HOSEA 7
7
1“Lwa inzi nyenya kohonyia avandu vange Isiraeli nukuvakola vazizagiliri kandi, goosi agandolaa nuvuchamu vwavo kandi nizimbi ziavakola. Vagaadana aveene ku aveene; viguula muzinyumba niviva; vanuraa vandu muzinzira. 2Navuzwa sivamanya ndi inzi ndizuliza zimbi ziavo ziosi mba. Uvwoni vwavo vuvakumbiliza; sinyala kuvula kovolola mba.”
Lilohiza Zing'anagani Zindamanu Munyumba yu Vwami
3Yahova avoora, “Avandu vagada mwami harara navatumikiri veve nililohiza lidamanu liumuvwivisu. 4Vosi vaveeye avagaadi kandi sivaveeye avasuuvirifu mba. Livihirirwa liavo liaka kuli muliru, gutafaanwa numudeki kuduuka lwuvusie vwetegeki kodekwa. 5Ku lidiku lieliilia liumwami valomba umwami harara na vatumikiri vene kuhambika iwaini kisiru. 6Yee, vahiiza kuli mahiga mulilohiza liavo liumuvwivisu. Vutima vwavo vwaka uvudiku vwosi, kandi mugamba gwalonda ku gwang'ereng'ana kuli lomemo liumuliru.
7“Mu uvutima vwavo vululu vita avanene vaavo. Vami vaavo vamali kwitwa, navuzwa siaveeye ho kali umundu mulala usaala ku inzi kigira ovokonyi mba.”
Isiraeli ni Nizihiiri Zindi
8Yahova avoora, “Avandu va Isiraeli vaveeye kuli mugadi gwavula kushia. Veledaa ku izihiiri ziveeye ahimbi kuvo 9kandi sivamanya ndi lieredaa ku avageni limali kuvagehiza zinguru mba. Madiku gaavo gisundi ahimbi navuzwa sivamanyi mba. 10Liegingira lia avandu va Isiraeli livalolekiza. Kali niiva ivindu viosi viamala kwekoleka, sivayirana ku inzi Yahova Nyasaye wavo anoho konyenya mba. 11Avandu va Isiraeli vaveeye kuli likuulu lisiru kandi vugira zing'anagani. Vanira avandu va Egebeti kigira vokonyi, kandi vanyagura kuzia ku avandu va Asiria! 12Navuzwa inzi ndaavambura muluvo kandi nandavagumira kuli manyonyi gumuvwerefu lwavaziizaa. Inzi nambahe mageri kigira uvudamanu vwavamali kokora.
13“O, vayaayi kivi keveeye kuvo! Vamala koleka inzi kandi nukwibaala kutura ku inzi. Valadivizwa. Inzi ndeenya kuvahonyia, navuzwa vangadaa. 14Si vasaye ku inzi mugiligali mba, navuzwa muvogono yivwo vagwiza hasi aveene kandi nukulira kuli avandu vatamanyi Nyasaye. Lwa vasaala kigira vuswage ni iwaini, vetemaa aveene kuli avandu vatamanyi Nyasaye. Vamali kwibaala ku inzi! 15Kali niiva ndaavigiza kandi nimbaha zinguru, navuzwa valohiza zing'anagani zindamanu ziumuvwivisu ku inzi. 16Vagirung'ana kutura ku inzi nukuzia ku nyasaye utaveeye nizinguru. Vaveeye avandu vataveeye novokonyi kuli uvuta vwavedeka. Kigira aviimiliri vaavo vamoloma niliegingira valakakuzi likuza lilulu, kandi avandu va Egebeti valakavaseke.”
©Bible Society of Kenya, 2019