ESITERI 3
3
Hamani alohizaa kudiviza Avayuda muvwivisu
1Lwi ivindu yivi viosi viali niviakakoleka, mwami Ahasuero yanenehiza Hamani muyaayi wa Hamedaza, uwi kisukururwi cha Agagi#3:1 Agagi: Yaali mwami wa Avamaleki. Avandu veve vaali vasigu vanene va avandu va Isiraeli. nukumuha endeve yuluyali yu kwamiiha vanene vandi vosi. 2Mwami yalaga avanene veve vosi kumanyia uluyali ku Hamani mu lisigama nu kwinama imbiri weve. Vosi vavugilira kokora ndio, nataveeye Modekai, yasura kusigama nu kwinama imbiri weve. 3Avanene vandi mu vutumiki vwu vwami vateva Modekai ikivuni kigira navula kuhulira lilaga liu mwami. 4Vamoloma ku Modekai vuli lidiku nivamugoonya aleke miima yijo, navuzwa yasura kuvugilirizana navo, yasura kokora ndio ku kivuni ndi, oyo yaali Muyuda, na sianyala kwinamira Hamani mba. Kunangwa, vamanya nivavolera Hamani amakuva yaga mbula valore niiva aliikuzira ku makuva yaga. 5Lwa Hamani yanyoora ndi Modekai si azizanga kusigama nu kwinama imbiri weve, yaali nu vutima vonene ligali, 6kandi lwa Hamani yamanya ndi, Modekai yaali Umuyuda, yamanya ndi ukuhaana amageri ku Modekai yeng'ine vuzwa sikulamuduuka mba. Yalohiza ukwita Avayuda vosi avaari mu vwamihi vwa Ahasuero mu Pasia.
7Mu muhiga gwa komi na mbiri gwi liamiiha liu Mwami Ahasuero, mu mweli gwa Nisani, gwukutanga mu muhiga mutakatifu, Hamani yalaga ikura ikubwi iyalangwa Purimu ku vanyoore ing'inga indahi yu kudiviza Avayuda. Kunangwa lidiku lia komi na tatu liu mweli gwa komi na mbiri, mweli gwa Adari, liatovolwa.
8Maku Hamani yavolera umwami, “Ihiiri ndala eveeye ho iyasalanywa mu vuli kivala cha ivi wamihaa. Amalago gaavo gaveeye lugano kutura ku aga vandu vandi. Kuvita goosi sivahulira amalago gu vwamihi mba. Kunangwa sivoveeye vulahi ivi wikuziri ku avandu yava mba. 9Niiva yaga galayaanziza ivi, umwami, haana lilago ling'odeywi kovora ndi yava vosi viitwi. Niiva ulakola ndio, inzi ngusuuvirizaa ligali ndi, ndatunga zikilo 340,000 ziefeza mu livikiru liu mwami kigira uvuyinziri yivu.”
10Umwami yaatuliza imingiri yeeye ku kedete, iyaatumikirwa kuli umuhuri kumanyia ndi amang'oda yago gaveeye nu vunyali vwivwe, nagihaana ku Hamani, muyaayi wa Hamedaza, kisukururwi cha Agagi uwaali umusigu wa Avayuda. 11Umwami yavolera Hamani, “Avandu harara na mabese gaavo, viosi ni vivio kola kuli ivi uyanza.”
12Maku lidiku lia komi na tatu liu mweli gwukutanga, Hamani yalanga avang'odi vu mwami kandi nasoma lilaga yili ligirung'anywi mu vuli lulimi lwa avandu kolondekana ni lilohiza lia mang'oda agatumikaa mu vwamihi nukutumwa ku avamihi vosi lilandizu lielilaga liu mwami yili liatulizwa mu lieta liu mwami Ahasuero kandi niliduywa ku muhuri gwi mingiri yeeye. 13Avanyaguli vaanyaguliza lilaga yili ku vuli kivala chu mwami yamiha ku. Lilaga yili liali ndi ku lidiku lia komi na tatu liu mweli gwa Aderi, Avayuda vosi, avang'erere kandi avahindira, avakali na avana vakekeeke harara kuduuka viitwi ku lidiku lilala vuzwa. Gavadukiraa vasinzwi vugira liverererwa, na ivindu viavo viosi vilaanywi. 14Agaali mu lilaga zana gaduukanaa gamanyikane ku avandu vosi mu vuli kivala, kunangwa vuli mundu ave ni yetegeki lwi lidiku zana liduka.
15Ku lilaga liu mwami ililago yili lialandizwa mu lidaala linene lia Susa, na avanyaguli vaahira amakuva yaga muvivala viosi via Ahasuero yamiha. Umwami na Hamani viikara harara ni vanwa iwaini lwi lidaala lia Susa liali niliveeye mu ligoyana ni ligenya linene ligali.
©Bible Society of Kenya, 2019