ISAYA 35
35
Inzira yu Vutakatifu
1Changarangwi kandi kivala chumu vilasaangala,
kandi vimuli vilalaviza mwigendanyama.
2Changarangwi kilimba nu kusangara;
kilava kilahi kuli vigulu via Lebanoni,
kandi kilava kigunamu kuli milimi ji vigulu via Karimeli na Sharoni.
Vuli mundu alalola vukumi vwa Yahova,
kandi alole zinguru novonene vwivwe.
3Haana zinguru kumakono galuhi
kandi ku amalu gadegeraa kigira vodedekere.
4Muvoolere vuli mundu woosi utaveeye ni lilema mwoyo ndi,
“Muve nizinguru kandi mutava avati mba!
Nyasaye alaza kumusoola,
kandi alahaana amageri ku vasigu vinyu.”
5Avavoku valalola, kandi wahana matu alahulira.
6Mundu mulema alatumatuma kuli kisusu,
kandi yavo avaveeye zidimbidi,
zinimi ziavo zilimba nukusangara.
Amazi galasinuka mwigendanyama,
kandi togera twa mazi tulituruka kuvitira mu changarangwi.
7Muyeke muhiu gulava kuli lidavalia
kandi lirova liumu lilava visenukiru via mazi.
Havundu hi vivwi vimenya,
vunyasi harara ni lifunzu vilamera ho.
8Halakaveho ninzira enene ilangwa,
“Inzira yu Vutakatifu.”
Umundu mwoni sialakagende kunzira yeyo mba;
kandi mundu musiru sialimilira avandu valonda
kunzira yeyo nu kuvagotiza mba.
9Zisimba si zilakave havundu yaho mba;
zinyama zinduru si zilavitira kunzira yeyo mba.
Yavo ava Yahova yasoola,
nivo avaligenda kunzira yeyo nukuzia yengo.
10Valaduuka mu Jerusalemi nu vuyanzi,
ni vimba nivakuba isango yu vusangali.
Valava nu vuyanzi kandi nuvusangali mihiga ni mihiga,
kandi sivalava ni liverera kandi nilihenda mwoyo mba.
©Bible Society of Kenya, 2019