KUTURA 19

Avandu va Isiraeli ha Kiguru cha Sinai

1Avandu va Isiraeli vaatura Refidimu, na kulidiku liu kutanga liu mweli gwakavaga nivakamara kutura Egebeti vaza mu changalangwi cha Sinai. 2Lwa vaali nivakatula Refidimu, viingira mu changalangwi cha Sinai nivalomba hokososa himbi ni kiguru, 3Musa yanigira ku kiguru ukwagana na Nyasaye.

Yahova yalanga Musa kutura mu kiguru namuvolera avolere avandu va Isiraeli visukululwi via Yakobo ndi: 4“Mwalora aga inzi, Yahova ndaakola ku vandu va Egebeti na kuli ndamuginga kuli kihungu kigingiraa viminyu viacho ku zimbaha ziacho, kandi nimuleeta hano ku inzi. 5Kalunu, niiva mulambulira ligali nokolonda lilaga liange, mulava avandu vange. Lirova liosi liveeye liange, navuzwa munyi mulava avandu vatovole vange, 6avandu vaveeye avatakatifu vange, na mulandumikira kuli avasaalisi.” 7Maku Musa yasulunguta kutura mu kiguru naalanga aviimiliri va avandu harara navavoolera vindu viosi via Yahova yamulaga. 8Maku avandu vosi vativura harara nivavoora, “Kunyi kulakola vindu viosi via Yahova amali kovora,” kunangwa Musa yirana ku kiguru navolera Yahova amakuva goosi aga avandu vaali nivavooye.

9Yahova yavolera Musa, “Ndaza ku ivi mu lilesi liliduhu, kunangwa avandu valahulira nimolomaa nivi na valakusuuvira kutura kalunu nu ukuzizagilira.” Musa yavolera Yahova amakuva ga avandu vaali nivamutivuliyi. 10Yahova yamuvolera, “Zia ku avandu yavo uvavoolere vahonge kalunu na mugamba niviitakasa ku lisigamira. Kuduuka vafuyi zinguvu ziavo 11kandi vetegekere lidiku likora kavaga. Ku lidiku liene yilio, Inzi ndiika kukiguru cha Sinai, aha avandu vosi vanyara kondola. 12Lombera avandu zinzako ku zimbega ziosi zie kiguru, avandu vavuli kuvita, kandi uvavoolere vatazia mukigulu anoho kwisuunda ahimbi kucho mba. Niiva mundu vosi aviikaa ekelenge chiche ku kiguru aliitwa, 13kuduuka alaswe na magina anoho nimivano juvuta, vugira mundu woosi kumudiira. Yaga galava ku avandu kandi ku zinyama; kuduuka viitwi ligali. Navuzwa lwi kisiriva kikubwa, aheene yaho avandu valanigila ku kiguru.”

14Maku Musa yasulunguta kutura mu kiguru kuzia ku vandu navavoolera, vetegeke kusigamira Yahova, kunangwa vafuuya zinguvu ziavo. 15Kandi Musa yavavolera, “Mwetegekere lidiku lia gavaga kutura kalunu kandi mutava harara nu mukali ku ing'inga yeyo mba.”

16Kunangwa lidiku likora kavaga inyinga yu mugamba haali ho nilihirigana lienguba kandi loheni, ililesi liliduhu lialoleka ku kiguru, nu umwoyo munene ligali gwikisiliva gwahulirika. Avandu vosi avaari hokososa vaadegera nuvuti. 17Musa yaavimilira kutura hokososa kuzia kwagana na Nyasaye, kandi vasingira hi kiguru kitangiraa. 18Kiguru cha Sinai choosi chizula umwochi, kigira Yahova yaali niyiiki hasi ku cho mu muliru. Mwochi gwaazia igulu kuli mwochi gwi kisambiru kenene, na avandu vosi vaadegera ligali. 19Umwoyo gwikisiliva gwamedeka ligali. Musa yaazizagilira komoloma, na Nyasaye yamutivulira nu mwoyo gwe munene kuli gwinguba. 20Yahova yasulunguta kutura kondongozi kwi kiguru cha Sinai, naalanga Musa kuzia kondongozi kwi kiguru. Musa yanigira mu kiguru 21kandi Yahova yamuvolera, “Yika hasi wiganihizi avandu vatavita ulwaako vaze kombenza mba; niiva valakola ndio, avanyingi kuvo valakuza. 22Kali avasaalisi avaazaa ahimbi ku inzi kuduuka vitakase, gase ndavaha amageri.”

23Musa yavolera Yahova, “Avandu sivanyala kwisuunda ahimbi kukiguru cha Sinai mba, kigira wakwiganihiza kolole kiguru yiki kuva kitakatifu kandi kolombe zinzako kukikumberiza.”

24Yahova yativura, “Yika hasi uvuguli Haruni, wirane naye. Navuzwa avasaalisi na avandu vatavita ulwako kuuza ku inzi mba, gase ndavaha mageri.” 25Maku Musa yasulunguta nazia ku avandu navavoolera aga Yahova yaali navooye.

Currently Selected:

KUTURA 19: LOGOOLI

Highlight

Copy