KOHELEZU 5
5
Utalomba Lilagana lia Vwangu mba
1Ohenze vogeri lwa wingira mu Litembeli lia Nyasaye. Voveeye vulahi kwingira mu nu kwiga kuvita kuhaana visiuviliru kuli vandu vasiru vakora, vandu vatamanyi vulungi nu vudamanu. 2Uganagane ligali imbiri wu kikiri komoloma kindu, kandi utalomba lilagana lia vwangu ku Nyasaye mba. Nyasaye aveeye mwigulu na ivi oveeye hasi, kunangwa utavoola makuva manyingi kuvita ga wenyaa kovora mba. 3Lwa ohenderaa kindu mbitilira, ni lwo lwa unyala kuva na maloto madamanu, lwa omoloma mbitilira, ni lwo lwa unyala kovora makuva gu vusiru. 4Kunangwa lwa olomba lilagana na Nyasaye, uduukizi lilagana liilio vwangu kuli ganyalika. Nyasaye siaveeye no vokonyi na vasiru mba. Okole kuli walaga. 5Vwakaveeye vulahi kuvula kulaga kuvita kulaga ma uvula kuduukiza lilagana liilio. 6Utaleka makuva googo gakuhili mu vwoni mba, kunangwa uduuki kovoolera vasaalisi va Nyasaye ndi sivwaali vulaliri vuvwo kokora ndio mba. Kigira ki okole Nyasaye ave nu vutima na ivi? Kigira ki oleke Nyasaye yononyie vindu via wayinzilira? 7Maloto manyingi na mang'ana manyingi si gaveeye ni kivune mba; gakuduukiraa utie Nyasaye.
Vutugi Voveeye Kindu mba
8Utagenya lwa olola vwamihi nivudambizaa vadaka kandi ni vuvagayaa konyoola vulungi ni lienya liavo mba. Mwimiliri oveeye munene akingaa vuli mwimiliri wundi oveeye hasi kuye, na vimiliri yava vombi vakingwa nu mwimiliri oveeye igulu kuvo.
9Kali mwamihi amenyaa kigira ligesa litulaa mu milimi.
10Niiva wayanza mabese, si galakuduuka mba; niwegombaa kuva mutugi, si ulanyora viosi via wenya mba. Viosi viveeye vuzwa. 11Lwa uva nu vutugi vunyingi, kandi ulava na vandu vanyingi vukulihiza. Madanyi goosi gaonyoola ni kumanya ndi oveeye mutugi. 12Avayinziri vanyara konyoora anoho vavuli konyoora vindu via vaduukana kulia, navuzwa vanyara kuva ni zindoolo zindahi vudiku. Navuzwa vatugi vaveeye navio vinyingi, vivakolaa vave ni zing'anagani zinyingi zivalomba vavuli kogona vudiku vwosi.
13Mali kolola kindu kidamanu ligali chekoleka mu kivala yiki: Mutugi aviikaa vutugi vwivwe kuduuka vwirana kumusaliriza, 14maku avogotizira kunzira itaduukanaa: Lwu kumalirika, siatigala ku ni vindu viukuhaana ku vana veve mba. 15Kuli yatura munda mwa mama weve, kandi alilana ndio chahonyo kuli yaza; sializia ni kindu kutura ku miyinzi jije, chanyala kuginga mu makono geege mba. 16Si voveeye vulahi mba! Kuziiza kuli kwaza, kokoraa miyinzi nikudidikana kugumira imbuza, navuzwa si konyoora kindu mba. 17Komenya limenya liu mu kisundi kandi mulivelera, muvudegelu, mu vutima kandi mu vulwaye.
18Yaga nigo gandakumanyiliza; kindu kilahi kidukanaa mundu kokora ni kulia, nu kunwa nu kusangalira vindu viayayinzilira mu madiku makekeeke ga Nyasaye yamuha mu kivala. Yiki ni kidieli chu mundu. 19Niiva Nyasaye alahaana ku mundu vutugi ni miandu no koleka asangale muvio, gamudukira asandizi kandi asangaliri miyinzi ja makono geege. Yiki ni kihanwa kutura ku Nyasaye. 20Kigira Nyasaye umali kumuvugilira kuva nu vuyanzi, sialahenda mwoyo kigira livamwoyo liveeye limbi mba.
©Bible Society of Kenya, 2019