Tovola avasaza komi na mbiri, mulala kutura mu vuli ihiiri, 3kandi uvalage vavuguli amagina komi na mbiri kutura hagati hu mugera gwa Jorodani kutura havundu zana yaho aha vasaalisi vaali ni vasingiyange. Uvavoolere vagingi magina yaga muzie nago kandi mugaviiki hasi havundu ahamusoosera vudiku vwa kalunu.”

4Maku Joshua yalanga avasaza komi na mbiri zana ava yaali natovoye, 5kandi yavavolera, “Muzie mu mugera gwa Jorodani imbiri wi Lisandugu lie lilagana lia Yahova Nyasaye winyu. Vuli mulala ku munyi agingiri ligina ku mavega geege, lilala ku vuli ihiiri ya Isiraeli. 6Amagina yaga galakizulizi avandu va Isiraeli icha Yahova amali kuvakolera. Mu madiku gaaza, lwa vana vinyu valimuteeva ikivuni cha magina yaga ku munyi, 7mulakavavoolere ndi amazi ga Jorodani gavula kuvita lwa Lisandugu lie Lilagana lia Yahova liambuka mugera gwa Jorodani. Amagina yaga galagizulizi avandu va Isiraeli kazozo ichekolekaa hano.”

8Avandu va Isiraeli vaakora kuli Joshua yalaga. Maku vaavugura amagina komi na mbiri kutura hagati ha Jorodani, lilala niliva ku vuli ihiiri ya Isiraeli, nivagaginga kuduuka havundu ha vaziiza kososera, kandi nivagaviika hasi hazana yaho. 9Joshua naye kandi yalohiza amagina komi na mbiri hagati he mugera gwa Jorodani, ha virenge via vasaalisi avagiingaa Lisandugu lie Lilagana, vaali nivasingii. Amagina yago gakiri yo kali na lero. 10Avasaalisi vasingira hagati ha Jorodani kuduuka lwi vindu viosi viekoleka via Yahova yalaga Joshua avolere avandu va Isiraeli vakole. Yaga nigo aga Musa yaali nalagi Joshua.

Avandu vaakora vwangu ukwambuka mugera. 11Lwa vandu vosi vaali nivakaduuka kolovega lundi, avasaalisi vaari ni Lisandugu lie Lilagana vimila kuzia imbiri wa avandu vosi. 12Avasaza vihiiri ya Rubeni na Gadi kandi inusu yi ihiiri ya Manase, nivetegeki kulwaani, vimila kwambuka imbiri wa vandu va Isiraeli, kuli Musa yaali niyavavoolera vakole. 13Imbiri wa Yahova ahimbi vasaza zielefu arubaini avaari nivetegeki ku vulwani, vaambuka ni vazia kuduuka mu kereremo cha Jeriko. 14Ku lidiku yilio Yahova yanenehiza Joshua imbiri wi zimoni zia vandu va Isiraeli. Vamuha uluyali madiku gi livamwoyo lilie liosi, kuli yahaana ku Musa uluyali.

15Maku Yahova yavolera Joshua, 16“Laga avasaalisi vaginga Lisandugu lie Lilagana vatuli mu mugera gwa Jorodani.” 17Kunangwa Joshua yalaga avasaalisi, “Tuli mu mugera gwa Jorodani.”

18Lwa vasaalisi vaduuka ku lujinga lwu mugera, amazi gu mugera gatanga kuvita kandi, giizura ku zinduru ziagwo kandi kuli gwaali maziambiri.

19Avandu va Isiraeli vaambuka Jorodani ku lidiku lie likomi liu mweli gwukutanga, ma nivalomba hokososa ha Giligali#4:19 Giligali: Muloheburaina liveeye kovora, “Kutulizaho.”, ha lovega lwi ivugwi lwi Lidaala linene lia Jeriko. 20Ahene yaho Joshua yasingiriza amagina komi na mbiri agavugulwa kutura mu mugera gwa Jorodani. 21Yavolera avandu va Isiraeli, “Mu madiku gaaza, lwi visukululwi vienyu valimuteeva kivuni cha magina yaga, 22mulakavavoolere amakuva gi ing'inga ya vandu va Isiraeli vaambuka mugera gwa Jorodani ku marova amuumu. 23Muvavoolere ndi Yahova Nyasaye winyu yamukaminyira amazi ga Jorodani ligali kuduuka lwa mwaali nimwakambuka, kuli yaali naakaminyi inyanza Nzakanyu kigira munyi. 24Kigira yaga, vandu vosi ku lirova valamanya kuli ovonene uwe zinguru zia Yahova ziveeye namunyi mulahaana uluyali ku Yahova Nyasaye winyu mihiga ni mihiga.”

Currently Selected:

JOSHUA 4: LOGOOLI

Highlight

Copy

Compare