ISAYA 43
43
Nyasaye alaangaa kosoola avandu veve
1Yahova uwalomba munyi avoora,
“Mutatia mba; kigira inzi ndamuhonyia.
Inzi mali kumulanga ni lieta,
na munyi muveeye avandu vange Isiraeli.
2Lwa muvitiraa mu mazi manene gululiva, inzi ndava harara nimunyi;
nimuvitira mu migera ja mazi manene simuliiyina mba
kali nimuvitira mu madinyu kuli muvitiraa mu migera minene
simulaguutwa kuli avamazi gimigera giinaa.
Lwa mugendaa kuvitira mu muliru simulahia mba;
magerizu madinyu agamugwiraa sigalamusaliriza mba.
3Kigira inzi mbeeye Yahova Nyasaye winyu,
Nyasaye Umutakatifu wa Isiraeli ohonyiaa munyi.
Ndahaana Egebeti eve kuli mutungu gwo kovoholora munyi.
Ndahaana Ezopia na Seba mu vogono vwinyu.
4Ndahaana zihiiri ziosi ku nduuki okumuhonyia,
kigira munyi muveeye avuvuguli vudinyu ligali ku inzi
kandi kigira nyanza munyi kandi muheezaa luyali.
5Mutatia mba kigira inzi mbeeye harara nimunyi!
“Ndaleta kisukururwi chienyu kutura Ivugwi
kandi ndamuvungiza harara kutura Imadioli.
6Ndavolera vandu va Ivaale, vatuli vazie!
Kandi ndavolera Isavaalu, vataviigalira mba!
Leki avandu vange viirane kutura muvivala vie ihale,
kandi kutura mu vuli keheri chi lirova.
7Vaveeye avandu vange,
ndaavalomba vaduuki koleta uvukumi ku inzi.”
Isiraeli vaveeye avalolekizi va Yahova
8Nyasaye avoora,
Leeti avandu vange vaze mu kiyaalo.
Vaveeye nizimoni, navuzwa sivalola mba.
Vaveeye namatu, navuzwa sivahulira mba!
9Leeti vandu vi zihiiri vaze mu kiyaalo.
Ni uliha ku vanyasaye vaavo unyala kuvuula agaazaa kwekoleka?
Ni uliha kuvo uwavuula vindu viekoleka kalunu?
Leki avanyasaye yava valeete valoli vaavo kumanyia ndi vaveeye avalungi,
kololekiza agiligali ga makuva gaavo.
10“Avandu va Isiraeli, muveeye avaloli vange;
ndaatovora munyi muve vatumikiri vange,
kunangwa muduuki kumanya inzi kandi kusuuvira mu inzi;
Kandi kumanyiriza ndi inzi nzieng'ine mbeeye Nyasaye.
Sihaliraho nu munyasaye wundi nataveeye inzi nzieng'ine mba;
sihaveeyeho kandi sihaveeyeho nanyasaye wundi kuvita inzi.
11“Inzi weng'ine mbeeye Yahova,
ni inzi weng'ine unyala kohonyia munyi.
12Inzi ndaavura agazizaa kwekoleka,
ma kandi ni nzizaa kumukoonya.
Sihaveeyeho nu munyasaye mugeni wanyala kokora yaga mba;
munyi muveeye avalolekizi vange.
13Inzi mbeeye Nyasaye na ndakave ndio kazozo.
Sihaveeyeho nu mundu kali mulala unyala kohona kutura ku zinguru ziange;
siali ho numulala unyala kugirung'anyia icha inzi mali kokora.”
Kwiruka kutura Babiloni
14Nyasaye Mutakatifu wa Isiraeli, Yahova ohonyia munyi, avoora,
“Ndatuma liihi liange kulwaana Babiloni okohonyia munyi.
Ndavunanyia virivwa via madaala manene,
kandi ndagirung'anyia lihanzuka lia vandu valio kugwa lilira.
15Inzi mbeeye Yahova, Nyasaye winyu Mutakatifu.
Inzi ndalomba munyi, avandu va Isiraeli,
kandi mbeeye mwami winyu.”
16Ku ing'inga yakale Yahova
yalomba inzira kuvitira mu inyanza,
inzira kuvitira mu viguvuli vinene.
17Yadiviza liihi linene liezingulu,
liihi lia magare gu vulwani nizibarasi.
Vaagwa hasi sivasingira kandi mba,
nukuvasiminya kuli ludambi lwi itaya!
18Navuzwa Yahova avoora:
“Mutizuliza vindu vimali kuvita,
kandi mutaganagani vindu via maziambiri mba.
19Heenzi kindu kihia icha nziza kokora.
Chekoleka kalunu, na munyi munyala kokelola kalunu!
Ndalomba inzira mwigendanyama,
nukusinukiza migera mu changalangwi.
20Kali zinyama ziumbulimu zilamba uluyali;
ivivwi na mavudu vilanzizominya,
lwa ngola migera kuvitira mu changalangwi
ukuhaana mazi ku avandu vange vatovole.
21Vaveeye avandu vandelombera umwene,
kandi valimba lizominywa liange!”
Uvwoni vwa Isiraeli
22Yahova avoora,
“Navuzwa munyi avandu va Isiraeli mwaluhizwa ninzi;
simwasigamira mba.
23Simwandetera vihaanwa vienyu viu kusambwa via magondi;
simwamba uluyali nivisiuviliru vienyu mba.
Sindamudwika misigo miliduhu ku limuniga mundeetere vihaanwa mba,
anoho kumuluhiza ku limuteeva kimuli mba.
24Simwangulira vimuli anoho kunzigutiza ni zitinya zie zinyama zienyu mba.
Mu vogono yivwo mwandwika misigo miliduhu nuvwoni vwinyu;
mwanduhiza ligali nuvudamanu vwa mwakoraa.
25Inzi mbeeye Nyasaye usamiihaa vwoni vwinyu;
kandi ngolaa yaga kigira ku lwa inzi mwene.
Sindizuliza uvwoni vwinyu kandi mba.
26“Gendi kuzie mu kiyaalo; leeti makuva ginyu!
Haani vivuni via makuva ginyu kumanyia ndi muveeye vulungi!
27Avaguuga vinyu vukutanga vaakora uvwoni,
aviimiliri vinyu vaangolera uvwoni,
28avamihi vinyu vonogonyia hatakatifu hange.
Kunangwa ndaadiviza avandu va Isiraeli.
Ndaaleka avandu vange vanyegwe.”
©Bible Society of Kenya, 2019