YAKOBO 4

1Uvulwani ni lirembana vituraa haliha hagati hinyu? Siliveeye likayirwa lienyu lidamanu liletaa uvulwani mu vivero vie miviri jinyu? 2Mukayirwa ivindu, navuzwa simunyoolaa mba, mwetegeki kwita; Mwegombaa ivindu nu umwoyo gwosi, navuzwa simunyoolaa mba, kulwayago, mulembanaa nimulwaana. Simuveeye ni ivindu via mwenya, kigira simutevaa kutura ku Nyasaye mba.

3Lwa muteeva, simunyoolaa mba kigira musaala ni zing'anagani zindamanu muduuki kuvitumikira mu lieyaanziza lienyu.

4Munyi avandu avataveeye vasuuvirifu! Simumanyi ndi kuva umulina wi lirova, gaveeye kovora kuva musigu wa Nyasaye? Woosi owenyaa kuva umulina wi lirova yekolaa umusigu wa Nyasaye. 5Muganaganaa agiligali sigaveeye mu Mang'oda Matakatifu gavoora ndi, “Roho wa Nyasaye yavika amenye mu kunyi, yizuuyi likayirwa lilulu.” 6Navuzwa zimbavasi zia Nyasaye akohezaa ziveeye ni zinguru ligali kuli Mang'oda Matakatifu gavoora, “Nyasaye ahingiraa avigingiri, navuzwa ahaanaa, zimbavasi ku vegehiza.”

7Kunangwa, mwegehizi ku Nyasaye; Muhingiri Setani, naye alamwiruka. 8Mwisuundi ahimbi ku Nyasaye naye alisuunda ahimbi ku munyi. Mwiganili munyi avoni; mutakase mioyo jinyu, munyi avagadaa.

9Muve no vovereri, muliri kandi musiome! Liseka lienyu ligirung'anywi kuva lilira, lisangala lienyu live liverera.

10Mwegehizi munyi aveene imbiri wu Mwami, naye alamunenehiza.

Lieganihiza ku likalagira Mukristayo

11Avaamitu vange, mutamonyana aveene na vene mba. Niiva ulamonya Mukristayo wache anoho umukalagiri omonyaa Lilaga kandi ulikalagira. Niiva ulakalagira Lilaga, sioveeye mulala ku yavo avaliloondaa mba, navuzwa oveeye mulala ku avalikalagira. 12Nyasaye yenyine niyie oveeye umuhaani wamalago kandi umukalagi, oyo yenyine niyie unyala kohonyia kandi kudiviza. Ivi uganaganaa oveeye vwaha kukalagira uwacho woovo?

Lieganihiza ku liekonya

13Kalunu mumbulirizi, munyi avamuvolaa, “Kalunu anoho mugamba kulazia mu lidaala navoleve, lwa na komenye umuhiga mulala, ni kukiranyia konyoole mabese manyingi.”

14Simumanyi livamwoyo lienyu mugamba nalive ki? Muveeye vuzwa kuli umwoki ogololekaa vuzwa ku ing'inga ngekeeke, ma gogota. 15Ngano muvooraa: “Mwami nayanza nakove mwoyo ma nakokole yaga anoho gala.” 16Navuzwa kalunu mwigingiraa kandi molekonya. Liekonya kuli yili liveeye lidamanu.

17Kunangwa yavo vatakola vulahi vwa vaduukana vakole, vaveeye na mahiolo gu vwoni.

Lieganihiza ku avatugi

Currently Selected:

YAKOBO 4: LOGOOLI

Highlight

Copy

Compare