JOSHUA 19
19
Kivala chahaanwa ku Simioni
1Ikura ye kedonye chakaviri yagwira Simioni, kigira vandu va ihiiri ya Simioni. Kivala chavo chazia kuduuka mu kivala chahaanwa ku ihiiri ya Yuda. 2Chaali mu harara na madaala manene ga Beerisheba, Sheba, Molada, 3Hazari Shuali, Baala, Ezemu, 4Elitoladi Bezuli, Horima, 5Zikilaga, Bezi, Makabozi, Hazari Susa 6Bezi Labaozi na Sharuheni: amadara manene komi na tatu harara nu tudaala twago twagakumberiza.
7Gaali ho kandi gandi kandi madaala manene ga Aini, Rimoni, Ezeri, na Ashani. Amadara manene gane harara nu tudaala twago twa kumberiza. 8Kivala yiki chaali mu harara namadaala manene goosi na madaala manene yaga kuduuka lovega lwa Isavaalu ku lidaala linene lia Baalazi Beeri, iliamanyikana kandi kuli Rama. Yiki chaali kedonye cha ihiiri ya Simioni. 9Joshua yaali naheeye ihiiri ya Yuda kivala kenene ligali kuvita lienya liavo; kunangwa yaaha ihiiri ya Simioni kedonye chayo.
Kivala chahaanwa ku Zabuloni
10Ikura ye kedonye chakavaga yagwira vandu vi ihiiri ya Zabuloni. Joshua yavagavulira kivala ichaduuka ku lidaala linene lia Saridi kolovega lwa isavaalu. 11Kutura uwene yeyo lwako lwazia imadioli wa lidaala linene lia Mareali, nilwidiira Dabeeshazi kandi mugera goveeye ivugwi wi lidaala linene lia Jokineamu.
12Kolovega lundi lwa Saridi, lwazia ivugwi kuduuka ku lwako lwa madaala manene ga Kisilozi Tabori, Daberazi kandi kuduuka Jafia. 13Lwazizagilira kolovega lwa Ivugwi kutura ahene yaho kuduuka ku lidaala linene lia Rimoni. 14Kolovega lwa ivaale, lwako lwavodong'ana kohenza Hanazoni kuduuka ha livona lia ifutaheli. 15Lwali harara na madaala manene komi na mbiri harara nu tudaala twago twagakumbiriza. Malala kugo ni Katazi, Nahalali, Shimuroni, Idala na Bezelehemu. 16Amadara manene yaga harara na madaala gago nigo agaali mu kivala cha vandu vi ihiiri ya Zabuloni vanyoola kuva miandu jaavo.
Kivala chahaanwa ku Isakari
17Ikura ye kedonye chakane yagwira vandu vizinyumba zie ihiiri ya Isakari. 18Ovonene vwi kivala yicho vwali harara na madaala manene ga Jezireeli, Kesulozi, Shunemu, 19Hafaraimu, Shioni, Anahaarazi, 20Rabizi, Kishioni Ebezi 21Remezi, Enganimu, Enihada na Bezi Pazezi. 22Lwako lwidiira kandi ku Tabori, Shahazumari, na Bezi-shemeshi, niluduuka hamugera gwa Jorodani. Lwali harara na madaala manene komi na sita harara nu tudaala twago twagakumbiriza. 23Madaala manene yaga kandi madaala gago gaali mu kivala cha vandu vi ihiiri ya Isakari vanyoola kuva miandu jaavo.
Kivala chahaanwa ku Asheri
24Ikura ye kedonye chakatano yagwira vandu vi ihiiri ya Asheri.
25Kivala chavo chaali harara ni lidaala linene lia Helikazi kuduuka Haali, Beteni, Akishafu, 26Alamelechi, Amadi, kandi Mishali. Lwadiira ku madaala manene ga Karimeli na Shihori Libuna kolovega lwimadioli. 27Lwako lwi ivugwi lwazia ivaale kutura ku lidaala lia Helikazi kuduuka ku lidaala linene lia Bezidagoni - Lwadiira kukivala cha ihiiri ya Zabuloni kandi Livona lia ifutaheli kunzira yukuzia kolovega lwa ivaale kuduuka Bezemeki kandi Neieli. Lwazizagilira ivaale kuduuka kabulu, 28Eburoni, Rehobu, Hamoni, na Kana, kandi kuduuka Sidoni Enene. 29Lwako lwamanya nilovodong'ana kuzia kulidaala linene lia Rama, kuduuka ku lidaala linene liavodong'anwa nulugaga lwi lidigi litambi lia Tiro; ma nilugirung'ana kuzia kuduuka Hosa kandi nilohera munyanza ya Meditareniani. Kivala yicho chaali harara na madaala manene ga Mahalabu, Akizibu, 30Uma, Afeki, na Rehobu; goosi nigaveeye madaala sirini na mbiri agagikumbiriza. 31Amadara manene yaga harara nu tudaala twago twali mu kivala icha vandu vi ihiiri ya Asheri vanyoola kuva miandu jaavo.
Kivala chahaanwa ku ihiiri ya Nafutali
32Ikura ye kedonye cha sita yagwira vandu vi hiiri ya Nafutali. 33Lwako lwa ivaale lwi kivala chayo lwazia kutura Helefu kuduuka Zananimu, kuduuka Adaminekebu kandi Jamunia, kuduuka Laakimu kuduuka ku mugera gwa Jorodani. 34Uwene yeyo, lwako lwavodong'ana kohenza imadioli wa Azinothi Tabori, kutura yeyo kuduuka Hukoku, niludilaa kivala chi ihiiri ya Zabuloni kolovega lwa isavaalu, Asheri kolovega lwi Imadioli, Yuda kovolega lwi Ivugwi ha mugera gwa Jorodani. 35Madaala manene gizingaga zindinyu zia madigi ziali zidimu, Zeri, Hamazi, Rakazi, Kinerezi 36Adama, Rama, Hazori 37Kedeshi, Edirei, Enihazoru, 38Jironi, Migidaleli, Horemu, Bezanazi, kandi Bezi-shemeshi; goosi gaveeye madaala manene komi na tisa, harara nu tudaala twagakumbiriza. 39Madaala manene yaga harara nu tudaala twago gaali mu kivala cha vandu vi ihiiri ya Nafutali vanyoola kuva miandu jaavo.
Kivala chahaanwa ku ihiiri ya Dani
40Ikura ya saba yagwira vandu vi ihiiri ya Dani. 41Ovonene vwi kivala yicho vwali harara na madaala manene Zora, Eshitaoli, Irishemeshi, 42Shaalabini, Aijaloni, Izila, 43Eloni, Timina, Ekironi 44Eliteke, Gibezoni, Baalazi 45Juhudi Benebaraka, Gazurimoni 46Mejarikoni na Rakoni, harara nikivala chavodong'ana lidaala linene lia Jopa.
47Lwa vandu vi ihiiri ya Dani vanyagwa kivala chavo, vazia nivingilira lidaala linene lia Laishi. Valigumira, niviita avandu vaali mulio, kandi nivalivugula kuva liavo. Vamenya mu kandi nivagirung'anyia lieta lielidaala zana kutura Laishi kuzia ku Dani, valigulika inyima wa guuga wavo Dani. 48Amadara manene yago goosi harara na madaala gago gaali mu kivala cha vandu vi ihiiri ya Dani vanyoola kuva miandu jaavo.
Limaliriza Liukugavula Kivala
49Lwa aviimiliri va vandu vi hiiri ya Isiraeli vamala ligavula kivala, vaaha Joshua muyaayi wa Nuni kedonye chi kivala kuli chiche. 50Kuli Yahova yaali nalagi, vamuha lidaala linene lia yateeva ahevwe: Timunazi Sera, mu kivala chivigulu cha Efuraimu. Yumbaka vuhia lidaala linene zana kandi namenya mu.
51Musaalisi Elieza, Joshua muyaayi wa Nuni, na aviimiliri va vandu vi zihiiri zia Isiraeli vagavulana vidonye vie kivala yiki ku likuba ikura koteeva Yahova ha Shilo, ha vwingiliru vwi Lihema liukuvuganira mu na Yahova. Munzira yiyi, vamala ligavula kivala.
©Bible Society of Kenya, 2019