KUTURA 24

Lilagana lia Nyasaye na vandu veve

1Yahova yavolera Musa, “Hamba ku inzi ku kiguru, ivi harara na Haruni, Nadabu, Abihu na aviimiliri 70 va vandu va Isiraeli; nimuveeye himbi kuduuka mwiname hasi musigamira. 2Ivi weng'ine, ulaaza ahimbi ku inzi. Avandu sivanyala kwanigira ku kiguru mba.”

3Musa yazia navolera avandu amalago goosi ga Yahova kandi amakuva goosi, na avandu vosi vativura harara nivavoora, “Kunyi kulakola vindu viosi via Yahova avooye.” 4Kunangwa Musa yang'oda amalago goosi ga Yahova Mugamba gwalonda ku, yumbaka uvwali havundu hi kiguru kitangiraa ma nasimika ho amagina likomi na gaviri, lilala ku vuli ihiiri ya Isiraeli. 5Maku yatuma vasoleri ku avandu va Isiraeli, vasambiri Yahova visiuviliru vie zing'ombe kuva vihaanwa vie mirembe. 6Musa yavugula inusu yamasaahi gimitugu naazuka muzibakuli; ninusu niyuha ku vwali. 7Maku yavugula kitabu chililagana, ichang'odwa mu amalago ga Yahova, ma naagasoma vudinyu ku avandu. Vavoola, “Kulahulira Yahova kandi kulakola vindu viosi viamali kukulaga.”

8Maku Musa yavugula masahi gaali kubakuli niyuha ku vandu navoora, “Yaga na masahi gahambanyia lilagana lia Yahova yalomba ni munyi lwa yahaana amalago yaga.”

9Musa, Haruni, Nadabu, Abihu, na vimiliri sabwini va vandu va Isiraeli vaanigira ku kiguru 10na valora Nyasaye wa Isiraeli. Isi wi virenge vivie haali ho nikindu chafwanana amagina gaalwa hasi gi kibiriti, gi langi ya bulu kandi enengeru kuli ligulu. 11Nyasaye siyasaliriza vimiliri va Isiraeli yava mba; valora Nyasaye, na valia nivanwa harara.

Musa ku kiguru cha Sinai

12Yahova yavolera Musa, “Hamba ku inzi ku kiguru, na lwa oveeye hano, ndakuha ivibaho viviri via magina iving'odeeywi ku amalago goosi agu kwigiza avandu.” 13Kunangwa Musa nu mukonyi weve Joshua vetegeka, na Musa yaatanga kwanigira ku kiguru kitakatifu. 14Musa yavolera aviimiliri, “Mukulindiri hano hokososa kuduuka lwa kwirana. Haruni na Huri vaveeye hano ni munyi; mundu woosi uva naava nuvudinyu nuwache mulazia kuvo.”

15Musa yanigira kukiguru cha Sinai, na lilesi lia kikunika. 16Uvukumi vwa Yahova vwaza ku kiguru kandi lilesi liakikunika ku madiku sita. Lidiku lia saba Yahova yalanga Musa kutura hagati ha malesi. 17Vukumi vwa Yahova vwaloleka kuli muliru gusambaa kondonyozi kwi kiguru imbiri wa avandu va Isiraeli. 18Musa yazia yigulu ku kiguru niyingira mu malesi namenya yo madiku arubaini mbasu nu vudiku.

Currently Selected:

KUTURA 24: LOGOOLI

Highlight

Copy