ISAYA 37
37
Mwami Hezekia yateevaa zing'anagani zia Isaya
(2 Avam. 19:1-7)
1Nonoho lwu mwami Hezekia yahulira makuva gaavo, yatandula zinguvu zizie mu vovereri, niyiviika zinguvu zia magunia, ma nazia mu Litembeli lia Yahova. 2Yatuma Eliakimu, mutumikiri wasingilira inyumba yu vwami, Shebuna, mung'odi wi kiyaalo, kandi harara na vasaalisi vaduukiru ligali ku Muporofeti Isaya muyaayi wa Amozi. Navo kandi vaali niviviiki zinguvu zia magunia. 3Navo vaavoolera Isaya, Mwami Hezekia avoora ndi, “Lero ni lidiku lie kivi, lidiku liokogondokerwa kandi lie zisoni. Kunyi koveeye kuli mukali wing'inga yeye eveeye ahimbi yu kwivura umwana, navuzwa siaveeye ni zinguru ziukwivula mba. 4Mwami wa Asiria utumi mwimiliri wa vatumikiri veve kuuza konyega Nyasaye oveeye mwoyo. Yahova Nyasaye woovo ahuliri manyego yaga ma ahaane mageri ku yavo avagamolomi. Kunangwa usaale ku Nyasaye kigira avandu viitu avatigara mwoyo.”
5Lwa avatumikiri vu mwami Hezekia vaza ku Isaya, 6Isaya yavavolera, “Muvoolere mwami, ‘Yahova avoora: Utatia kigira makuva gawaahulira mba, aga vatumikiri vu mwami wa Asiria vamali kovora sianyala kukohonyia mba. 7Yahova alakola mwami wa Asiria kuhulira ulusuma ulwazalumukole yirane mu kivala chiche mwene, kandi Yahova alamukola yiitirwi yo.’ ”
Avandu va Asiria vatuma litihiza lindi
(2 Avam. 19:8-19)
8Rabishake, mwimiliri wi liihi lia Asiria yahulira ndi mwami wa Asiria utuli Lakishi na alwaana lidaala linene liali himbi lia Libuna; kunangwa yazia yo kumuteeva zing'anagani. 9Likuva liadukira mwami wa Asiria ndi, mwami Tirihaka wa Ezopia, yaazaa kumwingilira. Lwu mwami Senakeribu yahulira makuva yaga, yatuma ibarwa ku mwami Hezekia 10wivuyuda kumuvoleraa; “Utaleka umunyasaye wa usuviraa mu akugaade nu kukovolera ndi Jerusalemi silagwa mu makono gange mba. 11Ivi wamala kuhulira chu mwami wa Asiria akolaa ku kivala choosi chatovolaa kudiviza. Uganaganaa ivi ulahononoka? 12Avaguuga vange vaadiviza madaala manene ga Gozani, Harani, na Rezefa, kandi niviita avandu va Bez-edeni avaamenyaa mu Telasari, na siyaali ho kali mulala ku avanyasaye vaavo uwaali unyala kuvahonyia mba. 13Vaveeye haliha avami va madaala manene ga Hamazi, Aripadi, Sefarivaimu, Hena, na Iva?”
14Mwami Hezekia yavugula ibarwa zana kutura ku vatumwa ma naagesoma. Maku yazia mu Litembeli, naviika ibarwa zana imbiri wa Yahova, 15kandi nasaara ku Yahova, 16“O, Yahova Wuvunyali, Nyasaye wa Isiraeli, uwikaye kondeve yu vwami igulu wa Vakerubi, ivi weng'ine, oveeye Nyasaye, uwamihaa uvwami vwosi vwi kivala. Ivi walomba ligulu nilirova. 17Kalunu, O, Yahova, ukuhuliri na ohenze ku agekolekaa ku kunyi. Huliriza ku vindu viosi via Senakeribu avoora okonyega ivi, Nyasaye oveeye mwoyo. 18Kunyi kwosi kwamanya O, Yahova, avami va Asiria vamala kudiviza zihiiri zinyingi nokokola vivala viavo kuva viele, 19kandi vamala kusaamba avanyasaye vaavo, avavura kuva avanyasaye kali hakuzu nitali ivifananyi vie misaala namagina, ivialombwa na makono gavandu. 20Kalunu, O, Yahova Nyasaye wiitu, okosoole kutura ku vandu va Asiria, kunangwa zihiiri ziosi zie kivala ziduuki kumanya ndi ivi weng'ine oveeye Nyasaye.”
Likuva lia Isaya ku Mwami Hezekia
(2 Avam. 19:20-37)
21Maku Isaya mwana wa Amozi yatuma likuva ku mwami Hezekia namuvolera mu litivula kolondekana ni lisaala lilie ndi, 22Yahova umali kovora, “Lidaala linene lia Jerusalemi likosekeleraa, ivi Senakeribu, kandi likolegerizaa. Jerusalemi lidaala linene likusung'usilaa mutwi gwalio. 23Uganaganaa nivwaha wa ivi onyegaa kandi kohenyahenyera? Ivi siuhaani luyali ku inzi, Nyasaye Mutakatifu wa Isiraeli mba. 24Watuma avatumikiri vovo ukuuza kwigingira ku inzi ndi ivi wamala kuguuta ivigulu vitambi kuvita ligali via Lebanoni na magare googo goosi gu vulwani. Wigingira ndi, kukigulu kwene yikwo, watema midaragwa mitambi ligali kandi misaala mitovole jindi ma kandi waazia kuduuka havundu haveeye musi ligali mwi militu. 25Ivi wigingira ndi wayava vidaho kandi nuunwa mazi mu vivala vigeni, ma kandi zinduvatiru zia vasikari vovo vuvulwani ziaduvaga migera josi ja Egebeti kuduuka nigikama.
26“Ivi ukikiri kuhulira ndi ndalohiza yaga goosi kutura madiku ga kale? Na kalunu inzi mali kugadukiza. Ndakuha zinguru ukugirung'anyia madaala manene gizimbinga kugwa vitumi via mang'anye. 27Avandu vamenya mu madaala manene yago, vaali vugira zinguru; vatihizwa nokohendizwa mwoyo. Vaali kuli vunyasi mu mulimi anoho kuli indiva ivirukaa kwigulu kwi inyumba lwimbuuza yu kudiviza kutura Ivugwi.
28“Navuzwa inzi manyi vindu viosi kigira ivi; chokolaa kandi hoosi huzizaa. Inzi manyi kuli oveeye nu vutima vululu ligali ni inzi. 29Mali konyoora makuva gu vutima vuvwo ku inzi kandi mbuliyi liegingira liilio ku inzi, ndavika endoani mu amuulu googo, kandi lijamu mu munwa mumwo na ndakwiranyira kunzira ya waazira ku.”
30Maku Isaya yavolera mwami Hezekia, “Yiki ne kelolero cha makuva gazizaa kwekoleka. Muhiga gunu nu muhiga guzaa mulava vuzwa nuvuswage vwu mbulimu, navuzwa mu muhiga gwa kavaga, mulataga uvuswage vwinyu aveene nokovogesa, kandi mulasimika vizabibu nukulia mazabibu. 31Yavo avalitigala vihiiri yi Ivuyuda valamedeka kuva vanyingi kuli misaala jihilaa miri musi mu malova nukwama makuyu malahi. 32Halava ho navandu mu Jerusalemi kandi ku kiguru cha Ziyoni avalitigala mwoyo, kigira Yahova Wuvunyali usaaviyi kokora ivindu yivi viekoleke.
33“Yaga nigo ga Yahova amali kovora kigira Mwami wa Asiria: ‘Sialingira mu lidaala linene yili anoho kulasa losele lulala lwuvuta ku lidaala linene yili mba. Avasikari vatumikira zikuuti sivalaza ahimbi ni lidaala linene yili mba; kandi si valumbaka vitumi viamalova viukukumbirizira lidaala yili mba. 34Aliranira kunzira ya yaazira ku, vugira kwingira mu lidaala yili. Inzi Yahova mali kovora. 35Ndakinga kandi ndahonyia lidaala yili, kigira luyali lwange mwene kandi kigira lisuuviriza lia ndalomba ku mutumikiri wange Daudi.’ ”
36Engelosi ya Yahova yazia hokososa ha vandu va Asiria ma ni yita avasikari 185,000. Mugambazuri lidiku lialonda ku, vosi vaali avakuzu. 37Maku Senakeribu mwami yirana namenya mu lidaala linene lia Nineve. 38Lidiku lilala, lwa yaali nasigamira munyasaye mu litembeli liu munyasaye weve uwalangwa Nisiroki, avayaayi veve vaviri, Adirameleki na Sharezeri, vamwita nivivavi viavo, ma nivahalira mu kivala cha Ararati. Muyaayi wundi walangwa Esarihadoni - yamiha mu vogono vwivwe kuli mwami.
©Bible Society of Kenya, 2019