ISAYA 59
59
Muporofeti yakalagiraa uvwoni vwa vandu
1Mutaganagana ndi Yahova aveeye mudedekere ligali kali sianyala kumuhonyia mba, anoho sianyala kuhulira lianira lienyu liukwenya ovokonyi mba. 2Uvwoni vwinyu nivwo uvwavukanyiaa munyi kutura ku Nyasaye winyu. Gaveeye kigira uvwoni vwinyu uvumali kumukola yiivise ihale kutura ku munyi, kali avuli kuhulira lianira lienyu lwa mu musigamira. 3Kigira munyi mwitaa na makono ginyu kandi mukoraa uvudamanu ni videte vienyu, muvooraa ovovehi ni minwa jinyu kandi zinimi zienyu zimonya uvuchamu.
4Munyi muzizaa mukiyaro, navuzwa simuveeye nilikalaga liuvulungi kolovega lwinyu mba. Mweredaa ku ovovehi kuguuta ichiina. Mwetegekiza zing'anagani zienyu ziuvudamanu kusaliriza avandi. 5Mwalulaa mavuyu gi kihiligoma, nukunava miluvu ji zimbuvi. Oyo uliizaa mavuyu gazio alakuza, na nigatanywa zinzoka ziu vusungu zitulaa mu. 6Miluvu ja valomba kutura ku zimbusi zie zimbuvi sivanyala kwikunika ni viavaanavaa mba. Miyinzi jiavo jiveeye miyinzi ju vudamanu kandi vikolwa viekirage viveeye mu amakono gaavo. 7Munyagulaa zimbiru kuzia kokora uvudamanu; muveeye avangu ukwita avandu vatali nimbara. Zing'anagani ziavo ziveeye zing'anagani ziuvudamanu. Hoosi ha muzia mulekaa ho lidivizwa. 8Simumanyi zinzira zie mirembe kali hakuzu mba; kandi sihali ho ni likalaga lirungi mu zinzira zienyu mba. Mumali kwelombera zinzira ziachama. Ku vosi ogendaa kuzio sialava mu mirembe kali hakuzu mba.
Avandu viyamaa uvwoni vwavo
9Avandu vavoola, likalaga lirungi liveeye ihale ni kunyi; na uvulungi sivoveeye mu kunyi mba. Kwenyelerizaa konyoole uvulavu; navuzwa haveeye kisundi chele; kwenyelerizanga konyoole uvwaku kogenda mu navuzwa kisundi cheng'ine keveeye ho. 10Kuhavatizaa yiyi niyiyi ukwenyeleriza lidigi kuli avavoku; kuhavatizaa vuzwa kuli yavo avatali nizimoni. Kwikigatira mbasu hagati kuli koveeye mu vudiku, kuli koveeye mukivala chikisundi cha vakuzu. 11Kwosi kufuma kuli zidubu, kuliraa vuzwa kuli amakuulu. Kwenyelerizaa likalaga lirungi navuzwa siliveeye ho mba. Kwenyelerizaa ovohonyi, navuzwa voveeye ihale ni kunyi.
12“Yahova, mahiolo giitu gaveeye manyingi imbiri woovo. Amahiolo giitu gaveeye ni kunyi kazozo, kandi kunyi kumanya uvwoni vwitu vwosi ligali. 13Kumali kwibaala ku ivi nu kwambakana ivi kandi nukusuula kolonda ivi, Nyasaye wiitu. Kumali kudambiza avandi nukugirung'ana koleka ivi. Zing'anagani zietu ziveeye ziuvugadi; na amakuva giitu gaveeye ovovehi vwere. 14Likalaga lirungi liviikiywi halovega, na uvulungi vusingiyi ihale. Agiligali gikigitaye nukuduvagwa mu viina; na uvusuuvirifu sivunyala konyoora ovogono muzio mba. 15Agiligali sigaveeye ho mba kali ku vosi oleka likora uvudamanu yiviika umwene mu lidambizwa.”
Yahova yetegekaa kosoola avandu veve
Yahova umali kolola yaga, kandi uvihiliriziywi konyoora ndi sihali ni likalaga lirungi mba. 16Yahova ogenyi kolola ndi si haali nu mulala okonyaa avadambi mba. Kunangwa alatumikira zinguru zizie kuvasoora kandi kuvaha iliguuta. 17Aliviika likalaga lirungi kuli likoti lie salamba, na zinguru ziovohonyi kuli igudwa. Aliiviika umwene uvugulu vonene kulungikiza ivindu kandi ukuhaana mageri nukuvaanza kisaalia cha vandu vasalira. 18Alahaana mageri ku vasigu veve kolondekana ku agavamali kokora. Yee, uvutima vwivwe ni livaanza kisaalia chiche viladuuka ku vasigu veve. Alahaana mageri kali ku yavo avamenyaa muvivala vie ihale. 19Sa mulala alatia lieta lia Yahova nizinguru zizie kutura Ivugwi kuduuka Imadioli, kandi alamanya uvukumi vwivwe kutura ing'inga yiliuva litongaa. Alaza kuli mugera gutulikaa nizinguru zinene ligali; ugwa imbuza kandi kuli ihuuzaa.
20Yahova avooreraa avandu va Isiraeli, “Ndaza ku Jerusalemi kuli umuhonyi, okohonyia kandi kukinga visukululwi via Yakobo, avagirung'ana kutura ku vwoni vwavo. 21Ndalomba lilagana liange ni munyi: Mali kumuha zinguru ziange kandi amigizu gange kuva aginyu mihiga ni mihiga. Kutura kalunu, gamudukira muhuliri inzi kandi mwigize avana vinyu kandi visukululwi vienyu vaambuliri zing'inga ziosi.”
©Bible Society of Kenya, 2019