VAGALATIA 3

1Munyi Avagalatia vasiru! Nivwaha wamuloga? Imbiri wi zimoni zienyu ziene mwivaalirwa havulavu kuli Yeso Kristo yakuza ku musalaba. 2Nyenya kumanya vuzwa kindu kilala kutura ku munyi. Mwavugula Roho wa Nyasaye ku likora agi Lilaga lienyaa, anoho ku lihulira Ivangeri nu kugisuuvira? 3Munyala kuva ndi avasiru kuli ndio? Munyi mwatangila mu zinguru zia Roho wa Nyasaye, kalunu mwenya kumalirizira mu zinguru zienyu ziu muviri? 4Munyi mwavitira mu vusaliri vonene kuli yivwo kulwa vuzwa? Si ganyala kuva ndio mba! 5Nyasaye ohezaa munyi Roho, kandi okolaa vilolekizu hagati hinyu, akolaa vindu yivi viosi kigira mulonda agi Lilaga lienyaa, anoho kigira muhulira Ivangeri nu kugasuuvira?

6Heenzi kuli Aburahamu yaali; kuli Mang'oda Matakatifu gavoora, “Yasuuvira Nyasaye, na kigira lisuuvira lilie Nyasaye yamuvugilira kuli mulungi.” 7Kunangwa, gamuduukira mumanyirizi ndi, visukululwi vie ligali via Aburahamu ni yava avandu avaveeye ni lisuuvira. 8Mang'oda Matakatifu gamanyia mulitanga ndi Nyasaye alavugilira vandu vizihiiri kuva avalungi kuvitira mu lisuuvira. Kunangwa Mang'oda Matakatifu gaalandiza makuva malahi ku Aburahamu ndi: “Kuvitira mu ivi, Nyasaye alakagasizi avandu vovo.” 9Aburahamu yasuuvira kandi yagasizwa; kunangwa, yavo vosi avasuuviraa vagasizwaa kuli naye yagasizwa.

10Yavo vosi valonda agi Lilaga lienyaa, vaveeye hasi hi kilaamo. Mang'oda Matakatifu gavoora, “Mundu woosi, utahulira no kokora goosi agang'odwa mu kitabu chi Lilaga, aveeye hasi hi kilaamo cha Nyasaye.” 11Kalunu gaveeye havulavu ndi, Lilaga silinyala kokora mundu ave mulungi imbiri wa Nyasaye mba; Mang'oda Matakatifu gavoora, “Oveeye mulungi imbiri wa Nyasaye kuvitira mu lisuuvira, alava mwoyo.” 12Navuzwa siaveeye nu vuhambani hagati hi Lilaga ni Lisuuvira mba, nitali Mang'oda Matakatifu gavoora, “Uyu okolaa goosi agi Lilaga lienyaa, alava mwoyo.”

13Kristo yakohonyia kutura mu kilaamo chi Lilaga lwa yagwa kilaamo kigira kunyi; kuli Mang'oda Matakatifu gavoora, “Mundu woosi usungwa ku musaala Nyasaye amulaami.” 14Kristo yakola likuva yili kunangwa, uvugasu vwa Nyasaye yasuuviriza Aburahamu vuduuki kohevwa vandu vizihiiri kuvitira mu Kristo Yeso. Kunangwa kuvitira mu lisuuvira kunyi kuduuki konyoora Roho wa Nyasaye yakusuuviriza.

Lilaga kandi lisuuvirizwa

15Avaamitu vange, ndamufananyira ku limenya lia kazozo: lwa avandu vaviri vavugirizana ku likuva, sihaveeye ho nu mundu unyala kuvunanyia, anoho komeeda kindu kugo mba. 16Kunangwa Nyasaye yalomba lisuuvirizwa lilie ku Aburahamu kandi ku kisukururwi chiche. Mang'oda Matakatifu sigavoola, “Ni visukululwi vivie mba.” Agaveeye kovora avandu vanyingi, navuzwa “Ni kisukururwi chiche,” agaveeye kovora mundu mulala naye ni Kristo. 17Agambooraa gaveeye ndi Nyasaye yalomba lilagana lilie na Aburahamu kandi nalaga kulinda. Lilaga lihaanwa mihiga zimia zine na salasini, silinyala kwononyia lilagana zana yilio anoho kutulizaho lisuuvirizwa lia Nyasaye mba. 18Niiva miandu ja Nyasaye jiveeyeho kigira ku Lilaga, maku sijiveeyeho kigira lisuuviriza lia Nyasaye kandi mba. Navuzwa Nyasaye mu zimbavasi zizie, yahaana miandu jije ku Aburahamu kigira lisuuvirizwa.

19Kunangwa, Lilaga liali na kivuni ki? Liameedwa ho liduuki kumanyia ichi lihiola liveeye, kandi liakolwa ndio lihindiri kuduuka liza lie kisukururwi cha Aburahamu, uwi lisuuvirizwa yili lialomberwa. Lilaga lialetwa ni zingelosi, mu mukono gwu muhambanyi Musa. 20Navuzwa muhambanyi siyenyekaa lwu mundu mulala yenyine aveeye ho mba; Na Nyasaye aveeye mulala.

Kivuni chi Lilaga

21Kunangwa, Lilaga linyala kuhing'ana ni lisuuvirizwa lia Nyasaye? Awa, sigaveeye ndio kali hakuzu! Lilaga lilava ni liahaanwa, kigira koleta livamwoyo ku avandu, ngano mundu woosi yaali akolwe mulungi imbiri wa Nyasaye ku lihulira ni liitia Lilaga. 22Navuzwa Mang'oda Matakatifu gavoora ndi, lirova liosi liveeye hasi hi zinguru ziu uvwoni, na ndio, kihanwa ichasuuvirizwa kigira lisuuvira mu Yeso Kristo, kihaanwaa ku yavo vosi avasuuviraa.

23Lisuuvira ni likikiri kuduuka, Lilaga liakovoha kwosi kuli avahambe kuduuka lwi lisuuvira lialolekizwa. 24Kunangwa Lilaga liali mulindi wiitu kuduuka lwa Kristo yaza, kuduuki kokolwa avalungi imbiri wa Nyasaye kuvitira mu lisuuvira. 25Kalunu ing'inga yi lisuuvira yaduuka, Lilaga siliveeye mulindi wiitu kandi mba.

26Munyi vosi muveeye avana va Nyasaye kuvitira mu lisuuvira mu lihambanywa na Kristo Yeso. 27Munyi vosi avabatizwa mu lihambanywa harara na Kristo, kandi mumali kuva kuli Kristo mwene. 28Kulwayago, sihaveeyeho kandi ni liavukana hagati ha Avayuda na vandu vizihiiri, mutugwa nu muvoholore anoho musaza nu mukali kandi mba. Vosi muveeye kindu kilala mu lihambanywa na Kristo Yeso. 29Niiva muveeye ava Kristo, ahene yaho muveeye visukululwi via Aburahamu kandi munyi mulanyola miandu ja Nyasaye yasuuviriza.

Currently Selected:

VAGALATIA 3: LOGOOLI

Highlight

Copy

Compare