ISAYA 25
25
Lwimbu lwi lizominya ku Nyasaye
1O, Yahova, Ivi oveeye Nyasaye wange;
Ndakuha uluyali nukukwizominya.
Ivi umali kokora vindu viokogenyia;
ivi musuuvirifu umali kuduukiza lilohiza liilio liawalomba kale.
2Umali kokora madaala manene kuva mang'anye nukwononyia zimbiga ziago.
Zinyumba ziuvwami zia vasigu viitu vumbaka zituliho mihiga ni mihiga.
3Avandu vi zihiiri zie zinguru valakakwizominyi.
Madaala manene gi zihiiri zinduru galakakutie.
4Avadaka navatiinyalizaa virukiyi ku ivi na vahoni mu zing'inga ziuvudinyu.
Uvahezaa likingwa kutura kumbula yi imbuza enene
kandi ichiriri kutura ku vuhiu vwi liuva.
Avandu valulu vatulira kuli imbuza enene yu vukindu,
5kuli kemeyu mu kivala chumu.
Navuzwa ivi Yahova, umali kukiring'anyia vasigu viitu;
ukiring'anyia lihanzuka lia vandu valulu kuli lilesi likindizaa lidiku liu mbasu mululu.
Nyasaye yetegekizaa lilia
6Ku kiguru cha Ziyoni, Yahova Wuvunyali alaketegekizi iliilia linene kigira zihiiri ziosi zie lirova, iliilia lie viukulia vinolu ni iwaini indahi ligali. 7Hene hano, alatuliza ho vwangu lilesi liovovereri iliakunikangi zihiiri ziosi. 8Mwami munene Yahova aladiviza likuza mihiga ni mihiga. Alakeeye maliga kutura mu zimoni zia vuli mundu, kandi alakatulizi ho zisoni izia vandu veve vamali kusalirira mu lirova liosi. Yahova mwene umali kovora.
9Lwi lidiku yilio liduka, avandu vosi valakavoole, “Uyu niyie Nyasaye wiitu! Kumali kuviika lisuuvira lietu muye, kandi umali kokosola. Aveeye Yahova, kandi kwamala kuviika lisuuvira lietu muye, kandi kalunu koveeye nuvuyanzi kandi nuvusangali ligali kigira umali kukohonyia.”
Nyasaye alakahaane mageri ku Moabu
10Yahova alakakingi kiguru cha Ziyoni, navuzwa avandu va Moabu valakaduvagirwi hasi mu kivala chavo, kuli luvuva luduvagirwa hasi mu liliina lie siina. 11Valanyira makono gaavo igulu kuli mundu agerizaa kwelema ku mazi, navuzwa Yahova alavagehiza ku ligehiza liegingira liavo, na makono gaavo galiyina musi vugira zinguru. 12Alakadivizi zimbinga zia Moabu harara na madigi gaavo matambi nukugatuula hasi mu luguchi.
©Bible Society of Kenya, 2019