ISAYA 2
2
Mirembe ji mihiga ni mihiga
(Mik. 4:1-3)
1Yili ni likuva liovoporofeti lia Nyasaye yahaana ku Isaya, mwana wa Amozi kigira Ivuyuda na Jerusalemi:
2Mu madiku gaaza,
kukigulu kwi Litembeli lia Yahova liumbakwa kilava igulu
ligali kuvita vigulu vindi viosi.
Na zihiiri zinyingi valagenda kuzia kucho.
3Avandu avanyingi valaza nivavoora,
“Gendi kuzie ku Kiguru cha Yahova,
ku Litembeli lia Nyasaye wa avandu va Isiraeli.
Alakwigiza agayenya kunyi kokole.
Kulagenda kuzinzira ziamali kotovola,
kigira amalago ga Yahova gaturaa Jerusalemi.
Kandi amolomaa ku avandu veve kutura Ziyoni.”
4Yahova alaleeta mirembe hagati
hi lihing'ana lie zihiiri zinene.
Valatura vivavi viavo kuva amagembe,
kandi amatimu gaavo kuva zingonono,
zihiiri si zilazia kulwaana zihiiri zindi mba,
anoho si ziligiza avandu vaavo uvulwani mba.
5Kalunu, ivisukulurwi via Yakobo, hambi kogende mu vulavu vwa Yahova akuheezaa!
Vwigingiri vulakadivizwi
6O, Nyasaye, ivi umali koleka vandu vovo, ivisukulurwi via Yakobo! Kivala chizuuyi uvusigitiri kutura Ivugwi kandi kutura mu kivala cha Avafilisitia. Avandu valonda imiima javageni. 7Kivala chavo chizuuyi ifeza kandi izahabu, na keheri sikeveeye ho ku mavikiru gaavo mba. Kivala chavo chizuuyi zibarasi zinyingi, kandi keheri sikeveeye ho ku magare gaavo gu vulwani mba. 8Kivara chavo chizuuyi vifananyi vinyingi ligali, kandi vasigamira vifananyi via vamali kolomba na amakono gaavo aveene.
9Kunangwa avandu yava valagehizwa nu kuvikwa mu zisoni. Yahova, utavasamiiha mba!
10Valingira mu zimbangaywa zie vigulu kwivisa mu, anoho valayava malina kunangwa vagelizi kwiluka kutura ku vutima nukwivisa kutura kuzinguru zia Yahova, nuvukumi vwivwe. 11Ing'inga yiza lwu luyaayi lwu mundu lulakahere, kandi liegingira liu mundu liradivizwa. Maku Yahova yeng'ine alakahevwe luyali. 12Ing'inga yene yeyo, Yahova Wuvunyali alakagehize vosi avizingulu, kandi yavo vosi vikirage ni liegingira. 13Yahova alakadivize midaragwa mitambi josi ja Lebanoni, kandi misaala josi ja Muhaloni jiveeye mu kivala cha Bashani. 14Yahova alakikize vigulu viosi vinene ni vikekeke, 15minaara josi jatambiha, kandi amadigi goosi ga vuli imbinga. 16Yahova alakakole zimeri ziosi zinene zia Tarishishi kandi ziveeye zindahi ligali kwiyina mu mazi. 17Luyaayi lwu mundu lulagehizwa, kandi liegingira liu mundu lilikizwa. Maku Yahova yeng'ine alakahevwe luyali mu lidiku yilio. 18Kandi vifananyi viosi vilakatulizwiho ligali.
19Avandu valakingiri mu zimbangaywa zia magina gi vigulu, kandi mu malina gu mu lirova kunangwa vahononoke kutura ku vutima vwa Yahova, kandi kwivisa kutura kuzinguru zizie nu vukumi vwivwe, lwa yaza kodegeriza lirova. 20Lwa lidiku yilio liliduuka, valakasiuvi vifananyi vie izahabu ni ifeza via velombera aveene kuvisigamira, valakavilekele zimbuku na manyinya. 21Lwa Yahova yaazaa kodegeriza lirova, avandu valakivisi mu zimbangaywa zia magina gi vigulu kandi mu malina, nokogeliza kwiruka kutura ku vutima vwivwe, kandi kwivisa kutura kuzinguru zizie kandi ku vukumi vwivwe.
22Mutaviika lisuuvira lienyu mu avandu mba, kigira vaveeye kuli umwika. Vaveeye na vokonyi ki?
©Bible Society of Kenya, 2019