ISAYA 56
56
Zihiiri ziosi zilava avandu va Nyasaye
1Yahova avolera avandu veve ndi, “Mukore likalaga lieligali kandi liveeye lilungi, kigira ovohonyi vwange ku munyi voveeye ahimbi kuza, na ovohonyi vwange vulalang'aminywa vwangu ligali. 2Ndagasiza ligali yavo avalindaa Lisabato na sivaliononyiaa mba. Ndagasiza yavo avatakola uvudamanu.”
3Umugeni uhambana ku avandu va Yahova atavoola ndi: “Yahova sialandeka sigamiri harara na vandu veve.”
Umundu waladwa ataganagana ndi kigira sianyala konyora avana, sianyala kuva mulala ku vandu va Nyasaye. 4Yahova avooreraa ku mundu kuli uyu ndi, “Niiva ulamba luyali ku liliinda Lisabato, na niiva ulakola aganyaanzizaa kandi nukulinda lilagana liange nu vusuuvirifu vwosi, 5hene yaho, lieta liilio lilizulizwa mu Litembeli liange kandi mu vandu vange ku ing'inga indambi kuvita lwa waali ove na vayaayi kandi navakaana. Siulivilirwa kali hakuzu mba.”
6Kandi Yahova avoora ku avageni yavo aviihambanyiaa ku vandu veve, avamuyanzaa nukumutumikira, avalindaa Lisabato nukulinda Lilagana lilie nu vusuuvirifu vwosi: 7“Ndamuleeta muduuki mu Ziyoni, kiguru change Kitakatifu, ndamuha uvusangari munyumba yange yilisaala, kandi ndavugilira visiuviliru vienyu via muhaanaa ku vwali vwange. Litembeli liange lilalangwa inyumba yilisaala ku vandu vi zihiiri ziosi.”
8Mwami munene Yahova Nyasaye, umali koleta avandu veve Isiraeli yengo kutura mu lihaminywa, umali kulaga ndi alaleeta kandi avandu vandi ukuhambana navo.
Aviimiliri va Isiraeli vakalagirwa
9Yahova yavolera zihiiri zing'eni: “Munyi zinyama ziosi zinduru, na munyi mwosi zinyama ziu mu mulitu, hambi mulie avandu vange. 10Aviimiliri vosi, avaadukana viiganihize avandu vange, vaveeye avavoku! Sivamanyi kindu kali hakuzu mba. Vaveeye kuli zimbwa zidimbidi, izitalokaa. Vagona hasi vuzwa nokoloota maloto. Vayaanza kogona zindoolo! 11Vaveeye kuli zimbwa zimbuvaalu izitanyara gwigutaa. Aviimiliri yava sivaveeye nilimanyiriza. Sa mulala akolaa kuli ayaanza kandi yenyaa viambeti vivie umwene. 12Vavolerana, ‘Hambi kuzie kwenya iwaini; hambi kunwi kuhambiki amalwa! Mugamba gulava mulahi kali kuvita kalunu!’ ”
©Bible Society of Kenya, 2019