ISAYA 22
22
Likuva lia Yahova Kigira Jerusalemi
1Yili ni Likuva lia Yahova kigira Livona lia Malola. Ni kindiki chekoleka? Kigira ki avandu vosi vi lidaala linene lia Jerusalemi valomba lilia nu kusangalira igulu kwi visegese vie zinyumba ziavo? 2Avandu vi lidaala linene liosi vaveeye ni lihanzuka kandi liyoga liu vusangali vonene. Avasaza vinyu vakuzira mu vulwani yivu sivakuza nivalwana mba. 3Aviimiliri vinyu vosi viiruka kandi vagumirwa ni vakikiri kulasa mivano ju vuta. 4Kalunu, mundeke siomere vululu, avandu vange vosi avamali kukuza. Mutagelizi koneminya mwoyo mba. 5Yiyi ni ing'inga yu vuti liguutwa kandi yiligoyana mu Livona lia malola. Amadigi gi Lidaala Linene lietu gamali kusambulwa kandi lianira lio ovokonyi vwitu lihuliriki ku vigulu. Mwami munene Yahova Wuvunyali umali koleta yaga goosi ku kunyi.
6Avasikari kutura mu kivala cha Elamu vaza ni vanini ku Zibarasi, ni viyavali uvuta ni mivano ju vuta. Avasikari kutura Kiri vaali nivetegeki ni zikuuti ziavo. 7Amavoona gi Ivuyuda agaali magunamu ligali, gizura amagari gu vulwani; Avasikari vaniina ku zibarasi vasingiri imbiri wi virivwa via Jerusalemi.
8Likingwa liosi lie Ivuyuda liadedekera. Ing'inga yene yeyo, mwasuuvira mu viugi viu vulwani iviali munyumba yu vwami yu Mumulitu. 9Mwalora Lidigi lie lidaala linene lia Daudi ni liasasuguka kandi mwaleeta amazi kutura mu lidavalia lia hasi; 10Mwavaliza zinyumba ziosi ziu mu Lidaala linene lia Jerusalemi, nimusambula zindala ku zio, kunangwa muduuki konyoora amagina gazio mutumikiri kudigululila lidigi lie Lidaala linene. 11Kandi mwalomba Lidavalia lia amazi ilihia hagati hi lidaala linene, liduuki kuva na mazi kutura mu lidavalia lia kale. Navuzwa si mwenya kuhulira Nyasaye uwalohiza yago goosi kokoleka mu madiku ga kale.
12Mwami munene, Yahova Wuvunyali yamulanga muduuki kulira kandi musiome, muvege amasu ginyu kandi mwiviki zinguvu ziamagunia. 13Muvugono yivu mwaseka ni musaangara. Mwitaa amagondi kandi zing'ombe ni mulia, kandi ni munwa iwaini. Mwavoora, “Kulie kandi kunwi! Kigira mugamba kulakuza.”
14Mwami munene, Yahova Wuvunyali mwene yamoloma ku inzi navoora, “Ligali avandu yava sivalasamifwa vudamanu vwavo lwa vakikiri mwoyo mba. Inzi Mwami munene Yahova Wuvunyali mali kovora.”
Lieganihiza ku Shebuna:
15Mwami munene Yahova Wuvunyali yambolera nzie ku Shebuna, mulindi wi vindu vie inyumba yu vwami nu kumuvolera ndi, 16“Ivi uganagana oveeye vwaha? Ivi oveeye na vunyali ki kwiyavira ikirindwa ivi mwene mu vigulu viamagina? 17Unyala kuva wi kivuni, navuzwa Yahova alakuvugula kandi akusiuvi ihale ligali. 18Alakodola kuli umupira nukukusiuva ihale mu kivala kenene ligali. Ulakuzira mu kivala yiki ahimbi namagare googo gu vulwani gu wigingilira. Oveeye ni zisoni imbiri wa avanene vovo vutumikiraa. 19Yahova alakakutulizi mu litumika lie miyinzi jijo minene, kandi alakwikiza hasi kutura ko vonene vwigulu.”
20Yahova yavolera Shebuna, “Lwayaga galiekoleka, ndakakutumili mutumikiri wange Eliakimu mwana wa Hilikia. 21Ndakavuguli zinguvu ziovonene vuvwo kandi nu musibi gugwo nu kumuviika. Ndakamuhe zinguru zizio ziosi. Alakave kuli baba wa vandu va Jerusalemi ni Ivuyuda. 22Ndakamuhe uvunyali hasi hu Mwami, kisukururwi chu mwami Daudi. Alakave ni zimbungu zie inyumba yu vwami vwa Daudi. Alava ni zimbungu zie inyumba yu vwami vwa Daudi; cha oyo amali kwigura mundu sianyala kuhana mba, kandi cha oyo amali kuhana, mundu sianyala kwigura mba. 23Ndakamukole ave mudinyu ligali mu vutumiki vwivwe, kuli lihema lilombwa vudinyu hasi mu malova, kandi Eliakimu alakave vutangiliru vwu luyali ku avandu vi inyumba yeye yoosi.
24“Navuzwa avana veve na aviiko veve vosi, valakave vuliduhu kuye. Valiehanika kuye kuli iviju vie inyumba, kutura ku vikekeke, kuduuka ku vinene viosi! 25Lwayaga goosi gekoleka, kivambo ichaali ni chaduywa vudinyu ligali kiladengeyizwa nu kugwa hasi. Yiki kilakave ekeheri cha vuli kindu chihanikaa kucho.” Yahova Wuvunyali umali kovora.
©Bible Society of Kenya, 2019