LIZULIZA LITANGILIRA
LITANGILIRA
Kitabu chi Lizuliza keveeye lilohiza lia makuva ga Musa yamoloma ku vandu va Isiraeli nivaveeye mu kivala cha Moabu. Yaga gekoleka lwa vandu vaali nivakamara logendo lwavo mwigendanyama, nivaveeye himbi kuduuka mu kivala cha Kanaani. Kitabu yiki chaang'odwa lwa Musa yaali ahimbi kukuza, ahimbi muhiga gwa 1406 BC.
Vilala ku vindu vinene iviang'odwa mu kitabu yiki viveeye: (1) Musa yizuliza vindu vinene iviekoleka mu mihiga arubaini ijavita. Agonyaa avandu vizulizi kuli Nyasaye amali kuvimilira kuvitira mwigendanyama kandi vave avahuliri kandi avasuuvirifu ku Nyasaye. (2) Musa yiraniraa mu malago likomi kandi adinyirizaa kivuni chi lilago liukutanga, ililangaa avandu vasigamiri Yahova yeng'ine. Kandi yiraniraa mu malago gandi agadukanaa gamiihi livamwoyo lia avandu va Isiraeli mu kivala chavasuuvirizwa. (3) Musa yizuliza avandu kivuni chi lilagana lia Nyasaye navo, navadinyiriza vatangeliehaana vuhia mu likora agi lilaga lienyaa. (4) Joshua yatovolwa kuva mwimiliri uzizaa kuvugura ovogono vwa Musa kwimilira avandu va Nyasaye. Inyima wu kwimba ulwimbu lwu kusangalira uvusuuvirifu vwa Nyasaye, nu kuhaana uvugasu ku zihiiri zia Isiraeli, Musa yakuzira mu Moabu, ivugwi wu Mugera gwa Jorodani.
Kivuni kenene ligali mu kitabu yiki keveeye ndi, Nyasaye umali kohonyia kandi kugasiza avandu veve vatovole, ava ayaanza. Kunangwa kuduuka avandu veve vizulizi yaga, ma vamuyaanze kandi vamuhuliri, kunangwa vaduuki kuva ni livamwoyo kandi vazizagiliri kugasizwa.
Zimbaso zinene zie kitabu yiki ziveeye 6:4-6; kandi namakuva ga Yeso yavoola ndi nigo agaveeye malago manene ligali. “Uyaanze Yahova Nyasaye woovo nu mwoyo gugwo gwosi, na roho gugwo gwosi kandi ni zinguru zizio ziosi.”
Agaveeye mu kitabu yiki
Limoloma lia Musa liu kutanga 1:1—4:49
Limoloma lia Musa lia kaviri 5:1—26:19
(a) Malago Likomi 5:1—10:22
(b) Malago, miigizu na amiganihizu 11:1—26:19
Agavadukaa vakole lwa vingira mu kivala cha Kanaani 27:1—28:68
Lilagana liakolwa lihia 29:1—30:20
Limoloma lia Musa liukumaliza 31:1—33:29
6. Likuza lia Musa 34:1-12
Currently Selected:
LIZULIZA LITANGILIRA: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019