HAGAI 2

Vukumi vwi Litembeli Lihia

1Ku lidiku lia 21 liu mweli gwa saba muhiga gwene yigwo, Yahova yamoloma kuvitira ku Muporofeti Hagai kandi. 2Yavolera Hagai avolere Zerubabeli mwami wi Ivuyuda, Joshua musaalisi munene na vandu vosi nu kuvavoolera, 3“Aveeye ho mundu hagati hinyu unyala kwizuliza kuli vukumi vwi Litembeli lialange navwo? Liloleka ndi ku munyi kalunu? Kuduuka yiki keve ni kelolekaa kuva hazwa. 4Navuzwa kalunu kali mundu mulala ku munyi atakuza mwoyo mba. Mukore miyinzi kigira mbeeye harara na munyi. 5Lwa mwatula mu kivala cha Egebeti, ndaalaga ndi ndava na munyi ing'inga yoosi. Inzi ngikiri harara na munyi. Kunangwa, mutatia mba. 6Mu ing'inga engekeeke ndadegeliza ligulu ni lirova, kivala kandi inyanza. 7Ndakaguuti zihiiri ziosi, kandi vutugi vwavo vulakaletwe hano. Litembeli lilakave nu vutugi vunyingi. 8Ifeza ni zahabu vie kivala, viosi niviange. 9Litembeli lihia lilakave nu vukumi kuvita Litembeli likulu, kandi hene yaho ndakahaane ku vandu vange miandu kandi mirembe.” Yahova Wuvunyali umali kovora.

Muporofeti Ateeva Avasaalisi

10Mu lidiku lia 24 liu mweli gwa tisa muhiga gwa kaviri gwi liamiiha liu mwami Dariasi, Yahova Wuvunyali yamoloma ku muporofeti Hagai kandi. 11Yavoola, “Teeva vasaalisi likalaga lie liteeva yili: 12Niiva mundu alavugula kedonye chi inyama indakatifu kutura ku kisiuviriru ma agigingili mu ligemo lie inguvu yeeye, niiva alaleka inguvu yeeye idiiri ku vukima, chukulia kedekeywi, iwaini, maguta ga muzeituni, anoho ku chukulia choosi, inguvu yiyi ilakola viukulia yivi vive vitakatifu?” Vasaalisi vaativura nivavoora, “Awa.”

13Maku Hagai yateeva, “Niiva mundu alonogonywa kigira adiiyi ku mukuzu, niiva aladiira ku viukulia yivi alakola viukulia yivi vive vidamanu kandi?”

Avasaalisi vaativura, “Yee”.

14Maku Hagai yavoola, “Yahova avoora ndi, kindu kilala chere kilakoleka ku vandu vi ihiiri yiyi, kandi ku vindu viosi via valomba; kandi ku vindu viosi via vahaana ku vwali vikolwa vidamanu.”

Yahova Alaangaa Vugasu Vwivwe

15Yahova avoora, “Munyala kolola chekoleka ku munyi? Ni mukikiri kutanga kwumbaka Litembeli vuhia, 16niiva mundu alazia ha kitumi chu vuswage ni lisuuvira ndi alanyoola zikiloguramu 200, navuzwa alanyoola vuzwa zikiloguramu 100. Niiva alazia kudaha iwaini zilita 100 kutura mu libiba, navuzwa alanyoola vuzwa zilita 40. 17Ndaatuma kihuzuzi kandi imbura ya magina kudiviza vindu viosi via mwageliza kutaga, navuzwa si mwiganira mba. 18Kalunu ni lidiku lia 24 liu mweli gwa tisa, lidiku liu muse gwi Litembeli gumaliriki. Heenzi kizizaa kwekoleka ku munyi kutura kalunu. 19Kali niiva si koveeye nu vuswage vutigaye, kandi amakuyu, mizabibu, mukomanga, kandi misaala ja muzeituni gitatulizaa makuyu, navuzwa kutura kalunu kuzizagilira, ndamugasiza.”

Lilaga lia Yahova ku Zerubabeli

20Mu lidiku liene yilio, lidiku lia 24 liu mweli gwa tisa, Yahova yahaana ku Hagai makuva lwa kaviri, 21avolere Zerubabeli, mwami wi Ivuyuda: “Mbeeye himbi kodegeriza ligulu ni lirova 22kandi nziza kuguuta vwamihi no koheliza zinguru ziavo. Ndakatungaminyi magare gaavo gu vulwani, harara na vahiri vago. Zibarasi zilakakuzi kandi vahiri vi zibarasi valakitane. 23Lidiku liene yilio ndakakuvuguli ivi Zerubabeli mutumikiri wange, kandi ndakakotovole kwamiiha mu lieta liange. Ivi niye wamali kotovola.” Yahova Wuvunyali umali kovora.

Currently Selected:

HAGAI 2: LOGOOLI

Highlight

Copy

Compare