HOSEA 9
9
Hosea Alandizaa Lihaana Mageri ku Isiraeli
1Munyi avandu va Isiraeli, mutasangalira masavo ginyu kuli avandu vatamanyi Nyasaye mba. Mumali kugirung'ana kutura ku Nyasaye winyu kandi si muveeye avasuuvirifu kuyo mba. Mukivala choosi mwayiguliza kuli amalaya ku munyasaye Baali, kandi mwayaanza uvuswage vwa mwaganagana yaamutunga! 2Nonoho si mulanyola lwuvuswage kutura koloze luvuswage kandi mba, anoho si mulanyola iwaini kutura ku chikuminiramu iwaini mba. Iwaini imbia si ilanyooleka mba. 3Si mulamenya mu kivala cha Yahova mba, navuzwa mulirana mu kivala cha Egebeti, kandi mulalia viukulia vidamanu mu kivala cha Asiria. 4Si mulaleeta vihaanwa vie iwaini ku Yahova mba, kandi si mulamuyaanziza ni visiuviliru vienyu mba. Viukulia vienyu vilava kuli via yavo avasioma, kandi vosi avaalia ku viukulia yivi valoneka. Viukulia yivi vilava kigira inzara yaavo aveene, si valavileeta mu Litembeli lia Yahova mba. 5Munyi mulakolaki ku lidiku litovole lie lisavo kandi ku lidiku lie lisavo lia Yahova? 6Lwikivi kiduukaa, munyi vosi mulasalana, na vandu va Egebeti valamuvungiza harara, kandi valayavira miviri jinyu mu kivala cha Mefisi! Amafa kandi zindavati zilakunika mavikiru ginyu gi ifeza kandi zilakunika zinyumba zienyu zia mumenyaamu.
7Ing'inga yu kuhaana mageri imali kuduuka. Yiyi ni ing'inga lwa avandu navanyoole agadukanaa navo. Lwa yago gakolekaa, avandu va Isiraeli valamanya! Mulavoola ndi, “Muporofeti uyu aveeye umusiru; kandi aveeye na roho gwu vulalu.” Avandu munyi muvadunyira kigira uvwoni vwinyu voveeye ovonene ligali. 8Nyasaye amali kunduma kuli muporofeti kwiganihiza vandu veve Isiraeli. Navuzwa vuli havundu hoosi hanzizaa, mugerizaa kondega numutego kuli linyonyi. Kali mu Litembeli lia Nyasaye, avandu vaveeye avasigu va vaporofeti. 9Avandu yava vaveeye avadamanu ligali mu vikolwa viavo, kuli mu madiku gavaali mu lidaala lia Gibea. Nyasaye aliizuliza uvwoni vwavo kandi alavaha amageri.
Isiraeli Konyoora Mageri Kigira Uvwoni
10Yahova avoora, “Lwa ndaanyoora vandu va Isiraeli mulitanga, vaali kuli Mazabibu gamaa mwigendanyama. Lwa ndaalora avaguuga vinyu, galoleka kuli ndoli likuyu liukutanga liengu ku ing'inga yalio. Navuzwa lwa vaza ku kiguru cha Peori, vataanga kusigamira Baali, kandi nonoho vaaloreka kuva avukuvihiririza kuli avanyasaye vavayaanza. 11Uvukumi vwa avandu va Isiraeli vulabuluka kuli linyonyi, kandi lwivulu si lulava kuvo mba, avakali si valavereka kandi mba. 12Kali niiva valiivula vana, ndaviita vosi. Lwa nanduli kuvo, navave mu kivi kenene ligali.”
13Munyi avandu va Isiraeli lwa ndaamulola lwukutanga, mwaloleka kuva kuli misaala ji minazi, ijasimikwa mu malova magunamu. Navuzwa kalunu muhiraa vana vinyu kuzia kwitwa. 14O, Yahova, nyara kokoteeva okolereki avandu yava? Okole avakali vaavo vave avagumba! Kandi uvakole vavuli kuva na maveere gukununyia vana!
Yahova yakalagiraa Avandu va Isiraeli
15Yahova avoora, “Uvudamanu vwavo vwosi vwatangila mu Giligali. Haali hene yaaha handatangira kuvadunyira. Kigira uvudamanu vwa vamali kokora, inzi ndavakunga vatuli mu kivala change. Si ndavayaanza kandi mba. Aviimiliri vaavo vosi vamali kwibaala ku inzi. 16Avandu va Isiraeli, vaveeye kuli musaala gwi miri jimali kwuma si gulama makuyu kali hakuzu mba. Si valiivula vana mba, kali niiva valiivula, ndiita vana vaavo vavayaanza.”
Muporofeti Hosea Yiganihizaa Avandu va Isiraeli
17Nyasaye wange alasura avandu veve, kigira si vamuhuliraa mba. Valava avagendagendi hagati hi zihiiri.
©Bible Society of Kenya, 2019