VAKALAGI 3
3
Izihiiri Ziatigala mu Kanaani
1Yahova yaleka izihiiri zindala mu Kanana ziduuki kogeliza vandu va Isiraeli avaari nivakikiri kolola ku vulwani mu Kanaani. 2Yakola yaga kunangwa yigizi ivisukulurwi via vandu va Isiraeli viduuki kumanya kigira uvulwani, mbitilira yavo avaari nivakikiri kuziaku mu vulwani. 3Avandu ava Yahova yaleka mu kivala yiki vaali avanene vatano va vandu va Filisitia, Kanaani, Sidoni, na Hivi avamenyaa mu Kiguru cha Lebanoni kutura ku kiguru cha Baali Herumoni kuduuka ha vwingiliru vwa hamazi. 4Valekwa vagelizi Avaisiraeli kolola niiva avandu va isiraeli zana valalonda amalago gaali nigaahaanwa ku avaguuga vaavo na yahova, kuvitira ku Musa. 5Maku vandu va Isiraeli vamenya hagati ha vandu va kanani, Hiti, Amori, Ferizi, Hivi na Jebusi. 6Kunangwa valeta vakali kutura muvo, kandi nivasigamira vanyasaye vaavo.
Ozinieli
7Avandu va Isiraeli vivilira Yahova Nyasaye wavo; vaakora vwoni imbiri weve, kandi nivasigamira vifananyi via Baali na Ashera. 8Yahova yaali nu vutima ovonene ligali na vandu va Isiraeli, ma yamanya naavaleka kuguutwa na Kushani Rishazaimu mwami wa Mesopotamia. Yavamiiha ku mihiga munane. 9Avandu va Isiraeli vanira Yahova, naye yatuma umundu wamanya navavoholola. Umundu zana yaali Ozinieli, mwana wa Kenazi, amwavo muke wa Kalebu. 10Roho wa Yahova yaza kuye, ma naagwa umwimiliri wa vandu va Isiraeli. Ozinieli yazia mu vulwani na Yahova yamuha uvuguuti ku umwami wa Mesopotamia. 11Umurembe gwaali ho mu kivala ku mihiga arubaini, ma Ozinieli nakuza.
Ehudi
12Avandu va Isiraeli vaakora vwoni imbiri wa yahova kandi. Kigira yaga, yahova yakola Egiloni umwami wa Moabu kuva ni zinguru kuvita Isiraeli. 13Egiloni yiyunga na vandu va Amoni kandi vandu va maleki; vaguuta Isiraeli kandi nivavugura Jeriko, lidaala lie misaala ja makindu. 14Egiloni yamiha vandu va Isiraeli ku mihiga likomi na munane. 15Navuzwa lwa vandu va Isiraeli vanira ku yahova, yavatumira umundu kuvavoholola. Umundu zana yaali Ehudi. Yatumikiraa umukono mumosi, na yaali umwana wa Gera, kutura muhiiri ya Benjamini. Avandu va Isiraeli vaatuma vihaanwa ku Egiloni umwami wa Moabu kuvitira ku Ehudi. 16Ehudi yaali niyalomba ikivavi ichugi zimbega ziosi, vutambi imiita ndala ninusu. Yevoha ikivavi zana musi mwizinguvu zizie ku mukono mulungi. 17Maku yaahira ivihaanwa ku Egiloni, uwaali umukomeru ligali. 18Lwa Ehudi yaali namuheye ivihaanwa, yavolera avaleeti vi vihaanwa zana viirane yengo. 19Navuzwa Ehudi mwene yaagilung'anira ha magina gavazwa himbi ha Giligali, niyiirana ku Egiloni, navoora, “Umwami, mbeeye na makuva googo gimbisu.”
Kunangwa mwami yavolera avalindi veve vatuli mu. Avatumikiri veve vosi vaatura ni vazia ichova.
20Ehudi yisunda ahimbi kuye lwu umwami yaali niyikaye yenyine munyumba yeeye igulu, namuvolera, “Mbeeye na makuva googo kutura ku Nyasaye.” Umwami yasingira kutura kondeve yeeye. 21Ehudi yanyira umukono mumosi gwigwe, nasomola ikivavi chiche kutura kuvazwa yumukono mulungi gwigwe, natooza Egiloni mundu. 22Ikivavi choosi chafwera mukifu harara ni kilungu chene; ni zitinya ziaadinya ku kivavi, ma navula kuking'usa, kuduuka lwayakitulizila olovega lundi. 23Maku Ehudi yatura nazia kulusimbu, ma nahana vudinyu imiliango jinyumba yi igulu, na yazia yengo. 24Lwa yaali naziiyi, avatumikiri vu mwami vaza nivanyoora imiliango jihaniywi vudinyu. Vamanya nivasuuvira anoho umwami uziyi kwekonya. 25Vaalindilira kuduuka nivaluha, navuzwa lwa vaalindilira manivalola siyigulaa muliango mba, vaavugura ulufungu niviigula. Vanyoola umwami wavo naagoni hasi nakuzi.
26Ehudi yiruka lwa avatumikiri vu mwami vaali nivakilinda, naavitira hamagina gavaazirwa, nazia Seira. 27Lwa yaduuka mu kivala chivigulu cha Efuraimu, yakuba ikisiliva, kulanga avandu va Isiraeli muvulwani; maku yaavimilira kusulunguta kutura mu vigulu. 28Yavavolera, “Nondi! Yahova umali kumuguutila vandu va Moabu, avaveeye avasigu vinyu.” Avandu valonda Ehudi, nukwigalira ha vwambukilu vwa vandu va Moabu venyekana vaambukiri mugera gwa Jorodani. Sivavugilira kali mulala kwambuka mba. 29Lidiku liene yilio, vita vandu va Moabu izielefu likomi avaari nizinguru ligali; na sihaali ho kali mundu mulala uwatigala mba. 30Lidiku yilio, vandu va Isiraeli vaguuta vandu va Moabu, nu umurembe gwaali mu kivala ku mihiga samanini.
Shamugari
31Inyima wa Ehudi, uwalonda mu vwimiliri yaali Shamugari, mwana wa Anazi, uwaasola vandu va Isiraeli, maniyiita vandu va Filisitia miasita natumikira uludanga ulwugi lwi zigiriki.
©Bible Society of Kenya, 2019