ISAYA 3
3
Likalagira avandu va Jerusalemi ni Ivuyuda
1Kalunu Yahova, Yahova Wuvunyali, aveeye ahimbi kutulizaho ivindu viosi kandi vandu vosi avahaana ovokonyi ku vandu va Jerusalemi ni Ivuyuda; Azizaa kutulizaho avandu vosi avahaanaa ovokonyi ku Jerusalemi kandi Ivuyuda. Alatulizaho viukulia viavo viosi kandi na amazi gaavo goosi, 2avasaza vaduukiru kandi avasikari vaavo, avakalagi kandi avaporofeti vaavo, avasigitiri kandi avakulundu vaavo, 3avanene vamahi kandi aviimiliri vaavo, avateti kandi vuli mundu utumikira vusigitiri kokora vindu viokogenyia. 4Yahova alakakole avayaayi kwamiiha avandu. 5Vuli mundu alakolera wache goosi aganyala. Avayaayi si valahaana luyali ku avakulundu vaavo mba, kandi avandu vataveeye nuvunyari si valahaana luyali ku avanene vaavo mba.
6Ing'inga yiza lwa aviiko vi inyumba ndala valakatovole mulala kuvo nu kumuvolera, “Ivi ove mwimiliri wiitu mu ing'inga yu vudinyu yiyi, kigira oveeye ninguvu yu kwivika.”
7Navuzwa mundu uyu alakativuli ndi, “Inzi mba! Sinyala kumukonya mba. Munyumba yange inzi simbeeye ni kindu kali kikuzu mba, viukulia kinga zinguvu. Mutangoli kuva mwimiliri winyu mba!”
8Jerusalemi imali kudivizwa! Na Ivuyuda imali kugwa vindu viosi via vavoola kandi via vakoolaa vivihiliriza Yahova; na vanyega Nyasaye; havulavu. 9Lihenza lie zimoni ziavo lilorekiza kuva liu kuhing'ana. Vamali kokora uvwoni havulavu, kuli lidaala linene lia Sodoma. Vamali kudiva! Vamali kwivika mu vudamanu aveene.
10Avandu valungi valava nu vusangali, kandi ivindu vilava vilahi kuvo. Valalia viologeli lwavo. 11Navuzwa avandu vadamanu valadivizwa; agavakolera avandi, navo kandi valakolerwa ndio.
12Avayaayi vadambiza avandu vange, avakali vavamihaa. O, avandu vange aviimiliri vinyu vamuchaminya kutura kunzira inungi.
Yahova yakalagira vandu veve
13Yahova yikaye kondeve yeye yilikalaga; kandi yetegeki kukalagira avandu veve. 14Alakalagira avakulundu kandi aviimiliri vavandu veve. Alombaa vivuni: “Mumali kulanya mulimi gwa amazabibu, kandi zinyumba zienyu ziizuye vindu via mwalanya kutura ku vadaka. 15Muvura vunyali kudambiza avandu vange, kandi mwenyoola uvuhinda kulwa avandu vadaka, Inzi mwami Yahova Wuvunyali mali kovora.”
Lieganihiza ku avakali va Jerusalemi
16Yahova avoora, “Heenzi kuli avakali va Jerusalemi vigingiraa! Vagenda ni vategizi mang'oti gaavo mwigulu. Vavunyavunya zimoni ziavo vuli kazozo. Vagenda ni vaseena, kandi ivisambo#3:16 Ivisambo: Vindu vivofwa ku vilenge vikola liyoga lwumundu agendaa vilala viali viuluyayi na vindi viemiima. ni visara ku vilenge viavo. 17Navuzwa ndavaha amageri, ndavega mitwi jiavo, na valatigala nu luhale.”
18Lidiku lizaa lwa Yahova alituliza ho vindu viosi via vakali va Jerusalemi vigingiraa ku: Ivisambo via vevoha ku zimbigiyi, ku mitwi, mu magoti; 19kandi ku makono gaavo kandi zinguvu zikunikaa muzimoni ziavo, 20kandi zigudwa ziavo, nu uvusigitiri, ni iviseve#3:20 Iviseve: Kamuga kakeekeke akavavikaa mu maguta gafunya mwayu. vifunya mwayu, 21kandi ni zimingiri zia vevoha ku videte, kandi mumuulu gaavo; 22kandi zinguvu ziavo zindahi, ni visibao, kandi ni zinguvu zindi ziukwiyuhira, kandi vibeti viavo, 23kandi ni vielolero, ni zikatani zindahi, kandi ni zinguvu zindambi zinzasasu ziavevohaa ku mitwi jaavo.
24Muvogono vwukutumikira ivifunyaa mwayu, valafunya vugundu, mu vogono vwu kwevoha misibi mirahi, valevoha zimbunu, havogono hi liisu lilahi, valava ni chole, na havogono hi zinguvu zindahi, valivika zinguvu zia madali. Ligondo liavo lilahi lilagirunganywa kuva zisoni.
25Avasaza vilidaala linene, Yee, kali avasaza vi zinguru ligali valitirwa mu vulwani. 26Avalindi vu mu virivwa viavo valakaliri nu kusioma. Lidaala linene lia Jerusalemi lilatigala liere, kuli mukali walekwa yikaye hasi naveeye chahonyo.
©Bible Society of Kenya, 2019