KUTURA 6
6
1Maku Yahova yavolera Musa, “Kalunu uzizaa kolola icha nziza kokora ku Mwami wa Egebeti, Ndamuniga aleke avandu vange vazie. Mugiligali, ndamuniga avakungi vatuli mu kivala chiche.”
Nyasaye Yalanga Musa
2Nyasaye yamoloma ku Musa navoora, “Inzi mbeeye Yahova. 3Ndaaloleka ku Aburahamu, Isaka, kandi ku Yakobo kuli Nyasaye Wuvunyali, navuzwa sindimanyia kuvo ku lieta liange litakatifu, Yahova mba. 4Ndaalomba lilagana liange navo kandi, niimbasuuviriza kuvaha kivala cha Kanaani, kivala cha vamenya mu kuli avageni. 5Kalunu mali kuhulira likenya lia vandu va Isiraeli ava vandu va Egebeti vamali kuvakola avatugwa na mali kwizuliza lilagana liange. 6Kunangwa, volera vandu va Isiraeli ndi inzi mboraa kuvo, ‘Inzi mbeeye Yahova; ndamusoola nukumuvoholora muturi mu vutugwa vwinyu ku vandu va Egebeti. Ndanyira mukono gwu vunyali vwange okoleta amageri gukutihiza kuvo, na ndamuhonyia. 7Ndamukora muve avandu vange, kandi ndava Nyasaye winyu. Mulamanya ndi Inzi mbeeye Yahova, Nyasaye winyu ulwa mala kumukola avavoholore kutura mu vutugwa mu Egebeti. 8Ndamuleeta mu kivala cha ndasuuviriza ku chisuuhu kuha Aburahamu, Isaka, na Yakobo; kandi muliesuuha ndakihaana ku munyi kuli miandu jinyu aveene. Inzi mbeeye Yahova.’ ” 9Musa yavoola yaga ku avandu va Isiraeli, navuzwa sivenya kumuhuliriza mba, kigira mioyo jaavo jaali nijikuzi kigira kivi cha vaali nacho mu vutugwa.
10Maku Yahova yavolera Musa, 11“Zia ovoolere Mwami wa Egebeti ndi kuduuka aleke vandu va Isiraeli vatuli mu kivala chiche vazie.”
12Navuzwa Musa yativulira Yahova, “Niiva vandu va Isiraeli sivalambulira, mwami wa Egebeti alambulira? Inzi mbeeye wekevoyo.”
13Yahova yalaga Musa na Haruni navoora, “Muvoolere vandu va Isiraeli nu Mwami wa Egebeti ndi, Inzi mali kulaga munyi kwimilira vandu va Isiraeli vatuli mu kivala cha Egebeti.”
Lilohiza lia vandu vinyumba ya Musa na Haruni
14Yava nivo avaari mitwi ja avizinyumba ziavo:
Avayaayi va Rubeni, muyaayi wa Yakobo wukutanga mulivulwa, yaali na vayaayi vane: Hanoki, Palu, Hezoroni, na Karimi. Vaali avaguuga vi zihiiri zialangwa amita gaavo. 15Simioni yaali na vayaayi sita: Jemweli, Jamini, Ohadi, Jakini, Zohari, na Shauli, waali umuyaayi wu mukali Mukanani, vaali avaguuga vi zihiiri zialangwa amita gaavo, 16Levi yaali na vayaayi vavaga: Gerishoni, Kohazi, na Merari; vaali avaguuga vi zihiiri zialangwa amita gaavo. Levi yamenya mihiga 137. 17Gerishoni yaali na vayaayi vaviri; Libini na Shimei, na vaali nivisukululwi vinyingi. 18Kohazi yaali na vayaayi vane: Amuramu, Izihari, Heburoni, na Uzieli. Kohazi yamenya mihiga 133. 19Merari yaali na vayaayi vaviri: Maheli na Mushi. Yava vaali vihiiri ya Levi ni visukululwi viavo.
20Amuramu yaleeta Jokebedi, mbozo wa baba weve kuva mukali weve; uwamwivulira Haruni na Musa. Amuramu yamenya imihiga 137, 21Izihari yaali na vayaayi vavaga: Kora, Nefegi, na Zikiri. 22Uzieli naye kandi yaali na vayaayi vavaga: Mishaeli, Elisafani, na Siziri.
23Haruni yaleeta Elisheba, mukaana wa Aminadabu, mbozo wa Nahashoni kuva mukali weve. Yamwivulira Nadabu, Abihu, Elieza, na Izamara. 24Kora yaali na vayaayi vavaga: Asiri, Elikana, na Abiasafu; vaali ivisukulurwi viavukana kutura ku ihiiri ya Kora. 25Elieza muyaayi wa Haruni yaleeta mulala ku vakana va Putieli kuva mukali weve, uwamwivulira Finiasi. Yava nivo avaari mitwi jie zinyumba ni miliango jie ihiiri ya Levi.
26Haruni na Musa vaali nivo ava Yahova yavolera, “Mwimiliri zihiiri zia Isiraeli kutura Egebeti.” 27Yava nivo avasaza avavoolera mwami aleke vandu va Isiraeli.
Lilaga lia Yahova ku Musa na Haruni
28Lwa Yahova yamoloma ku Musa mu kivala cha Egebeti, 29Yavoola, “Inzi mbeeye Yahova. Volera mwami wa Egebeti ivindu viosi via ngovolera.”
30Navuzwa Musa yativura, “Ivi umanyi vulahi ndi Inzi mbeeye nekevoyo mulimoloma; uganagana Mwami alambulira?”
Currently Selected:
KUTURA 6: LOGOOLI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
