KOHELEZU 12
12
1Kunangwa wizulizi mulombi woovo nugikiri muyaayi, madiku gi kivi ni gagikiri kuduuka kigira mihiga gizaa novoole, “Sisangalira livamwoyo mba.” 2Yilwo nilwo lwu vulavu vwi liuva, mweli, kandi zing'ereng'ani vuzizagilira kukumwamira, na malesi gi imbura sigalirana mba. 3Maku makono googo gamali kukukinga galadegera, kandi vilenge vivio viveeye ni zinguru, vilafwogoya. Amiinu googo galava makekeeke kulia chukulia, kandi zimoni zizio zilazengera. 4Matui googo galahana na si ulahulira liyoga liu kunzira mba. Kali siulahulira ulugina nilusieza mba, anoho zinyimbu ni zimbwa mba. Navuzwa lwimbu lwi linyonyi lulakuvukiza kutura mu zindoolo. 5Ulava nuvuti kogenda ku vigulu, ulava mu vuhimwa. Liisu liilio lilagirung'ana live zimbuzi, vulava vudinyu kuivi kogenda kandi liegomba liosi lilahera ku ivi.
Lwa nove nuzizaa hango ho kososa mihiga ni mihiga, avasiomi valakagendagende mu zinzira nivasioma. 6Munyororo gwi ifeza gulakalika, kandi itaya yi zahabu ilagwa ma yadiki; mugoye gwi kidaho gulakalika kandi isiongo ya mazi iladika. 7Miviri jietu jilirana ku luguchi lwa marova kandi mwika gwi livamwoyo gulilana ku Nyasaye, waguhaana ku kunyi. 8Mwilwazi yavoola, “Yaga gaveeye vuzwa, viosi viveeye vuzwa.”
Limaliriza
9Navuzwa kigira mwilwazi yaali mugeri, yaazizagilira kwigiza vandu gayamanya. Yenyeleriza zing'ano, kandi yageriza kohenzeriza giligali gezingano mu vusuuvirifu vwivwe. 10Mwilwazi yageriza kwenyaa makuva gu kuleminya mwoyo, navuzwa makuva ga yang'oda gaali giligali. 11Zing'ano ziu mundu mugeri ziveeye kuli zimbimbu zinzugi zia vayi va magondi vatumikira kulinda magondi, kandi zing'ano ziayavungiza zilamenya kuli misumari giduyiywi vudinyu. Zing'ano yizi ziahaanwa na Nyasaye, mwayi wiitu vosi.
12Mwana wange keveeyeho ni kindu kindi cha wenyekaa ohenzerizi. Sihaveeyeho ne keheli cho kong'oda vitabu mba, kandi lisoma linyingi lilakuluhiza.
13Yivi viosi ni viakavita, koveeyeho ni kindu kilala chokovoora: Utie Nyasaye, kandi olonde malago geege, kigira yiki nicho chagira Nyasaye nalomba mundu. 14Nyasaye azizaa kukalagira vuli kindu choosi cha kokoraa, keve kilahi anoho kidamanu, kali vindu viekoleka mu vwivisu.
©Bible Society of Kenya, 2019