ISAYA 52
52
Nyasaye alasoola Jerusalemi
1Avandu va Jerusalemi, muve nizinguru zinene kandi!
Lidaala litakatifu lia Nyasaye, mwiviki munyi aveene vukumi!
Avandu vatamanyi Nyasaye,
sivalingira mu virivwa vivio kandi mba.
2Mwevoholole munyi aveene, O, avandu va Jerusalemi!
Singiri muturi mu luguchi na mwikale kondeve yinyu yu vwami!
Mwevoholole minyororo jimuvohaa mwigoti,
munyi avandu vahambe va Ziyoni!
3Yahova Wuvunyali avoora ku vandu veve: “Munyi mwagulizwa vugira mitungu josi, kandi mulava avavoholore vugira kutunga esendi kali ndala. 4Lwa mwazia komenya mu kivala cha Egebeti, kuli avageni, mwakora ndio ku liyaanza lienyu aveene. Lwa inyima, Asiria yamugumira nukumuvugula kuzinguru vugira kutunga kindu nukumudambiza. 5Na kalunu, kindu kilala chere kimali kwekoleka mu Babiloni. Muveeye avahambe, vugira kindu kutungwa kigira munyi. Yavo avamiiha ku munyi viyizominya niveevoola kandi vamanyiaa lilegeriza ku inzi. 6Ku ing'inga yiza, munyi mulamanya ndi inzi mbeeye Nyasaye kandi mali komoloma.”
7Gaveeye gukuyaanziza ligali, kolola mutumwa naatuliyi mu vigulu,
naletaa makuva malahi, makuva malahi gimirembe!
Nalandizaa uvuguuti kandi avoleraa lidaala linene lia Ziyoni,
“Nyasaye woovo aveeye Mwami!”
8Yavo avalindaa lidaala linene viimba harara kigira uvusangari!
Vanyara kolola ni zimoni ziavo aveene,
iliirana lia Yahova mu lidaala linene lia Ziyoni.
9“Muhanzuki zinyimbu ziuvusangali,
munyi mang'anye ga Jerusalemi!
Yahova alahonyia lidaala lilie linene,
kandi alaleminya avandu veve mioyo.
10Yahova umali kumanyia mukono gwigwe mutakatifu imbiri wi zihiiri ziosi.
Keheri choosi chi lirova kilalola ovohonyi vwa Nyasaye wiitu.
11Muzie! Muzie! Muturi hano;
mutadiira kindu kitali kinifu!
Muzie mutule hagati ha vandu va Babiloni!
Mwitakase munyi avagingaa viju via Yahova.
12Ing'inga yiyi simulatula kuzia vwangu vwangu;
simulava nimugerizaa ukwiruka mba.
Yahova Nyasaye winyu alamwimilira kandi alamukinga ku zimbega ziosi.”
Mutumikiri wa Yahova usaliraa
13Yahova avoora,
“Mutumikiri wange alaguuta mu miyinzi jije midinyu.
Alahevwa luyali lonene;
kandi alanenehizwa ligali.
14Avandu vanyingi valatimukwa engolo lwa vamulola kigira ligondo lilie liononywa;
siyaali kandi ni ligondo liu mundu mba.
15Kunangwa alagenyia zihiiri zinyingi;
avami valakiring'ana niligenya;
valalola aga vakikiri kololaku,
kandi valamanyiriza aga vakikiri kumanya.”
©Bible Society of Kenya, 2019