HOSEA 4
4
Yahova ayaara avandu va Isiraeli
1Yahova aveeye nikiyaalo ku avandu vamenya mukivala yiki. Muhuliri avandu va Isiraeli, ku agaavoola: “Siaveeye ho kali mulala oveeye musuvirifu anoho wuvuyanzi mukivala, kandi avandu mukivala sivamanyiriza inzi kuli Nyasaye mba. 2Valomba malagano kandi sivatwekizaa mba. Vavoola vovehi, vita, viva, kandi vakora voheyi. Zimbi ziamedeka, kandi iliitana liveeye linyingi ligali. 3Kandi ndio kivala kiluma, kandi kindu choosi kemenya mu kivala kilakakuzi. Zinyama ziosi, manyonyi gumuvwerefu, kandi kali zisuzi ziu mu inyanza vilakakuzi.”
Yahova Ayaara Avasaalisi
4Yahova avoora, “Mutaleki umundu kali mulala ayaara avandu anoho kuvagondokera mba. Lielilira liange liveeye ku munyi avasaalisi. 5Munyi mwigatalaa mbasu navudiku harara navaporofeti. Kunangwa ndadiviza Isiraeli mama vinyu. 6Avandu vange vadiviziywi kigira sivamanyiriza inzi mba. Munyi avasaalisi mumali kusuura kumanyiriza inzi kandi mumali kusuura miigizu gange, kandi kunangwa inzi musuyi kandi sindamanyiliza avana vinyu kuli avasaalisi vange mba.
7“Lwa munyi avasaalisi muveeye avanyingi, nilwo lwa mukolera inzi uvwoni vunyingi, kunagwa inzi ndakagirung'anyie luyali lwinyu kuva zisoni. 8Munyi munyoora uvutugi kutura ku uvwoni vwa avandu vange, kunangwa mwenya vazizagiliri kokora uvwoni. 9Munyi namuhevwe mageri malala mere kuli avandu! Inzi namuhe mageri kandi naamukole namutungi uvudamanu vwa mukoraa. 10Munyi numulie viukulia navuzwa simuliguta mba. Munyi mulasigamira avanyasaye vulwivulu navuzwa, simulanyora avana mba, kigira mumali kondeka na murondaa avanyasaye vandi.”
Yahova Akalagira Lisigamira Misambwa
11Yahova avoora, “Iwaini inguru ni imbia ekolaa avandu vange kuvula kuva nilimanyiriza! 12Vatevaa zing'anagani kutura ku kifananyi chumusaala! Kisala kivavoleraa icha venya kumanya! Vamali kondeka. Kuli mukali ugwizaa mulaya, vamali kwihana aveene ku avanyasaye vandi. 13Vahanaa visiuviliru havundu hatakatifu kuzindongozi zievigulu, kandi vasamba vimuli vifunya mwayu ku tugulu isi wimisaala jigumara kandi mitambi, kigira ichiriri keveeye kilahi!
“Kunangwa avakaana vinyu vatumika kuli malaya, kandi avanavizara vinyu vakolanga voheyi. 14Navuzwa inzi sindavaha mageri kigira yaga mba, kigira munyi aveene mukora ovoheyi namalaya gi Litembeli, kandi harara navo muhaanaa visiuviliru ku vifananyi. ‘Kuli lugano lovoolaa avandu vugira limanyiriza valaduuka mulidiva.’
15“Kali niiva munyi avandu va Isiraeli simuveeye avasuuvirifu ku inzi mba, vwakaveeye vulahi avandu vi Ivuyuda valavula kuva nilihiolo kuli yili. Mutasigamira ha Giligali anoho Bezaveni#4:15 Bezaveni: Bezaveni inyumba yuvudamanu anoho inyumba yivifananyi. mba, anoho mutalomba malagano ku Yahova oveeye mwoyo mba. 16Avandu va Isiraeli vaveeye avahindagirizi kuli zing'ombe. Inzi, Yahova nyara kuvalihiza ndi kuli vimeme viamagondi mu vwayiru? 17Avandu va Isiraeli vayanzizwa nivifananyi ligali. Muvaleke vave. 18Niiva kanywa iwaini inyingi, vayanzilira vuraya vwavo nukuva muzisoni kuvita uvukumi. 19Valagingwa nu kuhilwa ihale kuli imbuza, kandi valava muzisoni kigira visiuviliru viavo virifananyi.
©Bible Society of Kenya, 2019